އޮފީސް މުބާރާތުގެ އަންހެން ޗެމްޕިއަންކަން ވެމްކޯ އިން ހޯދައިފި

ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމު ކޮށްގެން ބާއްވާ އިންޓަރ އޮފީސް/ކޮމްޕެނީ ވޮލީ ބޯޅަ މުބާރާތުގެ އަންހެން ޑިވިޝަންގެ ޗެމްޕިއަންކަން ކުލަބު ވެމްކޯ އިން ހޯދައިފި އެވެ.

މުބާރާތުގެ އަންހެން ޑިވިޝަންގެ ޗެމްޕިއަންކަން ކުލަބު ވެމްކޯ އިން ހޯދީ ހުކުރު ދުވަހުގެ ރޭ ކުޅުނު ފައިނަލް މެޗުގައި ޕޮލިސް ކުލަބުގެ މައްޗަށް ކުރި ހޯދައިގެންނެވެ. ފައިނަލް މެޗު ވެމްކޯ އިން ކާމިޔާބު ކުރީ ތިން ސެޓު އެއް ސެޓުންނެވެ. އެއީ މެޗުގެ ފުރަތަމަ ސެޓު ޕޮލިސް އިން ކާމިޔާބު ކޮށްފައި ވަނިކޮށް، ފަހަތުން އަރައި ތިން ސެޓު ކާމިޔާބު ކޮށްފަ އެވެ.

މެޗުގެ ފުރަތަމަ ސެޓު ޕޮލިސް އިން ކާމިޔާބު ކޮށްފައި ވަނީ 25-17ންނެވެ. ނަމަވެސް ވެމްކޯ އިން ވަނީ ޖެހިގެން ކުޅުނު ދެ ވަނަ ސެޓު 17-25ން ކާމިޔާބު ކޮށްފަ އެވެ. ތިން ވަނަ ސެޓާއި ހަތަރު ވަނަ ސެޓު ވެސް ވެމްކޯ އިން ކާމިޔާބު ކުރީ 21-25ންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ވެމްކޯގެ ޖޫޒާން ޒަރީރު އެވެ.

މުބާރާތުގެ އެންމެ މޮޅު ހަ ކުޅުންތެރިންނަށް ހޮވުނީ ޗެމްޕިއަން ވެމްކޯގެ ޖޫޒާން، އައިޝަތު މާޖިދާ، ޕޮލިސްގެ ހައްވާ ރާޝިދާ، މަރިޔަމް އަޒުމާ، އާމިނަތު އަރީޝާ އަދި އިމިގްރޭޝަންގެ ނަރީމާ އިދުރީސް އެވެ. މުބާރާތުގެ އެންމެ މޮޅު ލިބަރޯ އަކަށް ހޮވުނީ ވެމްކޯގެ ނުހާ ވަހީދު އެެވެ. އެންމެ މޮޅު ކޯޗަކަށް ވެމްކޯގެ އަޙުމަދު އަދީލް ހޮވުނުއިރު، މުޅި މުބާރާތުގެ އެންމެ މޮޅު ކުޅުންތެރިޔަކީ ވެމްކޯގެ މާޖިދާ އެވެ.

ވެމްކޯ އިން ވަނީ މިއަހަރު ބޭއްވި ވީއޭއެމް ކަޕްގެ އިތުރުން، ޤައުމީ ލީގުގެ ވެސް ޗެމްޕިއަންކަން ހޯދައިފަ އެވެ.