ޗާގޯސް މައްސަލައިގައި މުއިއްޒު ސަރުކާރުން އިނގިރޭސިވިލާތަށް ފޮނުވި ކަމަށް ބުނާ ސިޓީގެ މައުލޫމާތު ހޯދުމަށް ރާއްޖެޓީވީން އާރްޓީއައި ހުށަހަޅައިފި
ޗާގޯސް މައްސަލައިގެ ކަންކަން ބެލުމަށް ޔޫއެންގައި ބަހައްޓާފައި ހުރި އެޓަރނީ ޖެނެރަލްގެ މުވައްޒަފުގެ ތަފްސީލްތައް ހޯދުމަށް ވަނީ އެދިފައި
ރައީސް ޑރ މުހައްމަދު މުއިއްޒުގެ ކުރެހުމެއް ފަހަތުން ޗާގޯސް ރަށްތައް ފުސްކުރެވިފައި
ދިވެހިރާއްޖޭގެ ދެކުނުން އޮންނަ، މިލްކުވެރިކަމުގެ މައްސަލަ އުފެދިފައިވާ، ޗާގޯސް ޖަޒީރާތަކުގެ ސިޔާދަތު މޮރިޝަސްއަށް ދިނުމަށް އިނގިރޭސިވިލާތުން ނިންމި ނިންމުމާ ގުޅިގެން ދިވެހި ސަރުކާރުން އިނގިރޭސިވިލާތަށް ފޮނުވި ކަމަށް ރައީސް ޑރ މުއިއްޒު ވިދާޅުވި ސިޓީގެ މައުލޫމާތާއި، ޔޫއެންގައި ހުންނަ ކަމަށް ވިދާޅުވި މުވައްޒަފުގެ މައުލޫމާތު ހޯދުމަށް ރާއްޖެޓީވީން އާރްޓީއައި ހުށަހަޅައިފިއެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އާރްޓީއައި މެދުވެރިކޮށް ރާއްޖެޓީވީން އެދިފައިވަނީ 11 ނޮވެންބަރު 2024 ވީ ހޯމަ ދުވަހު އެވެ.
އެ އާރުޓީއައިގައި ރާއްޖެޓީވީން ވަނީ, ޗާގޯސް މައްސަލައިގައި އިނގިރޭސި ސަރުކާރުން ނިންމި ނިންމުމާ ގުޅިގެން، އެޓަރނީ ޖެނެރަލް އޮފީހުގެ މުވައްޒަފެއް ދާއިމީކޮށް މިސަރުކާރު އުފެދުނީއްސުރެ ޔޫއެންގައި ހުންނާނެ ކަމަށާާއި، ޔޫއެންގައި ބަހައްޓައިގެން ވެސް ކުރައްވަންޖެހޭ މަސައްކަތްތައްވެސް ސަރުކާރުން ކުރައްވަމުން ގެންދަވާކަމަށާއި، ރާއްޖޭގެ ކަނޑުން ގެއްލުނު ބައި ހޯދުމަށްޓަކައި ތާރީހީގޮތުން ފެންނަން ހުރި ކަންކަމާއެކު އިނގިރޭސި ސަރުކާރަށް ރަސްމީކޮށް ސިޓީ ފޮނުވާފައި ވާނެކަމަށް ޖުމްހޫރީ ދުވަހުގެ މުނާސަބަތުގައި އާދިއްތަ ދުވަހުގެ ރޭ ދަރުބާރުގޭގައި ބޭއްވި ޖަލްސާގައި ރައީސް ޑރ މުހައްމަދު މުއިއްޒު ވިދާޅުވެފައި ވާތީ، ޔޫއެންގައި ހުރީ އެޓަރނީ ޖެނެރަލްގެ ކޮން މުވައްޒަފެއްތޯ އާއި، އެ މުވައްޒަފު ކޮންމެ ދުވަހަކު ކުރަން ޖެހޭ މަސައްކަތްތަކާއި، މިހާތަނަށް އެ މަސައްކަތްތަކުން ހާސިލްވި ކަންތައްތަކާއި، އެ މުވައްޒަފަށް ދާ ޚަރަދުގެ ތަފްސީލް ހާމަކޮށްދިނުމަށް އެދިފައެވެ.
ހަމައެއާއެކު، ދިވެހި ސަރުކާރުން އިނގިރޭސި ސަރުކާރަށް ސިޓީ ފޮނުވި ތާރީޚާއި، ސިޓީ ފޮނުވީ އިނގިރޭސި ސަރުކާރުގެ ކޮން ބޭފުޅަކަށްތޯ އާއި އެ ސިޓީގައި ރާއްޖެއިން ހުށަހެޅި ނުވަތަ އެދުނު ކަމަކީ ކޮބާތޯ ހާމަކޮށްދިނުމަށް ވެސް އެދިފައިވެއެވެ. މީގެއިތުރުން، ދިވެހި ސަރުކާރުން އިނގިރޭސިވިލާތަށް ފޮނުވި ސިޓީ އާންމު ކުރާނެތޯ އާއި ނުކުރެވޭ ނަމަ ސިޓީގައި ހުރި ކަންކަން ދިވެހި ރައްޔިތުންނާ ހިއްސާކޮށްދެއްވުމަށް ވެސް ރާއްޖެޓީވީން ވަނީ އެދިފައެވެ.
ޗާގޯސްގެ ރަށްތައް މޮރިޝަސްއާ ހަވާލުކުރަން ނިންމި މައްސަލައަށް އަލިއަޅުއްވާލައްވައި ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަދައްކަވަމުން ރައީސް ޑރ ވިދާޅުވެފައިވަނީ "ކަނޑުން ގެއްލުވާލި ބައި ހޯއްދެވުމުގެ މަސައްކަތް ރެޔާ ދުވާލު" ކުރައްވަމުން ގެންދަވާ ކަމަށެވެ.
