ކެރަމް ވާރލްޑް ޗެމްޕިއަންޝިޕް: ޓީމު އިވެންޓުގެ ސެމީ ފައިނަލް އިން ރާއްޖޭގެ ދެ ޓީމު ވެސް ޖާގަ ހޯދައިފި

ހަ ވަނަ ކެރަމް ވާރލްޑް ޗެމްޕިއަންޝިޕުގެ ޓީމު އިވެންޓުގެ ސެމީ ފައިނަލް އިން ރާއްޖޭގެ ފިރިހެން ޓީމު އަދި އަންހެން ޓީމު ވެސް ޖާގަ ހޯދައިފި އެވެ.

އެމެރިކާގެ ކެލަފޯނިއާގައި މިހާރު ކުރިއަށްދާ ކެރަމް ވާރލްޑް ޗެމްޕިއަންޝިޕުގައި ވާދަކުރާ ރާއްޖޭގެ ޤައުމީ ފިރިހެން ޓީމުގައި ހިމެނެނީ ޙަސަން ނާޒިމް، އިބްރާހީމް ހުޖާން އަލީ، އިސްމާއީލް އަޒްމީން އަދި މުޙައްމަދު މުންތަސިރު އެވެ. އަދި ރާއްޖޭގެ ޤައުމީ އަންހެން ޓީމުގައި ހިމެނެނީ އާމިނަތު ވިދާދު، އައިޝަތު ނައުފާ، އައިޝަތު ފައިނާޒް އަދި ފާތިމަތު ރަޔާނާ އެވެ.

މުބާރާތުގެ ޓީމު އިވެންޓުގެ ސެމީ ފައިނަލް އިން ރާއްޖޭގެ ދެ ޓީމު ޖާގަ ހޯދާފައިވާއިރު، ސެމީ ފައިނަލްގައި ދެ ޓީމު ވެސް ބައްދަލު ކުރަން ޖެހެނީ ސްރީ ލަންކާއާ އެވެ. އެގޮތުން ޓީމު އިވެންޓުގެ ސެމީ ފައިނަލްގައި އަންހެން ޓީމުން ލަންކާއާ ދެކޮޅަށް ނިކުންނާނީ ބުދަ ދުވަހުގެ ރޭ އެވެ. އަދި ޓީމު އިވެންޓުގެ ސެމީ ފައިނަލްގައި ފިރިހެން ޓީމުން ލަންކާއާ ދެކޮޅަށް ނިކުންނާނީ ބުރާސްފަތި ދުވަހު އެވެ.

ވާރލްޑް ޗެމްޕިއަންޝިޕުގެ ކުރިން ރާއްޖޭގެ ކެރަމް ޓީމުން ވަނީ ތަމްރީނުތަކެއް ވެސް ކުރިއަށް ގެންގޮސްފަ އެވެ. މީގެ އިތުރުން މިއަހަރު ރާއްޖޭގައި ބޭއްވި އޭޝިއަން ކެރަމް ޗެމްޕިއަންޝިޕްގައި ވެސް ރާއްޖެއިން ވަނީ ރަނގަޅު ނަތީޖާތަކެއް ހޯދައިފަ އެވެ. އެގޮތުން ޑަބަލްސް އިވެންޓުގައި ރާއްޖޭގެ އިސްމާއީލް އަޒްމީން އަދި ޙަސަން ނާޒިމް (ނާނަ) ރިހި މެޑަލް ހޯދި އެވެ. ޓީމު އިވެންޓުގައި ރާއްޖޭގެ ފިރިހެން ޓީމު ރިހި މެޑަލް ހޯދިއިރު، އަންހެން ޓީމުން ލޯ މެޑަލް ހޯދި އެވެ. މުބާރާތުގައި ރާއްޖޭގެ ކުޅުންތެރިން ވަނީ ސިންގަލްސް އިވެންޓުގެ ކުއާޓާ ފައިނަލްގައި ވެސް ވާދަކޮށްފަ އެވެ.