މި ސަރުކާރުގެ ފުރަތަމަ މަޝްރޫއު ކ. ފުށިދިއްގަރުފަޅު ނުވަތަ "ރަސްމާލެ" އަލުން ހިއްކަން ފަށައިފިއެވެ.

އާދިއްތަ ދުވަހު ހައުސިން ޑިވަލޮޕްމެންޓް ކޯޕްރޭޝަން (އެޗްޑީސީ) އިން ބުނީ ފުށިދިއްގަރުފަޅު ހިއްކުމުގެ މަސައްކަތް އަލުން ފަށާފައިވާ ކަމަށާއި، މަސައްކަތް ބާރު ސްޕީޑްގައި ކުރިއަށްދާ ކަމަށެވެ. މިއީ ތަރައްގީއާއި ކުރިއެރުމަށް އެޅިގެންދާ އިތުރު ފިޔަވަޅެއް ކަމަށް އެޗްޑީސީން ބުނެއެވެ.

މިމަސައްކަތްތަކާ ގުޅޭ އިތުރު ތަފްސީލެއް އެޗްޑީސީން ހާމަކޮށްފައިނުވެއެވެ.

މައުލޫމާތު ލިބޭ ގޮތުގައި ފުށިދިއްގަރުފަޅު ހިއްކުމުގެ މަސައްކަތް ހަވާލުކޮށްފައިވަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާއެވެ.

ރަސްމާލޭގެ ނަމުގައި ތަރައްގީކުރާ ފުށިދިއްގަރު ފަޅުން 1153 ހެކްޓަރުގެ ބޮޑު ސަރަހައްދެއް ހިއްކަން ވަނީ ނިންމާފައެވެ.

މި މަޝްރޫއުގެ މަސައްކަތް 18 ޑިސެންބަރު 2023 ގައި ފެށި ނަމަވެސް ކުޑަ ދުވަސްކޮޅެއްގެ ތެރޭގައި މަސައްކަތް ވަނީ ހުއްޓިފައެވެ. އަދި ހިއްކި ސަރަހައްދުން ބޮޑު ބައެއް ގިރައިގެން ގޮސްފައިވާ ކަމަށް މައުލޫމާތު ލިބިފައިވެއެވެ. ނަމަވެސް ސަރުކާރުން ފުރަތަމަ ބުނެފައިވަނީ މަޝްރޫއުގެ މަސައްކަތް ނުހުއްޓޭ ކަމަށާއި، މަސައްކަތް ކުރިއަށްދާ ކަމަށެވެ. ގިނަ ބައެއްގެ ފާޑު ކިޔުން އަމާޒުވެފައިވަނިކޮށް އޭޕްރީލް މަހުގެ ތެރޭގައި ސަރުކާރުގެ މީޑިއާ، ޕީއެސްއެމް އަށް ރައީސް ޑރ.މުހައްމަދު މުއިއްޒު ދެއްވި އިންޓަވިޔުއެއްގައި އެ މަޝްރޫއުގެ މަސައްކަތަށް މަޑު ޖެހުމެއް އައިސްފައިވާ ކަމަށް ވިދާޅުވެފައިވެއެވެ.

މި މަޝްރޫއާއެކު، މާލެސިޓީއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ލިބޭނެ ކަމަށް ރައީސް މުއިއްޒު ވައުދުވެވަޑައިގެންނެވިއެވެ.

ސަރުކާރުން މި މަޝްރޫއު ކުރިއަށް ގެންދަނީ ދައުލަތުގެ ޚަރަދުގައި ނޫން ކަމަށާއި ބިން ހިއްކުމަށް ހުރިހާ ޚަރަދެއް ކުރާނީ ސީއެމްސީސީ އިން ކަމަށް ބުނާއިރު، މަޝްރޫއު ހިންގަނީ ސީއެމްސީސީއަށް ޖުމްލަ 70 ހެކްޓަރުގެ ބިން ދީގެންނެވެ.