ޖަރުމަނު ސަރުކާރުގެ ބާރުކެނޑި ނޭވާ ހޮޅިއަށް

ޖަރުމަނު ވިލާތުގެ ވެރިކަމުން އަންނަ ކޯލިޝަން ރޫޅި ސަރުކާރުގެ ބާރުކެނޑިއްޖެއެވެ.

ކޯލިޝަންގައި ރެނދުއެޅީ ޗާންސެލަރ އޯލަފް ޝޯލްޒް ސަރުކާރުގެ މުހިންމު މިނިސްޓަރުންތަކެއް މަގާމުން ވަކިކުރެއްވުމުންނެވެ. ކޯލިޝަން ރޫޅުމާއެކު ސަރުކާރަށް ގާނޫނު ހަދާ މަޖިލީހުގައި އޮތް މެޖޯރިޓީ ގެއްލި، ސަރުކާރުގެ އިތުބާރު އޮތްތޯ ބެލުމަށް ވަނީ ވޯޓަކަށް ދާން ޖެހިފައެވެ. ޗާންސެލަރ ވިދާޅުވީ، ސަރުކާރުގެ އިތުބާރު އޮތްތޯ ބެލުމުގެ ވޯޓު ނެގުން އޮންނާނީ އަންނަ އަހަރުގެ ކުރީކޮޅުގައި ކަމަށެވެ.

ކޯލިޝަންގެ ބައިވެރިއެއްގެ ގޮތުގައި ސަރުކާރުގައި ހިމެނޭ މާލީ ވަޒީރު ވަނީ މަގާމުން ވަކި ކުރައްވާފައެވެ. ޗާންސެލަރ ވިދާޅުވީ އޭނާއަށް މާލީ ވަޒީރު ކްރިސްޓިއަން ލިންޑްނަރ އަށް އިތުބާރު ނުކުރެއްވޭ ކަމަށެވެ.

އިއްތިހާދު ރޫޅުމުގެ ސަބަބުން ޝޯލްޒްގެ ސަރުކާރަކީ ޖަރުމަނުގެ ޕާލިމެންޓުގައި އަޣުލަބިއްޔަތު ގެއްލިފައިވާ ސަރުކާރެކެވެ. އިތުބާރު އޮތްކަން ދެނެގަތުމަށް ނަގާ ވޯޓުގެ ނަތީޖާ ނުކުންނަ ގޮތަކުން މާރިޗު މަހާ ހަމައަށް އަވަސް އިންތިޚާބަކަށް ދާން ޖެހުމަކީ އެކަށީގެންވާ ކަމެއް ކަމަށް ރިޕޯޓުތައް ބުނެއެވެ.

އިދިކޮޅު ފަރާތްތަކުން ބުނަނީ އިތުބާރުގެ ވޯޓު ނަގަން ޖެހޭނީ އަންނަ އަހަރު ނޫން ކަމަށާއި، އަންނަ ހަފްތާގައި ކަމަށެވެ.

ކޯލިޝަންގެ އެތެރޭގެ ހަމަ ނުޖެހުންތައް ބޮޑު ވަމުން ގޮސް، އެކުގައި ދެމި ނޯވެވޭނެ ކަން ފާޅުވީ، ބުދަ ދުވަހުގެ ރޭގައެވެ. މައްސަލަ ފެށުނީ 2025 ވަނަ އަހަރުގެ ބަޖެޓާ ގުޅޭގޮތުން އުފެދުނު ޚިޔާލުތަފާތުވުން ތަކުގެ ތެރެއިންނެވެ. އިގްތިސާދަށް ކުރިއެރުމެއް ނުލިބި ޖަރުމަނު ވިލާތުގެ ބަޖެޓު ތައްޔާރުކުރާ މިއީ ވިދިވިދިގެން ދެވަނަ ފަހަރެވެ.

"ޓްރެފިކް ލައިޓް" އިއްތިހާދުގެ ނަމުން މަޝްހޫރުވެފައިވާ އިއްތިހާދު 2021 ވަނަ އަހަރުން ފެށިގެން ޖަރުމަނުގައި އަންނަނީ ވެރިކަން ކުރަމުންނެވެ.

ޓްރެފިކް ލައިޓް އިއްތިހާދުގެ ނަން ކޯލިޝަން އަށް ދެވުނީ، ކޯލިޝަން ގައި ހިމެނޭ ތިން ޕާޓީގެ ވަކިވަކި ކުލަތަކަށް ނިސްބަތްކޮށެވެ. އެއީ ޝޯލްޒްގެ ސޯޝަލް ޑެމޮކްރެޓްސް ޕާޓީގެ ރަތް ކުލަ، މިނިވަން އިގްތިސާދީ ސިޔާސަތައް ތާއީދު ކުރާ އެފްޑީޕީގެ ރީނދޫ ކުލަ އަދި ތިމާވެށްޓަށް އަހަންމިއްޔަތުކަން ދޭ ގްރީންސްގެ ފެހި ކުލައެވެ.

ޝޯލްޒް އިޢުލާނު ކުރައްވާފައި ވަނީ ޖަރުމަނުގެ ޕާލިމެންޓް ކަމުގައިވާ ބުންޑެސްޓާގްގައި ޖެނުއަރީ 15 ގައި އިތުބާރު އޮތްތޯ ބެލުމުގެ ވޯޓު ނެގުމަށެވެ.

މެންބަރުން ސަރުކާރަށް ތާއީދު ނުކޮށްފިނަމަ، މަދު ހަފްތާތަކެއްގެ ތެރޭގައި އައު އިންތިޚާބަކަށް ދާންޖެހޭނެއެވެ. މިހާރު ކަނޑައަޅާފައިވާ ގޮތުން ޖަރުމަނުގައި އާންމު އިންތިޚާބު އޮންނާނީ އަންނަ އަހަރުގެ ސެޕްޓެމްބަރު މަހުގައެވެ.

މިވަގުތު، ޝޯލްޒް އިސްވެ ހުންނަވާނީ އޭނާގެ ސޯޝަލް ޑެމޮކްރެޓްސް އަދި އިއްތިހާދުގައި ދެވަނައަށް އެންމެ ބޮޑު ޕާޓީ ކަމުގައިވާ ގްރީންސް ހިމެނޭ މައިނޯރިޓީ ސަރުކާރެއްގައެވެ.