އިންޑިއާ ސިފައިންނާ އެކު ދިވެހި ސިފައިން ތަމްރީނުތައް ފަށައިފި
30 އޮކްޓޯބަރު 2024 | ބުދަ 16:28އިންޑިއާގެ ހައިކޮމިޝަނުން ބުނެފައިވަނީ މި ތަމްރީނުގެ ސަބަބުން ދެގައުމުގެ ގުޅުން އިތުރަށް ބަދަހިވާނޭ ކަމަށް
އިންޑިއާ އާއި ގުޅިގެން ބާއްވާ "އެކަތަ" ތަމްރީނު ތަކުގެ 7 ވަނަ ބުރު ފެށުމުގެ ރަސްމިއްޔާތުގެ ތެރެއިން
އިންޑިއާ ސިފައިންނާ ގުޅިގެން ދިވެހި ސިފައިން އަސްކަރީ ތަމްރީން ތަކެއް ފަށައިފި ކަމަށް ރާއްޖޭގައި ހުންނަ އިންޑިއާގެ ހައި ކޮމިޝަނުން ހާމަ ކޮށްފިއެވެ.
ހައިކޮމިޝަނުން އެކްސް ގައި ކޮށްފައިވާ ޕޯސްޓެއްގައި ބުނެފައިވަނީ "އެކަތަ" އިގެ ހަތްވަނަ ބުރުގެ ތަމްރީންތައް ފަށާފައިވާ ކަމަށާއި ކަނޑުގެ ސަރަހައްދު ބެލެހެއްޓުމުގައި ކުރިމަތިވާ ގޮންޖެހުންތައް ހައްލު ކުރުމުގައި މި ތަމްރީންތަކުގެ ސަބަބުން ދެ ގައުމުގެ ގުޅުން ބަދަހިވެގެންދާނެ ކަމުގައެވެ.
އިންޑިއާ ހައިކޮމިޝަނުގެ ޕޯސްޓުގައި މި ތަމްރީނުތައް ފެށުމުގެ ރަސްމިއްޔާތުގެ ފޮޓޯގެ އިތުރުން އިންޑިއާ ސިފައިންނާއި ދިވެހި ސިފައިން ގިނަ އަދަދަކަށް އެކުގައި ތިބި އިތުރު ފޮޓޯތައްވެސް ހިމަނާފައިވެއެވެ.
"އިންޑިއާ އައުޓް" ނަމުގައި ރާއްޖޭގައި އިންޑިއާ އާ ދެކޮޅަށް ހިންގި ބޮޑު ކެމްޕޭންގެ އިސް ސަފުގައި އުޅުއްވުމަށްފަހު ރައީސް ކަމަށް ވަޑައިގެންނެވި ޑރ. މުއިއްޒު ގެންދަވަނީ އަސްކަރީ ގޮތުންވެސް އިންޑިއާ އާއެކު ގުޅުން ބަދަހި ކުރައްވަމުންނެވެ.
މިމަހުގެ ކުރީކޮޅު މުއިއްޒު އިންޑިއާ އަށް ކުރެއްވި ރަސްމީ ދަތުރުފުޅުގައި އިންޑިއާ އެކު ވަނީ އިގްތިސާދީ އަދި މެރިޓައިމް ސެކިއުރިޓީ އާ ބެހޭ ވިޝަން ސްޓޭޓްމަންޓެއް ނެރެފައެވެ. އޭގެ އިތުރުން ރާއްޖޭގެ ކޯސްޓް ގާޑުގެ އުޅަނދު ހުރަވީގެ މަރާމާތު ކުރުމުގެ މަސައްކަތް ކުރުމަށް އިންޑިއާއިން ދިވެހިރާއްޖެއަށް އެހީތެރިވުމަށް އެއްބަސްވުމެއްގައި ސޮއިކޮށްފައިވެއެވެ.
