އެއަރ އެޝީއާގެ ފްލައިޓް އަނެއްކާވެސް ކެންސަލްކޮށްފި

ރާއްޖެއިން މެލޭޝިއާ އަށް ދަތުރު ކުރުމަށް ހަމަޖެހިފައި އޮތް އެއަރ އެޝިއާގެ ފްލައިޓް އަނެއްކާވެސް ކެންސަލްކޮށްފިއެވެ.

ރާއްޖެއެމްވީއަށް މައުލޫމާތު ދެއްވަމުން، އެ އެއާލައިންގެ ރާއްޖޭގެ އޭޖެންޓް، އޯލް އެޗް މޯލްޑިވްސްގެ އޮފިޝަލަކު ވިދާޅުވީ ހުކުރު ދުވަހު ހަވީރު 5 ޖަހާއިރު ފުރަން ހަމަޖެހިފައި އޮތް ފްލައިޓް ކެންސަލްވީ ބޯޓުން "ހައިޑްރޯލިކް ތެޔޮ" ލީކުވެގެން ކަމަށާއި، ނަމަވެސް މިހާރު އެ މައްސަލަ ހައްލުކޮށްފައިވާ ކަމަށެވެ.

މީގެ އިތުރުން އޮފިޝަލް ވިދާޅުވީ ކެންސަލްވި ފްލައިޓް ހޮނިހިރު ދުވަހު ފުރުމަށް ހަމަޖެހިފައިވާ ކަމަށެވެ.

މައުލޫމާތު ލިބިފައިވާ ގޮތުގައި ހަމަ މި ފްލައިޓް އެއަރ އެޝިއާގެ ފަރާތުން ބުރާސްފަތި ދުވަހުގެ ރޭވެސް ވަނީ ކެންސަލްކޮށްފައެވެ. އެހެންނަމަވެސް ފްލައިޓް ކެންސަލް ކުރީ ކޮން ސަބަބަކާއި ހުރެކަމެއް އެ ފަރާތުން ހާމައެއް ނުކުރެއެވެ.

އަނެއްކާވެސް ހަމަ މި ފްލައިޓް މިރޭ ކެންސަލްވުމާއި ގުޅިގެން ގިނަ ބަޔަކު ވަނީ ވެލާނާ އިންޓަނޭޝަނަލް އެއަރޕޯޓުގައި ނުރުހުން ފާޅުކޮށްފައެވެ.

މި ފްލައިޓް އިން ފުރުމަށް ހަމަޖެހިފައިވާ ދިވެހި ފަސިންޖަރުން އަނބުރާ ގޮސްފައިވާއިރު ބައެއް ބިދޭސީ ފަސިންޖަރުން ވަނީ ހުޅުލޭ އައިލެންޑް ހޮޓަލަށް ބަދަލުކޮށްފައެވެ.