ވައްޑޭ ޝަރުތުތަކަކާއެކު ދޫކޮށްލައިފި
ވަހީދު ދޫކޮށްލީ ޝަރުތުތަކަކާއިއެކު
މުހައްމަދު ވަހީދު
ތުލުސްދޫ ދާއިރާގެ މެންބަރު މުހައްމަދު ވަހީދު އިބުރާހިމް ޝަރުތުތަކަކާއެކު ބަންދުން ދޫކޮށްލައިފިއެވެ.
ބަންދުގެ މުއްދަތު ހަތަރު ވަނަ ފަހަރަށް އިތުރުކުރުމަށް ބުރާސްފަތި ދުވަހު މެމްބަރު ވަހީދު ކްރިމިނަލް ކޯޓަށް ހާޒިރުކުރުމުން، ފަނޑިޔާރު އަލީ އިބްރާހިމް ނިންމެވީ ފުލުހުންނާއި ޕީޖީގެ ވަކީލުން ދެއްކި ވާހަކަތަކުން ވަހީދު ބަންދުގައި ބަހައްޓަން ޖެހޭ އިތުރު ސަބަބެއް ނެތް ކަމަށެވެ.
ޖުލައި 24 ވަނަ ދުވަހު މަޖިލީހުގެ އިދާރާއަށް ވަދެވަޑައިގެންނެވި ކަމަށް ތުހްމަތުކޮށް، ވަހީދު ހައްޔަރުކުރީ އެރޭ، ޖުމްހޫރީގެ ޕާޓީގެ ޖަގަހަ، މ. ކުނޫޒު ކައިރިންނެވެ. އެއަށް ފަހު ތިން ފަހަރަށް ބަންދުގެ މުއްދަތު އިތުރުކޮށްފައިވެ އެވެ.
މެމްބަރު ވަހީދުގެ މައްޗަށް ޕީޖީ އޮފީހުން ތިން ދައުވާއެއް ބުދަ ދުވަހު އުފުލާފައިވާއިރު، މުއްދަތު ޖެހުމުގެ މަޖިލީހުގައި ފުލުހުން އެދުނީ ތިން ދައުވާގެ ޝަރީއަތް ނިމެންދެން މެމްބަރު ވަހީދު ބަންދުގައި ބަހައްޓައި ދިނުމަށެވެ. ނަމަވެސް ބަންދުގެ މުއްދަތު އިތުރު ނުކޮށް، ފަނޑިޔާރު އަލީ އިބްރާހިމް ނިންމެވީ ދެ ޝަރުތަކާއެކު އޭނާ ބަންދުން ދޫކޮށްލުމަށެވެ. އެ ދެ ޝަރުތަކީ ގާނޫނާއި ހިލާފު ކަމެއް ނުކުމާއި ޝަރީއަށް އެއްބާރުލުން ދެއްވުމެވެ.
މެމްބަރު ވަހީދުގެ މައްޗަށް އުފުލާފައިވާ ދައުވާތަކަކީ އާންމު މަސްލަހަތު ނަގާލުމާއި، ގާނާނު ތަންފާޒި ކުރާ މުވައްޒަފެއްގެ ވާޖިބަށް ހުރަސް އެޅުން އަދި އަދުލް އިންސާފު ގާއިމުކުރަން ހުރަސް އެޅުމެވެ. މި ތިން ދައުވާ ސާބިތުވެއްޖެ ނަމަ، އެންމެ ގިނަ ވެގެން ވެސް އަންނާނީ ހަތް މަސް ދުވަހުގެ ޖަލު ހުކުމެކެވެ.
ދައުވާ ސާބިތުވެ، މިވަރުގެ ހުކުމެއް އަންނައިރު، ޝަރީއަތް ނިމެންދެން މެމްބަރު ވަހީދު ބަންދުގައި ބަހައްޓަން ނުޖެހޭ ކަމަށް ފަނޑިޔާރު އަލީ އިބްރާހިމް ނިންމެވި އެވެ. މެމްބަރު ވަހީދު ހައްޔަރުކޮށް ދައުވާ އުފުލީ، މަޖިލިހުގެ މެމްބަރުކަމުގެ ހައިސިއްޔަތު ގެއްލިފައިވާ ކަމަށް ކަނޑައަޅާފައި ވަނިކޮށް ޖުލައި 24 ވަނަ ދުވަހު މަޖިލީހުގެ އިދާރާއަށް ވަޑައިވަޑައިގެންނެވި މައްސަލައިގަ އެވެ. މިހާތަނަށް ވެސް ވަހީދުގެ ގޮނޑި ގެއްލިފައިވާކަން އޭނާ އަށް ރަސްމީ އެއްވެސް ފަރާތަކުން އަންގާފައި ނެތްއިރު، ގޮނޑި ގެއްލުވާލި މައްސަލަ ވަނީ ސުޕްރީމް ކޯޓަށް ހުށަހަޅައިފަ އެވެ. މިހާރު އޮތީ އެ މައްސަލައިގެ ހުކުމް އިއްވުމެވެ.
