ކުރީގެ ނައިބު ރައީސް އަހުމަދު އަދީބާއި، ޕީޕީއެމްގެ މިހާރުގެ ނައިބު ލީޑަރު އަބއްރަހީމް އަބްދުﷲއާ ދެ ބޭފުޅުން ދައްކަވާފައިވާ ކަމަށް ވާހަކަތަކެއް ކަމަށް ބެލެވޭ އޯޑިއޯ ލީކްވެފައިވާއިރު އެ އޯޑިއޯގައި ވަނީ އަބްދުއްރަހީމް އަޑު ނޫން ކަމަށް ވިދާޅުވާން އޭނާ އިންކާރުކުރައްވައިފި އެވެ.
ރާއްޖެޓީވީން ކުރި ސުވާލަކަށް ޖަވާބު ދެއްވަމުން އަބްދުއްރަހީމް ވިދާޅުވީ، އޯޑިއޯގައި ހިމެނެނީ ކާކުގެ އަޑެއްކަން އޯޑިއޯ ލީކްކުރި ބަޔަކަށް އެނގޭނެ ކަމަށެވެ. އަދި ކުރިއަށް އޮތްތަނުގައި އެފަދަ އެތަށް އޯޑިއޯއެއް ލީކްވާނެ ކަމަށް އަބްދުއްރަހީމް ވިދާޅުވި އެވެ. އެކަމުގައި އެއްވެސް ފަރުވާލެއް، އަދި ޖެހިލުމެއް ވެސް ނުވާ ކަމަށް އަބްދުއްރަހީމް ވިދާޅުވި އެވެ.
އެ އޯޑިއޯގައި ހިމެނެނީ އަބްދުއްރަހީމްގެ އަޑުތޯ ތަކުރާރުކޮށް ސުވާލުކުރުމުން ވެސް އެ ސުވާލަށް ޖަވާބު ނުދެއްވާ އަބްދުއްރަހީމް ވިދާޅުވި، އެކަން އެނގޭނީ އޯޑިއޯއެއް ލީކްކުރި ބަޔަކަށް ކަމަށެވެ.
"އަޅުގަނޑު މި ދަންނަވަނީ އެ ލީކްކުރި ބަޔަކަށޭ އެންމެ ރަނގަޅަށް އެނގޭނީ ކާކުގެ އަޑުކަމެއް. އެއީ އެކަމުގައި އަޅުގަނޑުދޭން އޮތް ޖަވާބު. އަޅުގަނޑު މި ދަންނަވަނީ ވަރަށް ސާފުކޮށް ކުރިއަށް އޮތްތަނުގައިވެސް އެފަދަ އެތަށް އޯޑިއޯއެއް ނުކުންނާނެއޭ." އަބްދުއްރަހީމް ވިދާޅުވި އެވެ.
ގާތްގަނޑަކަށް އެއް މިނެޓް ތިރީސް ސިކުންތުގެ އެ އޯޑިއޯއަކީ އަދީބާއި އަބްދުއްރަހީމްއާ ދެމެދު ކުރެވުނު ފޯނު ކޯލެއް ކަމަށް ބެލެވެއެވެ.
އޯޑިއޯ ފަށައިގަންނަ އިރު، އިވެނީ ސައިކަލު ބުރަކަށް އަދީބު ނިކުމެވަޑައިގެންނެވުމާ ގުޅޭ ގޮތުން ދެބޭފުޅުންގެ މެދުގައި ދައްކާ ވާހަކަ އެވެ. އެގޮތުން "ސައިކަލަކަށް އަރައިގެން ނިކުތީ ދޯ" އޭ އަބްދުއްރަހީމް ވިދާޅުވުމުން، ފްރޮންޓްލައިންގައި ތިބޭ މީހުން ނިކުންނަންޖެހޭ ކަމަށް އަދީބު ވިދާޅުވެއެވެ.
އެއަށްފަހު ދާއިރާގެ ކަންތައްތަކާ ގުޅޭ ގޮތުން ދެ ބޭފުޅުން ވާހަކަ ދައްކަވަ އެވެ. ދާއިރާ ކިހިނެއްތޯ އަދީބު ސުވާލު ކުރައްވަ އެވެ. އަދި "މައްސޫދު" ކިޔާ މީހަކު "ބަނޑަހަ ޖަހައިގެން ތިތާ އެބަހުރި ދޯ" އޭ އަދީބު ސުވާލުކުރައްވަ އެވެ.
"މައްސޫދާ" ގުޅޭ ގޮތުން އަބްދުއްރަހީމް ވިދާޅުވެފައި ވަނީ "މައްސޫދު" އެބަހުރި ކަމަށާއި "އެމީހުން ކުލަ އާއި ހުރިހާ ސާމާނުތަކެއް މިތަނަށް އަޅާލާފައި" އެބަހުރި ކަމަށެވެ. އަދި ވަކިވަކި ފަރުދުންނަށް "ކުދި ކުދި އެއްޗެހި ވައްޓާލައިގެން" ކަންކަން ކުރަނީ ކަމަށް އަބްދުއްރަހީމް ވިދާޅުވެ އެވެ.
އެއަށްފަހު "މުޅި އެތި ފުނޑާލެވޭނެތޯ" އަދީބު ސުވާލުކުރައްވަ އެވެ. އަބްދުއްރަހީމް ވިދާޅުވި "ފުނޑާލެވޭނެ" ކަމަށާއި އެހެން ނަމަވެސް ދެ ދުވަސް "މިތަނުގައި" ހުންނަން ޖެހިދާނެ ކަމަށެވެ. "މިހާރަކު ނޫން މިރޭ މަ ދާނަން، ތިކޮޅަށް ގޮސްފަ ބޮޑު ޖަލްސާ ކަންތައް ކޮށްލާފަ، ދެ ދުވަހެއް ވަރު" އަބްދުއްރަހީމް ވިދާޅުވެއެވެ.
އަބްދުއްރަހީމް ވިދާޅުވެފައި ވަނީ "ނަގަންޖެހޭ" ވަރަށް ވަރުގަދަ ދެ އާއިލާއެއް އެބައުޅޭ ކަމަށެވެ. އެގޮތުން އެއީ "އަބްދުﷲ" އަކާއި "މޫސައިދީ" ކިޔާ މީހެއް ކަމަށް އޭނާ ވިދާޅުވެއެވެ.