ކުޑަ ދެ އަންހެން ކުދިންނަށް ޖިންސީ ގޯނާ ކުރިކަމުގެ ތުހުމަތުގައި 56 އަހަރުގެ ފިރިހެނެއް ހައްޔަރުކޮށްފި
56 އަހަރުގެ މީހާ ހައްޔަރުކުރީ ކޯޓު އަމުރެއްގެ ދަށުން
ކްރައިމް ސީންއެއް ފުލުހުން ބަންދުކޮށްފައި - ފައިލް ފޮޓޯ
ކުޑަ ދެ އަންހެން ކުދިންނާއި ޖިންސީ ގޯނާ ކުރިކަމުގެ ތުހުމަތުގައި 56 އަހަރުގެ ފިރިހެނެއް ހައްޔަރުކޮށްފިއެވެ.
ބުދަ ދުވަހު ފުލުހުން ބުނީ އިތުބާރު ކުރެވޭ މަގާމެއްގައި ހުރި މީހަކު 11 އަހަރުގެ އަންހެން ކުއްޖަކަށް އަދި 7 އަހަރުގެ އަންހެން ކުއްޖަކަށް ޖިންސީ ގޯނާ ކުރިކަމަށް ތުހުމަތު ކުރެވޭ މައްސަލައެއް 4 ނޮވެންބަރު 2024 ވަނަ ދުވަހުގެ ރޭ ރިޕޯޓުކޮށްފައިވާ ކަމަށެވެ.
މި ހާދިސާ ހިނގި ރަށް ހާމަ ކޮށްފައި ނުވާއިރު ފުލުހުން ބުނީ، އެކަން ހިނގީ ދެކުނުގެ އަތޮޅުތަކުގެ ރަށެއްގައި ކަމަށެވެ.
ފުލުހުން ބުނީ މި މައްސަލައާ ގުޅިގެން 56 އަހަރުގެ ދިވެހި ފިރިހެނެއް އަންގާރަ ދުވަހުގެ ރޭ ވަގުތެއްގައި ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
ކުޑަކުދިންނާ ގުޅޭ މައްސަލަތަކަކީ ސީރިއަސް މައްސަލަތަކަކަށްވާތީ ކުއްޖާގެ އައިޑެންޓިޓީ ރައްކާތެރި ކުރުމުގެ ގޮތުން ފުލުހުން ކުއްޖާގެ އަތޮޅާއި ރަށް ހާމައެއް ނުކުރެއެވެ.
މީގެ އިތުރުން މިދިޔަ މަހުގެ ތެރޭގައި ވެސް ދެކުނުގެ އަތޮޅުތަކުގައި (ގއ، ގދ، ޏ، ސ) ގައި ހިމެނޭ ރަށެއްގައި 8 އަހަރުގެ ކުޑަ ފިރިހެން ކުއްޖަކަށް ޖިންސީ ގޯނާކުރިކަމުގެ ތުހުމަތުގައި 26 އަހަރުގެ ބިދޭސީ ފިރިހެނެއް ކޯޓު އަމުރެއްގެ ދަށުން ހައްޔަރުކޮށްފައިވެއެވެ.
އަދި ދެކުނު ސެންޓްރަލް ޕޮލިސް (މ، ފ، ދ، ތ، ލ) ގައި ހިމެނޭ ރަށެއްގައި ސްކޫލް ފިރިހެން ޓީޗަރެއް ދަރިވަރުންގެ އުމުރާ ނުގުޅޭ ވާހަކަ ދައްކައި ގުރޫމް ކުރި ކަމަށް ތުހުމަތު ކުރެވޭ މައްސަލައެއް 17 އޮކްޓޫބަރު 2024 ގައި ރިޕޯޓުކުރުމާއި ގުޅިގެން އެ މައްސަލަ ވެސް ފުލުހުން ގެންދަނީ ތަހުގީގު ކުރަމުންނެވެ.
