އިހަވަންދިއްޕޮޅު ތަރައްޤީ ކުރުމުގެ މަޝްރޫއާ ބެހޭގޮތުން ވަޒީރު ސައީދު ދައްކަވާ ވާހަކަފުޅު ދިމާނުވޭ

އިހަވަންދިއްޕޮޅުގައި ތަރައްޤީކުރާ މޯލްޑިވްސް އިކޮނޮމިކް ގޭޓުވޭ ޕްރޮޖެކްޓުގެ އަމަލީ މަސައްކަތް ކުރިއަށް އޮތް 6 މަސް ދުވަހުގެތެރޭގައި ފެށޭނެ ކަމަށް އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ. ވަޒީރު ސައީދު މިހެން ވިދާޅުވީ އިހަވަންދިއްޕޮޅުގައި ތަރައްޤީކުރާ "މޯލްޑިވްސް އިކޮނޮމިކް ގޭޓުވޭ ޕްރޮޖެކްޓު"ގެ ޕޯޓު ތަރައްޤީކުރުމާއި، މަޝްރޫޢާ ގުޅުންހުރި އިތުރު މަސައްކަތްތައްކުރުމަށް ސިންގަޕޫރުގެ ކެޕިޓަލް އޭޝިއާ އިންވެސްޓުމަންޓު ކުންފުންޏާއެކު ފްރޭމްވޯކް އެއްބަސްވުމެއްގައި ސޮއިކުރުމާއި ގުޅިގެން ސަރުކާރު މީޑިއާ ޕީއެސްއެމް އަށް ދެއްވި ޚާއްސަ އިންޓަރވިއުއެއްގައެވެ.

މި އެއްބަސްވުމާ ބެހޭ ގޮތުން އިކޮނޮމިކް މިނިސްޓްރީން ނެރުނު ނޫސްބަޔާނެއްގައި މިއީ "މޯލްޑިވްސް އިކޮނޮމިކް ގޭޓްވޭ މަޝްރޫއު ކުރިއަށް ގެންދިއުމަށް ސޮއިކުރެވުނު އެއްބަސްވުމެއް،" ކަމަށް ބުނުމުގެ އިތުރުން އެއްބަސްވުމުގައި ހިމެނޭ ކަންކަމާ ބެހޭ ގޮތުން އެއްވެސް މައުލޫމާތެއް ހިމަނާފައެއް ނުވެއެވެ. އަދި ސީއައިއޭ، އިހަވަންދިއްޕޮޅު ޕޯޓު މަޝްރޫއުގައި މަސައްކަތް ކުރުމަށް ހޮވުނު ގޮތުގެ އެއްވެސް މައުލޫމާތެއް ނޫސް ބަޔާނުގައި ހާމަކޮށްފައެއް ނުވެއެވެ.

މި އެއްބަސްވުމާއި ގުޅޭގޮތުން އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވީ ފްރޭމްވޯކް އެގްރިމެންޓުގައި ސޮއިކުރުމާއެކު ކެޕިޓަލް އޭޝިއާ އިންވެސްޓްމަންޓު ކުންފުނީގެ ފަރާތުން މަސައްކަތްކުރިއަށް ގެންދާނެގޮތުގެ ތާވަލެއް އެކުލަވާލާނެ ކަމަށާއި، ތަފްސީލީ އެގްރިމެންޓެއްގައިވެސް ކުރިއަށް އޮތް 6 މަސް ދުވަހުގެތެރޭގައި ސޮއިކުރެވޭނެ ކަމަށެވެ.

