ނިސްޓަލްރޫއި ހުރީ ޔުނައިޓެޑަށް އެހީތެރިވާން ތައްޔާރަށް

މިވަގުތު މެންޗެސްޓަރ ޔުނައިޓެޑު އޮތީ ވަރަށް ދަތި އުނދަގޫ ޙާލަތެއްގައި ކަމަށާއި، ކުލަބަށް އެހީތެރިވުމަށް ފުރިހަމަ އަށް ތައްޔާރަށް ހުރި ކަމަށް އެ ކުލަބުގެ ވަގުތީ ކޯޗު ރޫޑް ވެން ނިސްޓަލްރޫއި ބުނެފި އެވެ.

މިދިޔަ ހަފުތާާގެ ތެރޭގައި ޔުނައިޓެޑުން ވަނީ އެ ޓީމުގެ ކޯޗުކަމުގެ މަޤާމުން ނެދަލެންޑްސްގެ އެރިކް ޓެން ހާގް ވަކިކޮށްފަ އެވެ. އެއީ އޭނާގެ އިރުޝާދުގެ ދަށުން މި ސީޒަންގައި ޔުނައިޓެޑުގެ ނަތީޖާތައް ވަރަށް ބޮޑަށް ދަށްވެފައި ވުމުންނެވެ. އޭގެ ފަހުން ޔުނައިޓެޑުން ދާއިމީ ކޯޗެއް ހޯދުމާ ހަމައަށް، ވަގުތީ ކޯޗަކަށް ހަމަޖެއްސީ އެސިސްޓެންޓު ކޯޗުގެ ގޮތުގައި ހުރި ނިސްޓަލްރޫއި އެވެ. ޔުނައިޓެޑުން ދާއިމީ ކޯޗެެއް ހޯދުމުގެ މަސައްކަތްގެ ތެރެއިން މިހާރު ވަނީ ސްޕޯޓިން ގައި ހުރި ރުބެން އަމޯރިމް ގެނެސްފަ އެވެ.

ނިސްޓަލްރޫއިގެ އިރުޝާދުގެ ދަށުން ޔުނައިޓެޑު ކުޅުނު ފުރަތަމަ މެޗަކީ ކަރަބޯ ކަޕްގައި ލެސްޓާ ސިޓީއާ ދެކޮޅަށް ކުޅުނު މެޗެވެ. އެ މެޗުން މޮޅުވެ ޔުނައިޓެޑު ވަނީ މުބާރާތުގެ ކުއާޓާ ފައިނަލްގެ ފުރުސަތު ހޯދައިފަ އެވެ. އެ މެޗަށްފަހު ވާހަކަ ދައްކަމުން ނިސްޓަލްރޫއި ބުނީ، ޔުނައިޓެޑު އޮތީ ދަތި ޙާލަތެއްގައި ކަަމަށެވެ. އަދި މިއީ އެއްވެސް މީހަކު ކުލަބު އޮންނަން ބޭނުންވި ހިސާބު ނޫން ކަމަށާއި، އެއްވެސް މީހަކު ދެކެން ބޭނުންވި ދުވަހެއް ނޫން ކަމަށް ވެސް އޭނާ ބުންޏެވެ. ޔުނައިޓެޑުގައި އޭނާ ހުރީ އެ ކުލަބަށް އެހީތެރިވާން ބޭނުން ވެގެން ކަމަށް ވެސް ނިސްޓަލްރޫއި ވަނީ ބުނެފަ އެވެ.

މީގެ އިތުރުން އޭނާ ބުނީ ޔުނައިޓެޑުން ދާއިމީ ކޯޗެއް ހޯދި ނަމަވެސް، ކުލަބުގައި ހުންނަން އޭނާ ބޭނުންވާ ކަމަށެވެ. އެހެންކަމުން އައު ކޯޗު އައުމާއެކު ވެސް، އޭނާ ކުރިން ހުރި އެސިސްޓެންޓު ކޯޗުކަމުގެ މަޤާމުގައި މި ސީޒަންގައި ވެސް އަދި ކުރިއަށް އޮތް ސީޒަންގައި ވެސް ހުންނާނެ ކަމަށް ނިސްޓަލްރޫއި ބުންޏެވެ. އެސިސްޓެންޓު ކޯޗެއްގެ ގޮތުގައި ޔުނައިޓެޑަށް އައީ ކުލަބަށް އެހީތެރިވުމަށް ކަަމަށާއި، އެކަން ކުރުމުގައި ދެމި ހުންނަން ހިތްވަރު ލިބިފައިވާ ކަމަށް ވެސް އޭނާ ވަނީ ބުނެފަ އެވެ.