ވެނެޒިއާ ބަލިކޮށް އިންޓަ ދެ ވަނައިގައި

އިޓާލިއަން ލީގުގައި ވެނެޒިއާއާ ދެކޮޅަށް ކުޅުނު މެޗުން ހޯދި މުހިންމު މޮޅާއެކު، އެންމެ ފަހުގެ ޗެމްޕިއަން އިންޓަ މިލާން ދެ ވަނަ އަށް ޖެހިލައިފި އެވެ.

އިންޓަގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. އެއީ މެޗުގެ ދެ ވަނަ ހާފުގައި އިންޓަ އިން ޖެހި ލަނޑުންނެވެ.

މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި އިންޓަގެ ހެންރިކް މިިކިތާރްޔަން ލަނޑެއް ޖެހި ނަމަވެސް، ވީޑިއޯ އެސިސްޓެންޓު ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. އޭގެ ފަހުން މެޗުގެ 65 ވަނަ މިނެޓުގައި އިންޓަގެ ލަނޑު ޖެހީ އާޖެންޓީނާގެ ލައުޓާރޯ މާާޓިނޭޒް އެވެ. އޭނާ އެ ލަނޑު ޖެހީ ފެޑެރިކޯ ޑިމާކޯ ތަނަވަސްކޮށްދިން ފުރުސަތެއްގަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ވެނެޒިއާގެ މަރިން ސްވާކޯ ލަނޑެއް ޖެހި ނަމަވެސް، ވީއޭއާރުން ވަނީ އެ ލަނޑު ބަަލައި ނުގަންނަން ނިންމައިފަ އެވެ.

އިޓާލިއަން ލީގުގައި އެޓަލަންޓާއާ ދެކޮޅަށް ކުޅުނު މެޗުން ބަލިވެ، ނަޕޯލީ އަށް ވަނީ އެއް ވަނައިގައި ލީޑު ފުޅާ ކުރުމުގެ ފުރުސަަތު ގެއްލިފަ އެވެ. ނަޕޯލީގެ އަމިއްލަ ދަނޑުގައި ކުޅުނު މެޗު އެޓަލަންޓާ އިން ކާމިޔާބު ކުރީ 3-0 އިންނެވެ. މެޗުގައި އެޓަލަންޓާގެ ލަނޑުތައް ޖެހީ އަޑެމޯލާ ލުކްމަން އަދި މަޓެއޯ ރެޓެގީ އެވެ. ލުކްމަން ވަނީ މެޗުގައި ދެ ލަނޑު ޖަހައިފަ އެވެ.

ނަތީޖާ އާއެކު ނަޕޯލީ އެއް ވަނައިގައި އޮތީ މިހާތަނަށް ކުޅުނު 11 މެޗުން 25 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އިންޓަ އަށް ލިބެނީ 24 ޕޮއިންޓެވެ.