އާރބަން ސެންޓަރުތައް ކަނޑައެޅީ ކައުންސިލްތަކާއި މަޝްވަރާކުރުމެއް ނެތި: ވައްޑެ
12 ނޮވެމްބަރު 2024 | އަންގާރަ 18:38މުޅި ސަރުކާރުގެ ތެރެއިން ފެންނަނީ ރޭވުންތެރިކަމާއެކު، ކައުންސިލްގެ ނިޒާމަކީ މުޅި ދައުލަތަށް އޮތް ބުރައެއް ތަކުލީފެއްކަމަށް ދައްކަވާތަން
ދަ ޑިމޮކްރެޓްސްއިން ބޭއްވި ނޫސްވެރިންގެ ބައްދަލުވުމުގައި، ވަހީދު (ވ) އަދި ޝުޖާއު (ކ)
ގައުމީ ތަރައްގީ ޕްލޭނަށް ރައްޔިތުންނާއި ޕާޓީތަކާއި ކައުންސިލްތަކުގެ މަޝްވަރާ ހޯއްދަވާނެކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އާބަން ސެންޓަރުތައް ކަނޑައެޅީ ކައުންސިލްތަކާއި މަޝްވަރާކުރުމެއް ނެތި ކަމަށް ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވެއްޖެއެވެ.
ދަ ޑިމޮކްރެޓްސްގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވީ މިދިޔަ އަހަރެއްހާ ދުވަހުގެ ތެރޭގައި ކަންބޮޑުވާ ކަންތައްތަކެއް ސަރުކާރުންކޮށްފައިވާ ކަމަށެވެ. އެގޮތުން ރައްޔިތުންނަށް ވިއްކި ސިޔާސަތު ނުވަތަ މެނިފެސްޓޯ އަދި ރައްޔިތުން ކައިރީގައިވި ވައުދުތައް ފުއްދަންޖެހޭނެ ކަމަށެވެ. އަދި ލާމަރުކަޒީ ނިޒާމުގެ ތެރެއިން ރައީސް ޑރ. މުހައްމަދު މުއިއްޒު މާލެ ސިޓީގެ މޭޔަރުކަމުގައި ހުންނަވައިގެން ލާމަރުކަޒީ ނިޒާމުގައި ހުރި ދަތިތަކާއި ގޮންޖެހުންތަކާއި ގުޅިގެން ލައްކަ ވާހަކަތައް ދެއްކެވި ކަމަށެވެ.
އަދި ވޯޓު ހޯއްދަވަން ވެވަޑައިގެންނެވި ވައުދުގެ ތެރެއިން އެންމެ ބޮޑު އެއް ވައުދަކީ ލާމަރުކަޒީ ނިޒާމުގެ ޗެމްޕިއަނަކަށް ވެވަޑައިގެންނަވާނެ ވައުދު ކަމަށާއި، ނަމަވެސް ވެރިކަމަށް ވަޑައިގެން އަހަރެއް ވެގެންދިޔަ އިރު ފެނިގެންދަނީ ބޮކްސިންގ ބޭގެއްގައި ތަޅާހެން ލާމަރުކަޒީ ނިޒާމުގައި ތަޅާ ޗެމްޕިއަނަކަށްވާން މަސައްކަތްކުރައްވާތަން ކަމަށް ވައްޑެ ވިދާޅުވިއެވެ.
ވައްޑެ ވިދާޅުވީ އާބަން ސެންޓަރު ހެދުމުގެ ނަމުގައި ރަށްތަކެއް އިއުލާންކުރުމުގެ އެއްދުވަސްކުރިން ގައުމީ ދުރު ރާސްތާގެ ޕްލޭނެއް އެކުލަވާލުމަށްޓަކައި ބޭއްވި ބައްދަލުވުމުގައި ވިދާޅުވެފައިވަނި ސިޔާސީ ޕާޓީތަކާއި ރައްޔިތުންގެ ހިޔާލާ މަޝްވަރާތައް ބޭނުންވާ ކަމަށެވެ. ނަމަވެސް އާބަން ސެންޓަރުތައް ކަނޑައެޅުމުގައި އެއްވެސް މަޝްވަރާއެއް ނުކުރާ ކަމަށެވެ.
ނެޝަނަލް އެސެމްބްލީ މެންބަރު ޝުޖާއު އަލީ ވިދާޅުވީ އެއްއަހަރު ދުވަހުގެ ތެރޭގައި ފެނިގެންދަނީ ލާމަރުކަޒުކުރުމާއި އިދިކޮޅަށް ކަންކަންކުރަމުންދާތަން ކަމަށެވެ. އަދި ކައުންސިލްގެ ބައިވެރިވުން ނެތި ސަރުކާރުން ކަންކަން ނިންމަވަމުން ގެންދަވާ ކަމަށާއި، އާބަން ބިލަކީ ކައުންސިލްތަކާއި މަޝްވަރާކުރުމެއް ނެތި ކުރަމުން ގެންދާކަމެއް ކަމަށް ޝުޖާއު ވިދާޅުވިއެވެ.
ޝުޖާއު ވިދާޅުވީ ކައުންސިލްތަކަށް ކުރާ ހަރަދަކީ ބުރައެއްނަމަ، ރަށްރަށުގެ މަގުތައް ސާފުކުރުމުގެ މަސައްކަތްވެސް ހުއްޓާލަންޖެހޭ ކަމަށެވެ. މިސްކިތްތައް ދިއްލާ ސާފުކުރުން ހުއްޓާލުމާއި، ކައުންސިލް މުވައްޒަފުން ވަޒީފާއިން ކަނޑާ ގެއަށް ފޮނުވާލަންޖެހޭ ކަމަށެވެ. އަދި މި ކަންކަމަކީ މާލީ ބުރައެއްކަމަށް ދެކޭއިރު، ސަރުކާރުން ދައްކާ ވާހަކައާއި ހަގީގަތާއި ދިމާނުވާ ކަމަށް ވެސް ޝުޖާއު ވިދާޅުވިއެވެ.
