އިންޑިއާގެ ލޭބަރުންތަކެއް ހާލުގައި ޖެއްސި މައްސަަލަ ފުލުހުން ބަލަން ފަށައިފި

އިންޑިއާގެ 40 ލޭބަރުން މަސައްކަތް ކުރަން ރާއްޖެ ގެނެސް، މުސާރަ ނުދީ ހާލުގައި ޖައްސާފަައިވާ ކަމަށް ބުނާ މައްސަލަ ފުލުހުން ބަލަން ފަށައިފި އެވެ.

ހޯމަ ދުވަހު އެ މީހުން ވަނީ ރާއްޖޭގައި މިވަގުތު އެމީހުން ދިރިއުޅެމުންދަނީ ދަތި ހާލުގައި ކަމަށް ބުނެ، އަނބުރާ ގައުމަށް ގެންގޮސްދިނުމަށް އެދި އާދޭސްކޮށްފައިވާ ވީޑިއޯއެއް ސޯޝަލް މީޑިއާގައި ޕޯސްޓުކޮށްފަ އެވެ.

އެ ވީޑިއޯގައި ބުނެފައިވާ ގޮތުން އެމީހުން ރާއްޖެ އައިސްފައިވަނީ އިންޑިއާގެ އެޖެންޓެއް މެދުވެރި ކޮށެވެ. އަދި ރާއްޖެ އައިސްފައިވަނީ ރަނގަޅު ކުންފުންޏަކުން، ރަނގަޅު މުސާރައަކާއި ހުރުމާއި ކެއުން ހަމަޖެހޭނެ ކަމަށް އެޖެންޓް ދިން ޔަގީންކަމަށް އިތުބާރު ކޮށްފައި ކަމަށް ވީޑިއޯގައި ވަނީ ބުނެފައެވެ.

އެކަމާ ގުޅޭ ގޮތުން ފުލުހުންގެ މީޑިއާ އޮފިޝަލް "ރާއްޖެ ޓީވީ" އަށް އަންގާރަ ދުވަހު ވިދާޅުވީ އެ މައްސަލައަށް އެޓެންޑްވެ ބަލަން ޖެހޭ ކަންކަން މިހާރު ބަލަން ފަށާފައިވާ ކަމަށެވެ.

ފުލުހުން ބުނީ އިނޑިއާގެ ހާލުގައި ޖެހުނުކަމަށް ބުނާ 40 މީހުންގެ މައްސަލަ ބަލަން ފަށާފައިވާއިރު، މިހާތަނަށް ބެލިބެލުމުން އަދި އެކަމާއި ގުޅޭ އިތުރު އެއްވެސް މައުލޫމާތެއް ނުލިބޭ ކަމަށާއި އަދި އެކަމުން އެއްވެސް ކުރިއެރުމެއް ވެސް ލިބިފައި ނުވާކަމަށެވެ. ނަމަވެސް ކުރިއަށް އޮތް ތަނުގައި މި މައްސަލަބަލައި ތަހުގީގުކޮށް، މިކަމުގެ އެންމެ ފަހުގެ މައުލޫމާތު ނޫސްވެރިންނާއި ހިއްސާކުރާނޭ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.

އިންޑިއާގެ ނޫސްތަކުން ވެސް އެ ވާހަކަތައް ރިޕޯޓްކޮށްފައިވާއިރު، އެގަމުމުގެ ނޫސްތަކުން ބުނާގޮތުން އެ މީހުން މަސައްކަތް ކުރަމުންދަނީ ކޮންސްޓްރަކްޝަން ކުންފުންޏެއްގަ އެވެ. ނަމަވެސް، އެއީ ކޮން ކުންފުންޏެއްކަން ކަށަވަރެއް ނުވެ އެވެ.

ރާއްޖެއިން ވަޒީފާ ހަމަޖައްސައި ދިނުމަށް ކޮންމެ މަސައްކަތްތެރިއަކު 40،000 އިންޑިއަން ރުޕީސް އެޖެންޓަށް ދައްކާފައިވާ ކަމަށާއި އަދި މުސާރާއިގެ ގޮތުން މަހަކު 25،000 އާއި 30،000 އިންޑިއަން ރުޕީސް މުސާރައިގެ ގޮތުގައި ދޭނެ ކަމުގެ ޔަގީންކަން ވެސް އެޖެންޓް ދިންކަމަށް ވަނީ ރިޕޯޓްކޮށްފައެވެ.

އެ މަސައްކަތްތެރިން ރާއްޖެ އައިސްފައިވަނީ މިދިޔަ ޖޫން މަހު އެވެ. ޖޫން މަހު މަސައްކަތް ކުރަން ފެށި ނަމަވެސް، މުސާރަ ނުލިބޭތާ އެތައް ދުވަހެއް ވެއްޖެ ކަމަށް އެ މީހުން ބުންޏެވެ.

އެ މީހުން ބުނީ ފުލް މުސާރަ ލިބިފައިވަނީ އެންމެ ފުރަތަމަ މަހު އެކަނި ކަމަށެވެ. އޭގެ ފަހުން،  ދިނީ މުސާރައިގެ ދެބައިކުޅަ އެއްބައި ކަމަށް ބުނެ އެވެ.

މުސާރައިގެ ނުލިބިގެން މުޒާހަރާ ކުރުމުން އެ ކުންފުނިން ބިރުދައްކާ ކަމަށް ވެސް މަސައްކަތްތެރިން ތުހުމަތު ކުރެެ އެވެ. އަދި އެމީހުން ދިރިއުޅޭ ތަންތަނުގެ ކަރަންޓް ވެސް ކަނޑާލާފައިވާ ކަމަށް އެ މީހުން ބުނެފައިވެ އެވެ.

އިންޑިއާ ސަރުކާރުން ދަނީ އެ މަސައްކަތްތެރިން އަނބުރާ ގައުމަށް ގެންދިއުމުގެ މަސައްކަތް ކުރަމުންނެވެ.