ރައީސް ޑރ މުއިއްޒު ވިދާޅުވީ ރައީސް ވިދާޅުވީ ރޯމާ ދުވާލު ކަނޑައެޅިފައިވާ ދުސްތީރީ ނިޒާމަށާއި ޤާނޫނު އަސާސީއާ ޚިލާފަށް ރައްޔިތުންގެ މަޖިލީހުގައި އަހާލުމެއް ނެތި ރާއްޖޭގެ ކަނޑުން ބޮޑު ބައެއް ދޫކޮށްލި ކަމަށާއި، އެކަން ކޮށްފައިވާ ގޮތުން އެކަން ހައްލު ކުރުމުގަ ބުރަ މަސައްކަތްތަކެއް ކުރައްވަން ޖެހިވަޑައިގަންނަވާ ކަމަށެވެ.
"ރެޔާ ދުވާލު މިދަނީ ކުރަމުން. އެޓަރނީ ޖެނެރަލް އޮފީހުގެ މުވައްޒަފެއް ދާއިމީކޮށް ޔޫއެންގަ ހުންނާނެ. އަޅުގަނޑުމެން ސަރުކާރު އުފެދުނީއްސުރެ ފޮނުވައިގެން އެތާ ބަހައްޓައިގެން ވެސް ކުރަންޖެހޭ މަސައްކަތްތައްވެސް އެދަނީ ކުރަމުން އެކިއެކި މަސައްކަތް ވަކީލުންގެ ޓީމުން ވެސް އެބަކުރޭ،" ރައީސް ޑރ މުއިއްޒު ވިދާޅުވިއެވެ.
ރައީސް އިތުރަށް ވިދާޅުވީ، ރާއްޖޭގެ ރަސްރަސްކަލުންގެ ލިޔެކިޔުންތަކުންވެސް ފެންނަން ހުރުމާއެކު، އެހެން ޤައުމަކަށް ވުރެ ދިވެހިރާއްޖެއަށް މާ އައުލާކަން ބޮޑު ވެގެންވާތީ އާއި ދިިވެހިރާއްޖޭގެ ތަނެއްގެ ގޮތުގައި ބެލުން ތާރީޚި ގޮތުން ފެންނަން ހުރުމާއެކު އިނގިރޭސި ސަރުކާރަށް ރަސްމީކޮށް މިހާރު ސިޓީއެއް ފޮނުވާފައިވާނެކަމަށެވެ. އަދި އުއްމީދަކީ އިންސާފުވެރި ގޮތެއްގައި މިކަމުގައި ފައިސަލާކުރުން ކަމަށް ވެސް ރައީސް ވަނީ ވިދާޅުވެފައެވެ.
ރައީސް ޑރ. މުޙައްމަދު މުޢިއްޒު ވެރިކަމަށް ވަޑައިގެން، އެންމެ ފުރަތަމަވެސް ކުރައްވާނެ އެއް ކަންތައް ކަމުގައި ވިދާޅުވީ "ގެއްލުވާލި ކަނޑު" ހޯދުމުގެ މަސައްކަތް ކުރުމަށެވެ.
އެގޮތުން، ދިވެހިރާއްޖޭގެ ޚާއްސަ އިޤްތިޞާދީ ސަރަޙައްދު ދެކުނުން ފުށުއަރާކަމަށް ބުނެ އިންޓަރނޭޝަނަލް ޓްރައިބިއުނަލް އޮން ލޯ އޮފް ދަ ސީގައި މޮރިޝަސްގެ ފަރާތުން ހުށަހެޅި މައްސަލައިގެ ނިންމުން ރިވިއުކުރުމަށް ހުށަހެޅުމަށް ދިވެހި ސަރުކާރުން ވަނީ ނިންމާފައެވެ. އަދި މިކަމާގުޅޭ ތަޖުރިބާކާރުންގެ ޓީމެއް އެކުލަވާލައި އެ މަސައްކަތް ކުރަމުން ގެންދާ ކަމަށްވެސް ސަރުކާރުން ބުނެފައިވެއެވެ. އެގޮތުން އަދި މިމަސައްކަތަށް ޚާއްސަ ސަމާލުކަމެއް ދީގެން އަވަހަށް ކުރިއަށް ގެންދިއުމަށްޓަކައި ކޮމިޓީއެއްވެސް އެކުލަވާލާފައިވެއެވެ.
ދިވެހި ސަރުކާރުން މި މައްސަލަ ރިވިއުކުރުމަށް އިޓްލޮސް އަށް ހުށަހަޅާނެ ކަމަށް ބުނުން ފިޔަވާ މިހާތަނަށް އެއްވެސް މަސައްކަތެއް ކުރިކަމެއް ފެންނާކަށް ނެތެވެ.
ދާދި ފަހުން އިނގިރޭސިވިލާތުން ވަނީ ޗާގޯސް ރަށްތަކުގެ ސިޔާދަތީ ބާރު މޮރިޝަސްއަށް ދިނުމަށް ނިންމާފައެވެ. މިކަމާ ގުޅިގެން ބަންޑާރަނައިބު އަހުމަދު އުޝާމް ވަނީ އިނގިރޭސިވިލާތުގެ މި ނިންމުމުގެ ސަބަބުން ދިވެހިރާއްޖެއިން މި މައްސަލައިގައި ގެންގުޅޭ ސްޓްރެޓަޖީ ބަދަލުކުރަންޖެހޭ ކަމަށް ވިދާޅުވެފައެވެ. އަދި މިހާރު އެކަމުގެ މަސައްކަތް ކުރެވެމުންދާ ކަމަށް ބަންޑާރަނައިބު ވިދާޅުވިއެވެ.
