ޔުއެފާ ނޭޝަންސް ލީގު އޭގެ ގުރޫޕު ތިނެއްގައި ބޮސްނިއާއާ ދެކޮޅަށް ކުޅުނު މެޗުން ޖަރުމަނު ތަފާތު ބޮޑު ނަތީޖާ އަކުން މޮޅުވެއްޖެ އެވެ.

ހޮނިހިރު ދުވަހުގެ ރޭ ބޮސްނިއާއާ ދެކޮޅަށް ކުޅުނު މެޗު ޖަރުމަނުން ކާމިޔާބު ކުރީ 7-0ންނެވެ. މެޗުގެ ފުރަތަމަ ހާފުގައި ޖަރުމަނުން ތިން ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ ހަތަރު ލަނޑު ޖަހައިފަ އެވެ.

މެޗު ފަށައިގެން ދެ ވަނަ މިނެޓުގައި ޖަރުމަނަށް ލީޑު ނަގައިދިނީ ޖަމާލް މުސިއާލާ އެވެ. އޭގެ ފަހުން ފުރަތަމަ ހާފުގެ 23 ވަނަ މިނެޓުގައި ޖަރުމަނުގެ ދެ ވަނަ ލަނޑު ޖެހީ ޓިމް ކްލެއިންޑިއެންސްޓް އެވެ. މެޗުގައި ޖަރުމަނުގެ ތިން ވަނަ ލަނޑު 37 ވަނަ މިނެޓުގައި ޖެހީ ކައި ހަވާޓްޒް އެވެ.

ދެ ވަނަ ހާފު ފަށައިގެން ފަސް ވަނަ މިނެޓުގައި ޖަރުމަނުގެ ހަތަރު ވަނަ ލަނޑު ޖެހީ ފްލޯރިއަން ވާޓްޒް އެވެ. އޭގެ ހަތް މިނެޓު ފަހުން ވާޓްޒް ވަނީ މެޗުގައި އޭނާގެ ދެ ވަނަ ލަނޑު އަދި ޖަރުމަނުގެ ފަސް ވަނަ ލަނޑު ޖަހައިފަ އެވެ. މެޗުގައި ޖަރުމަނުގެ ހަ ވަނަ ލަނޑު 66 ވަނަ މިނެޓުގައި ޖެހީ ލެރޯއީ ސާނޭ އެވެ. އަދި އެ ޓީމުގެ ހަތް ވަނަ ލަނޑު 79 ވަނަ މިނެޓުގައި ޖެހީ ކްލެއިންޑިއެންސްޓް އެވެ.

މޮޅާއެކު ޖަރުމަނު އޮތީ މި ގުރޫޕުގެ އެއް ވަނަ މަގާމުގަ އެވެ. އެއީ ޖަރުމަނު ކުޅުނު ފަސް މެޗުން 13 ޕޮއިންޓު ހޯދައިގެންނެވެ. މި ގުރޫޕުގެ ދެ ވަނައިގައި އޮތީ ނެދަލެންޑްސް އެވެ.