ސިވިލްކޯޓަށާއި ކްރިމިނަލްކޯޓަށް ގާޒީން ހޯދުމަށް އިއުލާން ކޮށްފި

ސިވިލް ކޯޓަށާއި ކްރިމިނަލް ކޯޓަށް ގާޒީން ހޯދުމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން އިއުލާން ކޮށްފިއެވެ.

ޖޭއެސްސީން ބުރާސްފަތި ދުވަހު ކުރި އިއުލާނުގައި ބުނެފައިވާ ގޮތުން ސިވިލް ކޯޓަށް ހޯދަން ބޭނުން ވަނީ ދެ ގާޒީންނެވެ. އަދި ކްރިމިނަލް ކޯޓަށް ވެސް ހޯދަން ބޭނުން ވަނީ ދެ ގާޒީންނެވެ.

ގާޒީންގެ މުސާރައިގެ ގޮތުގައި 30،000 ރުފިޔާ ކަނޑައެޅިފައިވާއިރު ލިވިންގް އެލަވަންސްގެ ގޮތުގައި 15،000 ރުފިޔާ ވަނީ ކަނޑައެޅިފައެވެ.

އޭގެ އިތުރުން ސިވިލް ކޯޓުގެ ގާޒީންނަށް ރިސްކް އެލަވަންސްގެ ގޮތުގައި 1650 ރުފިޔާ ކްރިމިނަލް ކޯޓުގެ ގާޒީންގެ ރިސްކް އެލަވަންސްގެ ގޮތުގައި 3300 ރުފިޔާ ވަނީ ކަނޑައެޅިފައެވެ.

ހަމައެހެންމެ ކަނޑައަޅާަފައިވާ އުސޫލްތަކުގެ މަތިން ގާޒީންނަށް މެޑިކަލް އިންޝުއަރެންސްއާއި ފޯން އެލެވެންސް ލިބޭނެ ކަމަށް ޖޭއެސްސީގެ އިއުލާނުގައި ބުނެފައިވެއެވެ.

ޝަރުތު ހަމަވާ ފަރާތްތަކުގެ ތެރެއިން މަގާމަށް ކުރިމަތި ލެއްވުމަށް ބޭނުންވާ ފަރާތްތަކުން މަގާމަށް އެދި ހުށަހެޅުމުގެ ފުރުސަތު އަންނަ ސެޕްޓެމްބަރު މަހުގެ 10 ވަނަ ދުވަހުގެ 14:00 އާ ހަމައަށްވަނީ ހުޅުވާލާފައެވެ. ސިވިލް ކޯޓަށާއި ކްރިމިނަލް ކޯޓަށް ގާޒީން ހޯދާ އިރު ކްރިމިނަލް ކޯޓުގެ ކުރީގެ އިސްގާޒީ އަބްދުލް ބާރީ ޔޫސުފާއާއި އެ ކޯޓުގެ ގާޒީ އަހުމަދު ޝަކީލު ވަނީ އެހެން ކޯޓްތަކަށް ބަދަލު ކޮށްފައެވެ.