އަނެއްކާވެސް ހުޅުމާލެއިން ބިން ވިއްކަނީ
ހުޅުމާލެއިން ބިންވިއްކުމަށް 2021 ގައި ކުރީ ސަރުކާރުން ހުޅުވާލުމުން، އެ ތަނަކީ މާލޭ ސިޓީ ކައުންސިލުގެ އިހްތިސާސްގައި ހިމެނޭ ތަނެއް ކަމަށާއި، މާލޭ ރައްޔިތުންނަށް ގޯތި ލިބޭނެ ގޮތް ފަހިކޮށްދިނުމަށްވުރެ ސަރުކާރުން އިސްކަން ދެނީ އެޗްޑީސީގެ އާމްދަނީ އިތުރު ކުރުމަށް ކަމަށް ވިދާޅުވެ މިހާރުގެ ރައީސް މުހައްމަދު މުއިއްޒު، މާލޭ ސިޓީގެ މޭޔަރުގެ މަގާމުގައި ހުންނެވި އިރު ވަނީ ވަރަށް ބޮޑަށް ފާޑުވިދާޅުވެފައި.
ހުޅުމާލެ ބިން ހިއްކަމުން ދިޔަ އިރުގެ މަންޒަރެއް
ހުޅުމާލެއިން އަނެއްކާވެސް ބިން ވިއްކަން ބުރާސްފަތި ދުވަހު ހުޅުވާލައިފިއެވެ.
މިއީ ފާއިތުވި 2 މަސް ދުވަހުގެ ތެރޭގައި ހުޅުމާލެއިން ބިން ވިއްކަން ހުޅުވާލި ދެވަނަ ފަހަރެވެ. އެންމެ ފަހުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބިން ވިއްކަން ހުޅުވާލީ މިއަހަރުގެ ސެޕްޓެމްބަރު މަހުގައެވެ. އެ ފަހަރު ހުޅުމާލެ ދެވަނަ ފިޔަވަހިން 16 ބިމެއް ވިއްކުމަށް ހުޅުވާލިއެވެ.
މި ފަހަރު ބީލާމުގެ އުސޫލުން 8 ބިން ވިއްކާލަން ނިންމާފައިވާކަމަށް (އެޗްޑީސީ އިން ކޮށްފައިވާ އިއުލާނުގައި ވަނީ ބުނެފައެވެ.
އެޗްޑީސީން ބުނެފައިވަނީ ބިން ގަނެވޭނީ ހަމައެކަނި ދިވެހިންނަށް ކަމަށާއި ކުންފުންޏެއް ނަމަ ސައްތައިން ސައްތަ ދިވެހިން ހިއްސާވާ ކުންފުންޏަކަށް ކަމަށެވެ.
ވިއްކާލަން ހުޅުވާލާފައިވާ 8 ބިމުގެ ތެރެއިން 2 ބިމަކީ ބީޗް ފްރަންޓުން ވިއްކާ ބިން ކަމަށާއި އަނެއް 6 ބިމަކީ ބީޗް ސައިޑުން ވިއްކާ ބިން ކަމަށްވެސް އެޗްޑީސީން ވަނީ ބުނެފައެވެ. ބީޗް ފްރަންޓުން ވިއްކުމަށް ހުޅުވާލާފައި ވަނީ 1708 އަކަފޫޓޫގެ ބިމަކާއި 1737 އަކަފޫޓޫގެ ބިމެކެވެ. އަދި ބީޗް ސައިޑުން ދޫކުރަނީ 1513 އަކަފޫޓާއި 1534 އަކަފޫޓާ ދެމެދުގެ ބިމެވެ.
ބީޗް ފްރަންޓް ބިންތަކުގެ ބީލަން ފެށޭ އަގަކީ އަކަފޫޓަކަށް 4،500 ރުފިޔާ ކަމަށާއި، އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4،000 ރުފިޔާ ކަމަށް އެޗްޑީސީން ވަނީ ބުނެފައެވެ.
ކޮންމެ ފަރާތަކަށްވެސް އެއް ބިމަށްވުރެ ގިނަ ބިން ގަތުމަށް ބީލަން ހުށަހެޅިދާނެ ކަމަށްވެސް އެޗްޑީސީ އިން ވަނީ ބުނެފައެވެ.
ހުޅުމާލެއިން ބިންވިއްކުމަށް 2021 ގައި ކުރީ ސަރުކާރުން ހުޅުވާލުމުން، އެ ތަނަކީ މާލޭ ސިޓީ ކައުންސިލުގެ އިހްތިސާސްގައި ހިމެނޭ ތަނެއް ކަމަށާއި، މާލޭ ރައްޔިތުންނަށް ގޯތި ލިބޭނެ ގޮތް ފަހިކޮށްދިނުމަށްވުރެ ސަރުކާރުން އިސްކަން ދެނީ އެޗްޑީސީގެ އާމްދަނީ އިތުރު ކުރުމަށް ކަމަށް ވިދާޅުވެ މިހާރުގެ ރައީސް މުހައްމަދު މުއިއްޒު، މާލޭ ސިޓީގެ މޭޔަރުގެ މަގާމުގައި ހުންނެވި އިރު ވަނީ ވަރަށް ބޮޑަށް ފާޑުވިދާޅުވެފައެވެ.
ހުޅުމާލޭގެ ދެވަނަ ފިޔަވަހިން ދިރިއުޅުމަށް ގޯތި ވިއްކުން އޭރު މުއިއްޒު ސިފަ ކުރެއްވީ "މާލެ ރައްޔިތުން ނިކަމެތިކުރުން" ކަމުގައެވެ.
