ބަޖެޓާއި ބެހޭ ގޮތުން ފިނޭންސް މިނިސްޓަރ ޤާނޫނާއި ޚިލާފުވެފައިވާ ކަމަށް މަޖިލީހުގައި ހިމޭން އިއުތިރާފެއް ވެފައިވޭ - ޒިޔާދު

ބަޖެޓާއި ބެހޭ ގޮތުން ފިނޭންސް މިނިސްޓަރ ޤާނޫނާއި ޚިލާފުވެފައިވާ ކަމަށް މަޖިލީހުގައި ހިމޭން އިއުތިރާފެއް ވެފައިވާކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެއެވެ.

ޒިޔާދު އެފަދައިން ވިދާޅުވީ ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ.

އެ ޕްރޮގްރާމްގައި ވާހަކަދައްކަވަމުން ސަރުކާރުން ބަޖެޓް ހުށަހަޅާފައިވާ ގޮތަށް އޭނާ ވަނީ ފާޑު ވިދާޅުވެފައެވެ. އެގޮތުން އެ ބަޖެޓަކީ އެންމެ އަސާސީ ސިފަތައް ވެސް ފުރިހަމަ ނުވާ ބަޖެޓަކަށް ވުމުން އެއީ ޤާނޫނާއި ޚިލާފު ބަޖެޓެއް ކަމަށް އޭނާ ވަނީ ސިފަކުރައްވާފައެވެ. ބަޖެޓަކީ ހިސާބު އަަދަދެއް ނޫން ކަމަށާއި އެއީ ކަންކަމަށް ކަނޑައެޅޭ އަަދަދުތަކެއް ހިމެނުމުން ކިޔޭ ނަމެއް ކަމަށް އޭނާ ވަނީ ފާހަގަކުރައްވާފައެވެ. މީގެ އިތުރުން ބަޖެޓް ހުށަހެޅުމުގެ ކުރިން ފިނޭންސް މިނިސްޓަރ ބަދަލުކޮށްފައިވާތީ އެކަމަށް ވެސް އޭނާ ވަނީ ފާޑު ވިދާޅުވެފައެވެ. ކުރީގެ ފިނޭންސް މިނިސްޓަރ މުހައްމަދު ޝަފީގް އަކީ މާލީ ކަންކަން އެނގިވަޑައިގަންނަވާ ބޭފުޅެއް ކަމަށާއި ފަހުން ފިނޭންސް މިނިސްޓަރަކަށް އައްޔަން ކުރި މޫސާ ޒަމީރަކީ ފިނޭންސް ދާއިރާގެ ބޭފުޅެއް ނޫން ކަމަށް އޭނާ ވަނީ ވިދާޅުވެފައެވެ. ޒިޔާދު ވިދާޅުވީ އުސޫލާއި ޚިލާފަށް މާލީ ކަންކަން ހިންގުމަކީ އެއްވެސް ސިފައެއްގައި ބަލައިގަނެވޭނެ ކަމެއް ނޫން ކަމަށެވެ. އެކަމުގެ ސަބަބުން ބަޖެޓާއި މެދު ޖަވާބުދާރީކުރުވުމުގެ ފުރުސަތު ގެއްލިގެންދާ ކަމަށް ވެސް ޒިޔާދު ވަނީ ވިދާޅުވެފައެވެ.

އަންނަ އަހަރުގެ ބަޖެޓަކީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ. ބަޖެޓް ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާ ކަމަށެވެ. އޭގެތެރޭގައި ހިމެނެނީ ރިކަރަންޓް ހަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ހަރަދުގެ ގޮތުގައި 13.3 ބިލިޔަން ރުފިޔާއެވެ.

މީގެ އިތުރުން އަންނަ އަހަރުގެ ބަޖެޓުގައި ޕަބްލިކް ސެކްޓަރ އިންވެސްޓްމަންޓު ޕްރޮގްރާމް، ޕީއެސްއައިޕީއަށް ހިނގާނެ ކަމަށް ލަފާކޮށްފައިވަނީ 12.4 ބިލިޔަން ރުފިޔާ ކަމަށް މިނިސްޓަރު ވިދާޅުވިއެވެ. އަދި އަންނަ އަހަރު އާމްދަނީ އާއި ހިލޭ އެހީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު އަންނަ އަހަރަށް ހުށަހަޅަނީ 9.4 ބިލިއަން ރުފިޔާ ޑެފިސިޓް ބަޖެޓެކެވެ.