އިޒްރޭލުން ވޭތުވެދިޔަ 48 ގަޑީއިރުގެ ތެރޭގައި ފަލަސްތީނުގެ 50ށް ވުރެ ގިނަ ކުޑަކުދިން މަރާލައިފި

ވޭތުވެދިޔަ 48 ގަޑީއިރުގެ ތެރޭގައި އިޒްރޭލުން ޣައްޒާގެ 50ށް ވުރެ ގިނަ ކުޑަކުދިން މަރާލައިފި ކަމަށް އދ އިން ބުނެފިއެވެ.

ފަލަސްތީނުގައި ޔަހޫދީ ވެރިކަމުން ހިންގާ ގަތުލުއާންމު ކުށްވެރިކޮށް އދ އިން ބުނެފައިވަނީ ވޭތުވެދިޔަ 48 ގަޑީއިރުގެ ތެރޭގައި އުތުރު ޣައްޒާގެ ޖަބާލިޔާގައި އެކަނިވެސް 50ށް ވުރެ ގިނަ ކުޑަކުދިން މަރުވެފައިވާ ކަމަށެވެ.

މީގެ އިތުރުން، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފައިވާ ގޮތުގައި ޣައްޒާ ސިޓީގައި ހުރި ޕޯލިއޯ ވެކްސިން ދޭ މަރުކަޒަކަށްވެސް އިޒްރޭލުން ބޮން އަޅާ 4 ކުޑަކުދިން މަރާލާފައިވެއެވެ.

އުތުރު ޣައްޒާގައި ހުންނަ ޝެއިޚް ރަޟްވާން ޕްރައިމަރީ ހެލްތް ކެއަރ ސެންޓަރަށް ހަމަލާއެއް ދެވުނު. މި ހަމަލާ ދެވުނީ މައިންބަފައިން އެމީހުންގެ ދަރިންނަށް ފޯލިއޯ ވެކްސިން ޖެހުމަށް ގެންދިޔަ ވަގުތު. މި ސަރަޙައްދަކީ ވެކްސިން ޕްރޮގްރާމް ކުރިއަށް ގެންދިއުމަށްޓަކައި ވަގުތީގޮތުން އިންސާނީ ހަމަލާދިނުން ހުއްޓުމަށް އެއްބަސްވެފައިވާ ސަރަޙައްދެއް. މިހަމަލާގައި 6 މީހުން ޒަޚަމްވި. އޭގެ ތެރޭގައި 4 ކުޑަކުދިން ހިމެނޭ،" ޑަބްލިއު.އެޗް.އޯގެ ވެރިޔާ ޓެޑްރޮސް އަދަނޮމް ގެބްރެއިސަސް ވިދާޅުވިއެވެ.

2023 އޮކްޓޫބަރު 7ން ފެށިގެން ޣައްޒާގައި އިޒްރޭލުން ހިންގަމުންދާ ގަތުލުއާންމުގައި މަދުވެގެން 43،314 ފަލަސްތީނު މީހުން މަރުވެ، 102،019 މީހުން ވަނީ ޒަޚަމްވެފައެވެ. ހަމައެހެންމެ، ހަމާސްގެ ހަމަލާތަކުގައި އިޒްރޭލުގެ 1،139 މީހުން މަރުވެ، 200ށްވުރެ ގިނަ މީހުން ހައްޔަރުކުރެވުނު ކަމަށް ލަފާކުރެވެއެވެ.

ލުބުނާނުގެ ސިއްޙީ ވުޒާރާއިން ބުނާގޮތުގައި ޣައްޒާ ހަނގުރާމަ ފެށުނީއްސުރެ ލުބުނާނަށް އިޒްރޭލުން ދޭ ހަމަލާތަކުގައި މަދުވެގެން 2،968 މީހުން މަރުވެ، 13،319 މީހުން ވަނީ ޒަޚަމްވެފައެވެ.