ޔުނައިޓެޑުން ލެސްޓާ ބަލިކޮށްފި

އިނގިރޭސި ޕްރިމިއަރ ލީގުގައި ލެސްޓަރ ސިޓީއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު މޮޅުވެއްޖެ އެވެ.

ޔުނައިޓެޑުގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފު ނިމުނުއިރު ޔުނައިޓެޑު އޮތީ ދެ ލަނޑުގެ ލީޑުން ކުރީގަ އެވެ. މެޗުގައި ޔުނައިޓެޑުގެ ތިން ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 17 ވަނަ މިނެޓުގައި ޔުނަައިޓެޑަށް ލީޑު ނަގައިދިނީ ކެޕްޓަން ބްރޫނޯ ފެނާންޑޭސް އެވެ. އޭނާ އެ ލަނޑު ޖަހަން ފުރުސަތު ތަނަވަސް ކޮށްދިނީ އަމަދު ޑިއާލޯ އެވެ. އޭގެ ފަހުން ފުރަތަމަ ހާފުގެ 38 ވަނަ މިނެޓުގައި ޔުނައިޓެޑުގެ ދެ ވަނަ ލަނޑަކީ، ލެސްޓަރގެ ވިކްޓޯ ކްރިސްޓިއަންސެން އަތުން ބައި ކޮޅަށް ވަތް ލަނޑެކެވެ. މެޗުގައި ޔުނައިޓެޑުގެ ތިން ވަނަ ލަނޑު، މެޗުގެ ފަހު ދިހަ މިނެޓުގެ ތެރޭގައި ޖެހީ އަލެހާންދްރޯ ގާނާޗޯ އެވެ. އޭނާ އެ ލަނޑު ޖެހީ ފެނާންޑެސް ތަނަވަސްކޮށްދިން ފުރުސަތެއްގަ އެވެ.

މިއީ ވަގުތީ ގޮތުން ޔުނައިޓެޑަށް އިރުޝާދު ދެމުން އައި އެސިސްޓެންޓު ކޯޗު ރޫޑް ވޭން ނިސްޓަލްރޫއީގެ އިރުޝާދުގެ ދަށުން ޔުނައިޓެޑު ކުޅުނު ފަހު މެޗެވެ. ދާދި ފަހުން ޔުނައިޓެޑުގެ ކޯޗަކަށް ހަމަޖެއްސި ޕޯޗުގަލްގެ ރުބެން އަމޯރިމް މި ހަފުތާގެ ތެރޭގައި އެ ޓީމާ ރަސްމީކޮށް ހަވާލު ވާނެ އެވެ.

ލެސްޓަރ އަތުން ހޯދި މޮޅާ އެކު ޔުނައިޓެޑު އޮތީ ލީގު ތާވަލްގެ 13 ވަނަ މަގާމުގަ އެވެ. އެއީ މިހާތަނަށް ކުޅުނު 11 މެޗުން 15 ޕޮއިންޓު ހޯދައިގެންނެވެ. 11 މެޗުގެ ތެރެއިން ޔުނައިޓެޑު މޮޅުވެފައި ވަނީ ހަތަރު މެޗުންނެވެ. ތިން މެޗު އެއްވަރުވެފައިވާއިރު، ހަތަރު މެޗުން ވަނީ ބަލިވެފަ އެވެ.