ޔުވެންޓަސް ސަލާމަތްވީ ވްލާހޮވިޗްގެ ލަނޑުން

ޔުއެފާ ޗެމްޕިއަންސް ލީގުގައި ލީލްއާ ދެކޮޅަށް ކުޅުނު މެޗުން ޔުވެންޓަސް އެއްވަރުވެއްޖެ އެވެ.

ލީލްގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި އެންމެ ފުރަތަމަ ލަނޑު ޖަހައި ކުރި ހޯދީ ލީލް އިންނެވެ. ނަމަވެސް ޔުވެންޓަސް އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ލީލް އަށް ލީޑު ނަގައިދިނީ ޖޮނަތަން ޑޭވިޑު އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އެޑޮން ޒެގްރޯވާ އެވެ. ނަމަވެސް މެޗުގެ ދެ ވަނަ ހާފުގައި ޔުވެންޓަސް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 60 ވަނަ މިނެޓުގައި ޔުވެންޓަސް އަށް ލިބުނު ޕެނަލްޓީ ކާމިޔާބުކޮށް، އެ ލަނޑު ޖަަހައިދިނީ ޑޫސަން ވްލާހޮވިޗް އެވެ.

ނަތީޖާ އާއެކު ޔުވެންޓަސް އޮތީ 10 ވަނައިގަ އެވެ. އެއީ މިހާތަނަށް ކުޅުނު ހަތަރު މެޗުން ހަތް ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ލީލް އަށް ވެސް ހަތް ޕޮއިންޓު ލިބޭއިރު، އެ ޓީމު އޮތީ 12 ވަނައިގަ އެވެ.