ސަރުކާރުގެ ޚަރަދު 41.59 ބިލިއަނަށް، ހިންގުމުގެ ހޭދަ މައްޗަށް، ތަރައްގީގެ ޚަރަދު ދަށަށް!
17 ނޮވެމްބަރު 2024 | އާދީއްތަ 11:14އެންމެ ބޮޑު އެއްޗެއް ހޭދަ ކޮށްފައިވަނީ ރިކަރަންޓް ޚަރަދުގެ ގޮތުގައެވެ. އެއީ ޖުމްލަ ޚަރަދުގެ 71 އިންސައްތަ ނުވަތަ 28.1 ބިލިއަން ރުފިޔާއެވެ.
ރައީސް މުއިއްޒު އަދި މާލީ ވަޒީރު ޒަމީރު - މަތިބަރު ސަރުކާރަށް ދައުލަތުގެ ބެޖެޓުން ކުރަން ޖެހޭ ހޭދަ ވަނީ އިތުރުވެފައި
7 ނޮވެމްބަރުގެ ނިޔަލަށް 2024 ވަނަ އަހަރުގެ ދައުލަތުގެ ބަޖެޓުން 41.59 ބިލިއަން ރުފިޔާ ސަރުކާރުން ޚަރަދުކޮށްފިއެވެ.
މިނިސްޓްރީ އޮފް ފިނޭންސް އިން ނެރުނު އެންމެ ފަހުގެ ހަފްތާ މާލީ ރިޕޯޓުގައިވާ ގޮތުން، މިއީ ވޭތުވެދިޔަ އަހަރުގެ މި މުއްދަތުގައި ޚަރަދު ކުރި 41.2 ބިލިއަން ރުފިޔާއަށްވުރެ އިތުރު އަދަދެކެވެ.
ލޯނު އަނބުރާ ދެއްކުމަށް ކުރެވުނު ޚަރަދުތައް ނުހިމަނާ، ދައުލަތުގެ ޚަރަދު 39.5 ބިލިއަން ރުފިޔާއަށް އަރާފައިވާ ކަން ފިނޭންސްގެ ރިޕޯޓުން ފާހަގަ ވެއެވެ.
މީގެ ތެރެއިން އެންމެ ބޮޑު އެއްޗެއް ހޭދަ ކޮށްފައިވަނީ ރިކަރަންޓް ޚަރަދުގެ ގޮތުގައެވެ. އެއީ ޖުމްލަ ޚަރަދުގެ 71 އިންސައްތަ ނުވަތަ 28.1 ބިލިއަން ރުފިޔާއެވެ.
ރިކަރަންޓް ޚަރަދުގެ ތެރެއިން މުސާރައާއި އެލަވަންސް އަދި ޕެންޝަނަށް 11.2 ބިލިއަން ރުފިޔާ ޚަރަދުކޮށްފައިވާއިރު، އިދާރީ އަދި ހިންގުމުގެ ޚަރަދުތަކަށް 16.8 ބިލިއަން ރުފިޔާ ހޭދަކޮށްފައިވެއެވެ.
ވޭތުވެދިޔަ އަހަރުގެ މި މުއްދަތާ އަޅާބަލާއިރު މުސާރަ އާއި އެލަވަންސްތަކަށް މި ސަރުކާރުން ކޮށްފައިވާ ހޭދަތައް އިތުރުކަން ފިނޭންސްގެ ހިސާބުތަކުން ފާހަގަ ވެއެވެ. އޭރު މުސާރައާއި އެލަވަންސްތަކަށް ޚަރަދު ކޮށްފައިވަނީ 9.9 ބިލިއަން ރުފިޔާއެވެ. އަދި އިދާރީ ޚަރަދުތަކަށް 16.2 ބިލިއަން ރުފިޔާއެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ތަރައްޤީގެ މަޝްރޫޢުތަކަށް ޖުމްލަ 8 ބިލިއަން ރުފިޔާ ޚަރަދުކޮށްފައިވާ ކަމަށް ހިސާބުތަކުން ދައްކާއިރު، މިއީ ވޭތުވެދިޔަ އަހަރުގެ މި މުއްދަތުގައި ޚަރަދުކުރެވުނު 10.2 ބިލިއަން ރުފިޔާއަށްވުރެ 2.2 ބިލިއަން ރުފިޔާ މަދު އަދަދެއްކަން ފާހަގަ ކުރެވެއެވެ.
އާމްދަނީގެ ގޮތުގައި، 2024 ވަނަ އަހަރު މިހާތަނަށް ދައުލަތަށް 29.3 ބިލިއަން ރުފިޔާ ލިބިފައިވެއެވެ. މީގެ ތެރެއިން ޓެކްސްގެ ގޮތުގައި 22.4 ބިލިއަން ރުފިޔާ އަދި ޓެކްސް ނޫން ގޮތްގޮތުން 6.3 ބިލިއަން ރުފިޔާ ލިބިފައިވެއެވެ. މީގެ އިތުރުން، ހިލޭ އެހީގެ ގޮތުގައި ދިވެހިރާއްޖެއަށް 565 މިލިއަން ރުފިޔާ ލިބިފައިވެއެވެ.
އަޅާކިޔާއިރު، ވޭތުވެދިޔަ އަހަރުގެ މި މުއްދަތުގައި ހިލޭ އެހީ ހިމަނައިގެން ލިބުނު އާމްދަނީގެ ގޮތުގައި ރެކޯޑު ކުރެވިފައިވަނީ 28.9 ބިލިއަން ރުފިޔާއެވެ.
މިދިޔަ ސެޕްޓެމްބަރު މަހު ފާސްކުރި 5.5 ބިލިއަން ރުފިޔާ ހިމަނައިގެން 2024 ވަނަ އަހަރަށް ފާސްކުރެވުނު މުޅި ބަޖެޓަކީ 55 ބިލިއަން ރުފިޔާއެވެ.
