ރާއްޖޭގެ ކުރީގެ މަޝްހޫރު ވިޔަފާރިވެރިއެއް ކަމުގައިވާ ކުވާ މުޙައްމަދު ޔޫސުފް ބުދަ ދުވަހު ނިޔާވެއްޖެއެވެ.

އޭނާ ނިޔާވީ، އުމުރުން 75 އަހަރުގައި، ފުއްޕާމޭގެ އާލާސްކަންފުޅަކާ ގުޅިގެން އައިޖީއެމްއެޗްގެ އައިސީޔޫގައި ފަރުވާ ހޯއްދަވަމުން ގެންދަނިކޮށްނެވެ.

ކުވާ މުޙައްމަދު ޔޫސުފަކީ 1970 ގެ އަހަރުތަކުގެ ފަހުކޮޅާއި 1980 ގެ އަހަރުތަކުގެ ކުރީކޮޅުގައި ރާއްޖޭގެ އެންމެ ފާހަގަކޮށްލެވޭ ވިޔަފާރިވެރިންގެ ތެރެއިން ބޭފުޅެކެވެ.

އޭނާ ވަނީ "ކުވާ ޝިޕިންގ" ގެ ނަމުގައި ޝިޕިންގ ލައިނެއް ދިގު މުއްދަތަކަށް ހިންގަވާފައެވެ.

އިޖްތިމާއީ އެހީތެރިކަމުގެ ރޮނގުންވެސް ފާހަގަ ކޮށްލެވޭ މުހައްމަދު ޔޫސުފް ވަނީ ޝިޕިން ލައިން ހިންގެވި ދުވަސްވަރު ސްރީލަންކާއަށް ބޭސްފަރުވާ އަށް ދިޔުމަށް ބޭނުންވާ ގިނަ ދިވެހިންނަށް އެހީތެރިކަން ފޯރުކޮށް ދެއްވާފައެވެ.

ނަމަވެސް، އޭރުގެ ރައީސް މައުމޫނުގެ ވެރިކަމާ އިދިކޮޅު ހަރަކާތެއް ހިންގެވުމުގައި ކެރެފާ ނަސީމާއެކު ބައިވެރިވެވަޑައިގަތުމުގެ ތުހުމަތުގައި ހުކުމްކުރެވި އަރުވާލެވުނެވެ.

މި ހާދިސާއާ ގުޅިގެން އޭނާގެ ވިޔަފާރިތަކަށް ބޮޑެތި ގެއްލުންތަކެއް ލިބި، ފަހުން މާލޭގައި އާދައިގެ ގޮތެއްގައި ވޯކްޝޮޕް ހިންގުމުގެ ވިޔަފާރި ކުރިއަށް ގެންދެވިއެވެ.

ކުވާ މުޙައްމަދު ޔޫސުފްގެ ދަރިކަނބަލުން ކަމުގައިވާ ޑރ. މަރިޔަމް މާރިޔާ މިހާރު ހުންނެވީ ހަޔަރ އެޑިޔުކޭޝަން މިނިސްޓަރުގެ މަޤާމުގައެވެ. އަދި ކުރީގެ ކަސްޓަމްސްގެ ކޮމިޝަނަރ ޖެނެރަލް މާނިއު މުޙައްމަދު ޔޫސުފަކީ ވެސް އޭނާގެ ދަރިކަލެކެވެ.

ކުވާ މުޙައްމަދު ޔޫސުފްގެ މޫނު ދެއްކުމަށް ހަމަޖެހިފައިވަނީ ބުދަ ދުވަހުގެ އަސްރު ނަމާދަށް ފަހު އިސްލާމީ މަރުކަޒު ގައެވެ.

ކަށު ނަމާދު ކުރުމަށް ހަމަޖެހިފައިވަނީ އިޝާ ނަމާދަށްފަހު އިސްލާމީ މަރުކަޒުގައެވެ.