ޔޮނެކްސް ޕޮލިސް އިންޓަނޭޝަލް ފެސްޓިވަލްގައި ވާދަކޮށް، ރާއްޖޭގެ ޒުވާން ބެޑްމިންޓަން ކުޅުންތެރިޔާ، ލައިބާ އަޙުމަދު މަޚްލޫފް (އެލީ)ގެ ފެށުން ރަނގަޅު ކޮށްފި އެވެ.
ޕޮލެންޑުގައި ކުރިއަށްދާ މުބާރާތުގައި ވާދަކުރަމުން އަންނަ ލައިބާ ވަނީ، މުބާރާތުގެ މިކްސް ޑަބަލްސް އިވެންޓުގެ ސެމީ ފައިނަލް އަދި ސިންގަލްސް އިވެންޓުގެ ގަދަ 16 ވަނަ ބުރުން ޖާގަ ހޯދައިފަ އެވެ.
މިކްސް ޑަބަލްސް އިވެންޓުގެ ސެމީ ފައިނަލްގައި ލައިބާގެ ޕެއާ ޕާޓްނަރަކީ ލިތުއޭނިއާގެ ޖޫލިއުސް ސަގޭލާ އެވެ. މިކްސް ޑަބަލްސް އިވެންޓުގެ ސެމީ ފައިނަލް އިން ލައިބާގެ ޕެއާ ފުރުސަތު ހޯދީ ގުރޫޕް ހަތަރެއްގެ އެއް ވަނަ ޕެއާގެ ގޮތުގަ އެވެ. ގުރޫޕުގައި ކުޅުނު ދެ މެޗުން ވެސް ލައިބާގެ ޕެއާ ވަނީ މޮޅުވެފަ އެވެ. ދެ މެޗު ވެސް ލައިބާގެ ޕެއާ ކާމިޔާބު ކޮށްފައި ވަނީ ސީދާ ދެ ސެޓުންނެވެ.
މުބާރާތުގެ ސިންގަލްސް އިވެންޓުގެ ގަދަ 16 ވަނަ ބުރުން ލައިބާ ޖާގަ ހޯދީ ގުރޫޕް ނުވައެއްގައި ކުޅުނު ތިން މެޗުން ވެސް މޮޅުވެގެންނެވެ. ތިން މެޗު ވެސް ލައިބާ ކާމިޔާބު ކޮށްފައި ވަނީ ސީދާ ދެ ސެޓުންނެވެ.
ބެޑްމިންޓަން ޔޫރަޕުގެ ކަލަންޑަރު މުބާރާތްތަކުގައި ވާދަކޮށް، ލައިބާ އަންނަނީ ރަނގަޅު ކާމިޔާބީތަކެއް ހޯދަމުންނެވެ. އެގޮތުން މިއަހަރުގެ ތެރޭގައި ވެސް ލައިބާ ވަނީ ޖުމުލަ އަށް މެޑަލް ހޯދައިފަ އެވެ.
