އަމޯރިމް ޔުނައިޓެޑާ ހަވާލުވީ ފައިސާ އަކަށް ނޫން!

މެންޗެސްޓަރ ޔުނައިޓެޑުގެ ކޯޗުކަމާ ހަވާލުވީ ފައިސާ އަށް ނޫން ކަމަށް، ޕޯޗުގަލްގެ ރުބެން އަމޯރިމް ބުނެފި އެވެ.

ޔުނައިޓެޑުގެ ކޯޗުކަމުގެ މަގާމު ހުސްވީ އެންމެ ފަހުން އެ މަގާމުގައި ހުރި ނެދަލެންޑްސްގެ އެރިކް ޓެން ހާގް މަގާމުން ވަކި ކުރުމުންނެވެ. މިދިޔަ ހަފުތާގެ ހޯމަ ދުވަހު ޔުނައިޓެޑުން ވަނީ އެ ޓީމުގެ ކޯޗުކަމުން ޓެން ހާގް ވަކިކޮށްފަ އެވެ. ޔުނައިޓެޑުގެ ދާއިމީ ކޯޗަކަށް އަމޯރިމް ހަމަޖެއްސުމާ ހަމައަށް ވަގުތީ ގޮތުން އެ ޓީމަށް އިރުޝާދު ދެމުން އައީ އެސިސްޓެންޓް ކޯޗު ރުޑް ވެން ނިސްޓަލްރޫއި އެވެ.

ޔުނައިޓެޑުގެ ކޯޗަކަށް އަމޯރިމް ހަމަޖައްސާފައި ވަނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2017 ވަނަ އަހަރުގެ ޖޫން މަހުގެ ނިޔަލަށް، އޭނާ އެ ކުލަބަށް އިރުޝާދު ދޭނެ އެވެ. ޔުނައިޓެޑުގެ ކޯޗުކަމުގެ މަގާމާ ރަސްމީކޮށް އަމޯރިމް ހަވާލުވާނީ ނޮވެމްބަރު މަހުގެ 11 ވަނަ ދުވަހު އެވެ.

ޔުނައިޓެޑަށް ބަދަލުވުމާ ގުޅޭ ގޮތުން ވާހަކަ ދައްކަމުން އަމޯރިމް ބުނީ، އޭނާ ޔުނައިޓެޑަށް ބަދަލުވީ ފައިސާ ބޭނުންވެގެން ކަމަށް ބުނެ ބައެއް މީހުން ވާހަކަ ދައްކަމުން އަންނަ ކަމަށެވެ. އެހެން ނަމަވެސް، އެއީ ހަގީގަތެއް ނޫން ކަމަށް އަމޯރިމް ބުންޏެވެ. އޭނާ ބުނީ ޔުނައިޓެޑު ނޫން އެހެން ކުލަބުތަކުން ވެސް ހުށަހެޅުން ލިބުނު ކަމަށާއި، އެމީހުން ތިބީ ތިން ގުނަ ބޮޑު މުސާރަ ދޭން ވެސް ތައްޔާރަށް ކަމަށެވެ. އެހެން ނަމަވެސް، އެކަމާ އޭނާ ދެކޮޅު ހަދާފައިވާކަން އަމޯރިމް ފާހަގަ ކުރި އެވެ. އޭނާ ބުނީ ޔުނައިޓެޑަކީ އޭނާ ބޭނުންވި ކުލަބު ކަމަށާއި، އެ ކުލަބަށް ބަދަލުވީ އެ ސަބަބާ ހުރެ ކަމަށެވެ.

މިވަގުތު ޔުނައިޓެޑު އޮތް ޙާލަތަށް އިޝާރާތް ކުރަމުން އަމޯރިމް ބުނީ، ކޮންމެ ކުލަބަކަށް ވެސް ދަތި ދުވަސްތަކާއި، އުފާވެރި ދުވަސްތައް ކުރިމަތިވާނެ ކަމަށެވެ. މިވަގުތު ޔުނައިޓެޑު ދަތި ހިސާބެއްގައި އޮތަސް، ޔުނައިޓެޑާ އޭނާ ހަވާލުވީ މަސައްކަތްތަކެއްކޮށް، އެ ކުލަބު އަލުން ރަނގަޅު ހިސާބަކަށް ގެންދިޔުމަށް ކަމަށް ވެސް އަމޯރިމް ބުންޏެވެ.

މީގެ ކުރިމް ބެންފީކާ އަދި ޕޯޗުގަލް ޤައުމީ ޓީމަށް ވެސް ކުޅެފައިވާ އަމޯރިމް ކޯޗިންގެ ކެރިއަރު ފެށީ 2018 ވަނަ އަހަރު އެވެ. އޭގެ ފަހުން ޔުނައިޓެޑު ވެގެން ދާނީ އަމޯރިން އިރުޝާދު ދޭނެ ހަތަރު ވަނަ ކުލަބަށެވެ. އޭނާގެ އިރުޝާދުގެ ދަށުން ސްޕޯޓިން ވަނީ 229 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ 162 މެޗުންނެވެ. 34 މެޗު އެއްވަރުވެފައިވާއިރު، 33 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ސްޕޯޓިން ވަނީ ފަސް ތައްޓެއް ވެސް ކާމިޔާބު ކޮށްފަ އެވެ.