ނަމަވެސް ހޮނިހިރު ދުވަހު ސޮއިކުރުމަށް ބޭއްވި ރަސްމިއްޔާތުގައި އެމްއައިޑީއެފްޒެޑްގެ މެނޭޖިންގ ޑިރެކްޓަރ ޝިމާދު ވިދާޅުވީ، ކުރިއަށް އޮތް 6 މަސް ދުވަހުގެ ތެރޭގައި ރަސްމީ އެއްބަސްވުމުގައި ސޮއި ކުރެވޭނެ ކަމަށެވެ. ވީމާ އިހަވަންދިއްޕޮޅުގައި ތަރައްޤީކުރާ މޯލްޑިވްސް އިކޮނޮމިކް ގޭޓުވޭ ޕްރޮޖެކްޓުގެ އަމަލީ މަސައްކަތް ކުރިއަށް އޮތް 6 މަސް ދުވަހުގެތެރޭގައި ފެށޭނެ ކަމަށް ވަޒީރު މުޙައްމަދު ސައީދު މި ދައްކަވާ ވާހަކަފުޅު ދިމާނުވާކަން ފާހަގަ ކުރެވެއެވެ. ރަސްނީ އެއްބަސްވުމުގައި ސޮއިކުރެވޭނީ 6 މަސްދުވަސް ފަހުންކަމަށް ވާއިރު 6 މަސް ދުވަހުގެތެރޭގައި ސޮއިނުކޮށް މަސައްކަތްފެށޭނެ ގޮތަކާމެދު ސުވާލު އެފެދެއެވެ.

ވަޒީރު މުޙައްމަދު ސައީދު އިތުރަށްވިދާޅުވީ " މި މަސައްކަތްތައް އަމަލީގޮތުން ފެށުން، މިއީ 6 މަސްދުވަސް ތެރޭގައި ކުރިއަށްދާނެ ކަންތައްތަކަކީ، ދެން އަމަލީ މަސައްކަތްތައް ފެށުމަށް އެކުންފުނީގެ ޓެކްނިކަލް ބޭފުޅުން އެތަނަށް އައުމާއި، އެކި ކަހަލަ ދިރާސާތައް ކުރުމާއި، މަސައްކަތްތައް ކުރިއަށް ގެންދިޔުމުގައި ގެންދަން ޖެހޭ ހުރިހާ އިންތިޒާމުތަކެއް ކުރިއަށްގެންދާނެ،" ކަމަށެވެ.

"ދައުލަތުން ބާޑަންއެއް ނަގަން ނުޖެހި، ޕްރައިވެޓް ޕަބްލިކް ޕާޓްނާޝިޕް މޮޑެލްގައި ކުރިއަށްގެންދާ އިރުގައި، ކޮންފިޑެންސް ނުވަތަ ޔަޤީންކަން ގެނައުމަކީ ކުރަން ޖެހޭ ކަމެއް ވަރަށް ގިނަ މަސައްކަތްކުރެވިގެން 100 މިލިޔަން ޑޮލަރުގެ މަޝްރޫޢަކާއި ހަމައަށް މިދިޔައީ،" ވަޒީރު ސައީދު ވިދާޅުވިނަމަވެސް މި މަޝްރޫޢުގެ ފައިސާ ހޯދާ ގޮތާއި ކުންފުނީގެ ބައިވެރިވުމުގެ ޝަރުތުތަކެއް ހާމަކޮށްފައެއް ނުވެއެވެ.އަދި ސީއައިއޭ އަށް ލިބޭ މަންފާއެއްވެސް އާންމުކޮށްފައެއް ނުވެއެވެ. ގާބިލު ކުންފުންޏެއްގެ ގޮތުގައި އިކޮނޮމިކް މިނިސްޓްރީން ފާހަގަ ކުރާ ސިއައިއޭގެ ލިންކްޑިން ޕްރޮފައިލް ގައި އެންމެ 205 ފޮލޯވަރުން ހިމެނޭ އިރު، ޕޯޓެއް ތަރައްގީ ކުރުމުގެ އެއްވެސް މަސައްކަތެއް ކޮށްފައިވާ ކަމެއް އެކުންފުނިން ބުނެފައެއް ނުވެއެވެ.