ކ. ތިލަފުށީގައި ސައްހަ ވިސާއެއް ނެތި އުޅެމުންދިޔަ 33 ބިދޭސީން އިމިގްރޭޝަންގެ ބެލުމުގެ ދަށަށް ގެެންގޮސްފި
އިމިގްރޭޝަންގެ 28 އޮފިސަރުންނާއި ފުލުހުންގެ 35 އޮފިސަރުން ހިމެނޭހެން އެ ޚާއްސަ ރެއިޑްގައި ބައިވެރިވެފަވޭ
ބިދޭސީން އިމިގްރޭޝަންގެ ބެލުމުގެ ދަށަށް ގެެންދިއުން
ކ. ތިލަފުށީގައި ސައްހަ ވިސާއެއް ނެތި އުޅެމުންދިޔަ 33 ބިދޭސީން އިމިގްރޭޝަންގެ ބެލުމުގެ ދަށަށް ގެެންގޮސްފިއެވެ.
އެކަމާ ގުޅޭގޮތުން އިމިގްރޭޝަންގެ އޮފިޝަލަކު ވިދާޅުވީ އެ ބިދޭސީން އިމިގްރޭޝަންގެ ބެލުމުގެ ދަަށަށް ގެންދިޔައީ ހުކުރު ދުވަހު ކަމަށެވެ. މީގެ އިތުރުން ތިލަފުށީގައި ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށްގެން ކުރިއަށްގެންދާ ޓާސްކް ފޯސް އިން ވަނީ ހުކުރު ދުވަހުގެ ހެނދުނު ހާއްސަ ރެއިޑް އޮޕަރޭޝަނެއް ހިންގާފަ ކަމަށެވެ.
އެ އިދާރާ އިން ބުނީ އެ އިދާރާގެ 28 އޮފިސަރުންނާއި ފުލުހުންގެ 35 އޮފިސަރުން ހިމެނޭހެން އެ ޚާއްސަ ރެއިޑްގައި ބައިވެރިވި ކަަމަށް އިމިގްރޭޝަންގެ އޮފިޝަލް ވިދާޅުވިއެވެ. އޭނާ ވިދާޅުވީ މި ރެއިޑުގައި ޗެކްކުރީ 257 ބިދޭސީން ކަމަށެވެ. އަދި އޭގެތެރެއިން ސައްހަ ވިސާއެއް ނެތި އުޅެމުންދިއަ 33 ބިދޭސީން އިމިގްރޭޝަންގެ ބެލުމުގެ ދަށަށް ގެންދިޔަ ކަމަށާއި 22 މީހަކަށް ލިޔުމުން ނޯޓިސް ދީފައިވާ ކަމަށް އޭނާ ވިދާޅުވިއެވެ.
ގަވާއިދާ ހިލާފަށް ރާއްޖޭގައި ވިޔަފާރިކުރަމުންދާ ބިދޭސީން ހޯދައި ފިޔަވަޅު އެޅުމުގެ ބޮޑު އޮޕަރޭޝަނެއް އިމިގްރޭޝަނުން މިހާރު ފަށާފަވާއިރު މިއޮޕަރޭޝަނާއި ގުޅޭގޮތުން އިމިގްރޭޝަނުން ބުނީ އިމިގްރޭޝަންގެ އެންމެ ބޮޑު ސަމާލުކަމެއް މިވަގުތު ހުރީ ގަވާއިދާ ހިލާފަށް ޙަރަކާތްތެރިވާ ބިދޭސީން ހިންގާ ވިޔަފާރިތައް ދެނެގަނެ ގާނޫނީ ހަމަތަކުގެ މަތިން ފިޔަވަޅުއެޅުން ކަމަށެވެ.
ކޮންޓްރޯލަރ ޖެނެރަލް އޮފް އިމިގްރޭޝަން ވިދާޅުވީ ރާއްޖޭގައި ބޮޑުވެފައިވާ ބިދޭސީންގެ މައްސަލަ ހައްލުކުރުމަށް ކުރާ މަސައްކަތުގެ ދަށުން ގަވައިދާ ހިލާފައް އުޅޭ ބިދޭސީންގެ ތެރެއިން 5000 މީހުން ފޮނުވާލަން މި އަހަރު ވަނީ އަމާޒު ހިފާފައިކަމަށެވެ. އަދި އޭގެތެރެއިން މިހާތަނައް ގަވައިދާ ހިލާފަށް އުޅޭ 4361 ބިދޭސީއެއް އަނބުރާ ގައުމަށް ފޮނުވާލާފައިވާކަމަށް އިމިގްރޭޝަނުން ބުނެއެވެ.
ގަވާއިދާ ހިލާފަށް އުޅުމުގެ ސަބަބުން އިމިގްރޭޝަންގެ ބެލުމުގެ ދަށައް ގެންދިޔަ ފަރާތްތަކާއި އަމިއްލައަށް ފުރަން ބޭނުން ވެގެން އެކަމަށް އެދިގެން ފުރުވާލި ފަރާތްތަކުގެ އިތުރުން އިމިގްރޭޝަނުން ނޯޓިސްދިނުމަށްފަހު ފުރުވާލެވުނު ފަރާތްތައް ހިމެނެއެވެ.
