ރައީސް މުއިއްޒު ލަންކާ އަށް ދަތުރުފުޅެއް ކުރައްވަން ޝައުގުވެރިކަން ފާޅު ކުރައްވައިފި
30 އޮކްޓޯބަރު 2024 | ބުދަ 13:16ދަތުރުފުޅު ކުރައްވަން ބޭނުންފުޅުވާކަން ހާމަކުރެއްވީ ސްރީލަންކާގައި ހުންނަވާ ރާއްޖޭގެ ސަފީރު ލަންކާގެ އޮފިޝަލުންނާ އެކު ބޭއްވެވި ބައްދަލުވުމެއްގައި
ލަންކާ ރައީސްގެ ސެކްރެޓަރީ ނަންދިކާ ސަނަތު ކުމަނަޔަކެ (ކ) އާއި ރާއްޖޭގެ ހައިކޮމިޝަނަރ މަސްއޫދު އިމާދު ގެ ބައްދަލުވުމުގެ ތެރެއިން
ރައީސް ޑރ. މުހައްމަދު މުއިއްޒު ސްރީލަންކާ އަށް ވަރަށް އަވަހަށް ޒިޔާރަތްކުރައްވަން ޝައުގުވެރިކަން ފާޅު ކުރައްވައިފިއެވެ.
ސްރީލަންކާގެ މީޑިއާ އިން ރިޕޯޓުކޮށްފައިވާ ގޮތުގައި މުއިއްޒު ދަތުރުފުޅު ކުރައްވަން ބޭނުންފުޅުވަނީ، ދެ ޤައުމުގެ ދެމެދުގައި އޮތް ދުވަސްވީ ރަޙްމަތްތެރިކަން އިތުރަށް ހަރުދަނާކުރެއްވުމުގެ ބޭނުންފުޅުގައި ކަމަށެވެ.
ރައީސް މުއިއްޒު ސްރީލަންކާއަށް ރަސް،މީ ދަތުރުފުޅެއް ކުރައްވަން ބޭނުންފުޅުވާ ކަމުގެ ޝައުގުވެރިކަން ފާޅު ކުރެއްވީ، ލަންކާގެ ރައީސްގެ އޮފީހުގައި، ރައީސްގެ ސެކްރެޓަރީ ޑރ. ނަންދިކަ ސަނަތު ކުމާނަޔަކެ އާއި ސްރީލަންކާގައި ހުންނަވާ ދިވެހިރާއްޖޭގެ ހައި ކޮމިޝަނަރު އަލްފާޟިލް މަސްއޫދު އިމާދު ބައްދަލުކުރައްވާ ދެއްކެވި ވާހަކަފުޅުގައެވެ.
މި ބައްދަލުވުމުގައި، ހައި ކޮމިޝަނަރު ވިދާޅުވީ ރާއްޖޭގެ ރައީސް އަވަހަށް ސްރީލަންކާއަށް ޒިޔާރަތްކުރައްވަން ގަސްދުކުރައްވާ ކަމުގައެވެ.
ބުދަ ދުވަހު އޮތް މި ބައްދަލުވުމުގައި ދެ ޤައުމަށް މުހިންމު އެކި ދާއިރާތަކާ ބެހޭގޮތުން ވާހަކަދެކެވުނު ކަމަށް ރިޕޯޓްތައް ބުނެއެވެ. މީގެ ތެރޭގައި ދިވެހިރާއްޖެއާއި ސްރީލަންކާ އާ ދެގައުމުގެ ދެމެދުގައި ފަތުރުވެރިކަމާއި، ޞިއްޙަތާއި، ތަޢުލީމީ ދާއިރާ ތަރައްޤީކުރުމާ ބެހޭ ގޮތުން ވަނީ މަޝްވަރާކުރެވިފައެވެ.
