ސިޔާސީ ވާދަވެރިން ހިފާ ހައްޔަރުކޮށް، ބަދަލު ހިފުމުގެ ރޫހު މިގައުމުން ވާނީ ނައްތާލާފައި: ރައީސް މުއިއްޒު
11 ނޮވެމްބަރު 2024 | ހޯމަ 03:08ރައްޔިތުންނަށް ވެވަޑައިގެންނެވި ވައުދާ އެއްގޮތަށް މަސައްކަތް ކުރަން
ރައީސް މުއިއްޒު ވިދާޅުވެފައި ވަނީ މިސަރުކާރުގައި ރިޔާސީ ކޮމިޝަންތައް ނުހަދާނެ ކަމަށް، އަދި ސިޔާސީ ގޮތުން ކަންކަން ނުކުރާނެ ކަމަށް
ސިޔާސީ ވާދަވެރިން ހިފާ ހައްޔަރުކޮށް، ބަދަލު ހިފުމުގެ ރޫހު މިގައުމުން ނައްތާލާފައިވާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހުގެ ރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ރައީސް މުއިއްޒު ވިދާޅުވީ ރިޔާސީ އިންތިޚާބުގެ ކެންޕޭންގެ ތެރޭގައި ރައްޔިތުންނަށް ވެވަޑައިގެންނެވި ވައުދާ އެއްގޮތަށް މަސައްކަތް ކުރަމުންދާ ކަމަށާއި، މިގައުމުން ބަދަލު ހިފުމުގެ ރޫހު މިހާރު ނައްތާލާފައިވާ ކަމަށެވެ.
ސިޔާސީ ވާދަވެރިއަކަށްވީތީ ގެންގޮސް ހިފާ ހައްޔަރުކޮށް ޖަލަށްލާތަނެއް ނުފެންނާނެކަން ފާހަގަކުރައްވައި ރައީސް މުއިއްޒު ވިދާޅުވީ ސިޔާސީ މީހުންގެ ފަހަތުން ނުދުވާނެ ކަމަށާއި، ކުރިއަށް އޮތްތަނުގައި ވެސް އެމަންޒަރު ނުފެންނާނެ ކަމަށެވެ. އަދި ވިދާޅުވީ ގައުމުގެ ހަމަނުޖެހުން ނަގާނުލާނެ ކަމަށެވެ.
މީގެ އިތުރުން ރައީސް މުއިއްޒު ވިދާޅުވީ މިސަރުކާރުގައި ރިޔާސީ ކޮމިޝަންތައް ނުހަދާނެ ކަމަށާއި، ސިޔާސީ ގޮތުން ކަންކަން ނުކުރާނެ ކަމަށެވެ. ނަމަވެސް ވައްކަން ކޮށްފިކަމަށްވާނަމަ ނުވަތަ ގައުމުގެ މުދާ ނުހައްގުން ހޯދާފައިވާނަމަ އެކަންކަން ބަލާނެ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު ވިދާޅުވީ ރައްޔިތުންގެ ހައްގުގައި މަސައްކަތް ކުރާނެ ކަމަށާއި، ރައްޔިތު މީހާގެ ހައްގަށް އަރާގެނެފައިވާނަމަ އުސޫލުގެ ތެރެއިން ބަލާނެ ކަމަށެވެ. މި ގައުމުގައި މިމިނިވަން މުއައްސަސާތަކާއި، ދުސްތޫރީ ނިޒާމު އަދި ޝަރުއީ ނިޒާމެއް އެބައޮތް ކަމަށާއި، ނިޒާމުގެ ތެރެއިން ކަންކަން ކުރިއަށްދާނެ ކަމަށް ރައީސް މުއިއްޒު ވިދާޅުވިއެވެ.
