އިރާނުން އިރާގުގެ ސަރަޙައްދު ބޭނުން ކޮށްގެން އިޒްރޭލަށް ޙަމަލާއެއް ދޭން ތައްޔާރު ވަމުން ދާކަމަށް އިޒްރޭލަށް ޖާސޫސީ މައުލޫމާތު ލިބިއްޖެ ކަމަށް ރިޕޯޓްތައް ބުނެފިއެވެ.

އަދި މި ޙަމަލާ ނޮވެމްބަރު 5 ގައި އޮންނަ އެމެރިކާގެ ރިޔާސީ އިންތިޚާބު ގެ ކުރިން ދީފާނެ ކަމަށް އެކްސިއޯސް އިން ބުރާސްފަތި ދުވަހު ރިޕޯޓުކޮށްފައިވެއެވެ.

މި ނޫހުން މި ޚަބަރު ޖަހާފައިވަނީ ނަން ހާމަ ނުކުރާ އިޒްރޭލުގެ ދެ މަސްދަރަކާ ހަވާދީއެވެ.

އީރާނުން ރާވާ ޙަމަލާގައި ގިނަ އަދަދެއްގެ ޑްރޯންތަކާއި ބެލިސްޓިކް މިސައިލްތައް ބޭނުން ކޮށްފާނެ ކަމަށް ބެލޭ ކަމަށް ވެސް އެކްސިއޯސްގެ ރިޕޯޓުގައި އިތުރަށް ބަޔާންކޮށްފައިވެއެވެ.

ރިޕޯޓުގައި ބުނެފައިވާ ގޮތުގައި އީރާނުން ހަމަލާ ދިނުމަށް މަސައްކަތް ކުރަނީ އިރާގުގައި ތިބި އީރާނަށް ވަފާތެރި ހަނގުރާމަވެރި ޖަމާއަތްތައް މެދުވެރިކޮށް ކަމުގައެވެ.

އިރާގުގައި ތިބި އީރާނަށް މަދަދުވެރިވާ ހަނގުރާމަވެރި ޖަމާއަތްތައް މެދުވެރިކޮށް މި ޙަމަލާ ދިނުމަކީ، އިރާނުގެ މުހިންމު ތަންތަނަށް އިޒްރޭލުން އިތުރު ޙަމަލާއެއް ދިނުން ހުއްޓުވުމަށް އިރާނުން ކުރާ މަސައްކަތެއް ކަމަށް ވެދާނެކަމަށް މި ރިޕޯޓުގައި ބުނެފައިވެއެވެ.