މަދުވެގެން 93 މީހުން ޝަހީދުކޮށްލާ ގަތުލުއާންމެއް ހިންގުމަށްފަހު އިޒްރޭލުން އަނެއްކާވެސް ބައިތް ލަހިޔާއަށް ބޮންއަޅައި 19 މީހުން ޝަހީދުކޮށްލައިފި
30 އޮކްޓޯބަރު 2024 | ބުދަ 06:13ޣައްޒާގެ ދިފާއީ ވުޒާރާއިން މަޢުލޫމާތު ދޭގޮތުގައި 100،000ށްވުރެ ގިނަ މީހުން ގާޒާގެ އުތުރުގައި ކާނާއާއި ފެން ނުލިބި ބަނޑުހައި ހޫނުކަމުގައި ބަންދުވެފައި ތިބިއިރު، އެތައް ބަޔަކު ސުންނާފަތިވެފައިވާ އިމާރާތްތަކުގެ ދަށުވެފައި އެބަތިއްބެވެ.
ސުންނާފަތިވެފައިވާ އިމާރާތެއްގެ ތެރެއިން ފަލަސްތީން މީހެއްގެ ހަށިގަނޑު ނެރެނީ
ޣައްޒާ ސްޓްރިޕްގެ އުތުރުގައިވާ ބައިތް ލަހިޔާގައި އިޒްރޭލުން ހިންގި ގަތުލުއާންމެއްގައި، ކުޑަކުދިންނާއި އަންހެނުން ހިމެނޭ ގޮތަށް 93ށް ވުރެ ގިނަ އާންމުން ޝަހީދުކޮށްލުމަށްފަހު އަނެއްކާވެސް ބައިތް ލަހިޔާއަށް ބޮންއަޅައި މަދުވެގެން 19 މީހުން ޝަހީދުކޮށްލައިފިއެވެ.
ގާޒާގެ ދިފާއީ ވުޒާރާއިން މަޢުލޫމާތު ދޭގޮތުގައި މިހަމަލާ އައީ އަންގާރަ ދުވަހުގެ ރޭގެ މެންދަމު ވަގުތެއްގައެވެ. އަދި މި ހަމަލާގައި ގާޒާގެ އަލް ލޫހު ޢާއިލާއަށް ނިސްބަތްވާ އެތައް ގެއެއް ސުންނާފަތިވެ ބިމާ ހަމަވެފައިވާ ކަމަށް ޣައްޒާގެ ދިފާއީ ވުޒާރާއިން މައުލޫމާތުދެއެވެ.
ޔަހޫދީ ބާރުތަކުން މިހަމަލާ ދީފައި މިވަނީ އޭގެ ކުރީ ދުވަހު ބައިތް ލަހިޔާގެ އަބޫ ނަޞްރު ޢާއިލާއަށް ނިސްބަތްވާ 5 ބުރީގެ އިމާރާތަކަށް ބޮންއަޅައި، މަދުވެގެން 93 މީހުން މަރާލައި، އެތައް ބަޔަކު ޒަޚަމްކުރުމަށްފަހުގައެވެ. ޣައްޒާގެ ސިއްޙީ ވުޒާރާއިން ބުނާ ގޮތުގައި މިހަމަލާގައި މަރުވި މީހުންގެ ތެރޭގައި މަދުވެގެން 25 ކުޑަކުދިން ހިމެނެއެވެ.
މިހަމަލާއާ ގުޅިގެން އިޒްރޭލު ސިފައިން ބުނެފައިވަނީ "މި ހަމަލާއާ ބެހޭ ރިޕޯޓުތައް ބަލަމުންދާ،" ކަމަށެވެ.
މީގެއިތުރުން، އދ. ގެ އިންސާނީ ޙައްޤުތަކާބެހޭ ކޮމިޝަނުން (އޯއެޗްސީއެޗްއާރު) ބުނެފައިވަނީ އިޒްރޭލުން ދިން މިހަމަލާއާ މެދު "ހައިރާންވާ،" ކަމަށެވެ. އަދި މިއީ ވޭތުވެދިޔަ 3 މަސްދުވަހުގެ ތެރޭގައި ޣައްޒާގައި އެއް ހަމަލާއެއްގައި އެންމެ ގިނަ މީހުން މަރުވި ހަމަލާކަމަށްވެސް އެ ކޮމިޝަނުން ބުނެފައިވެއެވެ. ހަމައެއާއެކު، ހަމަލާއާ ގުޅޭގޮތުން އދ. ގެ އިންސާނީ އެހީގެ އޭޖެންސީ (އޯޗާ) އިން ބުނެފައިވާ ގޮތުގައި އަބޫ ނަޞްރު ޢާއިލާއަށް ދިން ހަމަލާއަކީ ވޭތުވެދިޔަ ހަފްތާގެ ތެރޭގައި ޣައްޒާގައި އެންމެ ގިނަ މީހުން މަރުވި 7 ހާދިސާގެ ތެރެއިން އެކެވެ.
އުތުރު ޣައްޒާގައި އިޒްރޭލުން ހިޞާރުކުރާތާ 26 ދުވަސްވެފައިވާއިރު، އިޒްރޭލުން ބައިތް ލަހިޔާއަށް ދެމުންދާ ވައިގެ އަދި އެއްގަމުގެ ހަމަލާތައް އިތުރުވަމުންދާކަން ފާހަގަކުރެވެއެވެ. އިޒްރޭލުގެ ސިފައިން ބުނާ ގޮތުގައި މި ހަމަލާތައް ދެމުން މިދަނީ ހަމާސްގެ ހަނގުރާމަވެރިން އުތުރުގައި އަލުން އެއްވުން ހުއްޓުވުމަށެވެ. ނަމަވެސް އިޒްރޭލުން މިހެން ބުނެފައިމިވަނީ މިއީ މިއަހަރުގެ ކުރީކޮޅު އެ ސަރަހައްދުން ހަމާސް ޖަމާއަތް އެއްކޮށް ފުހެލާފައިވާ ކަމަށް ބުނުމަށްފަހުގައެވެ.
ޣައްޒާގެ ދިފާއީ ވުޒާރާއިން މަޢުލޫމާތު ދޭގޮތުގައި 100،000ށްވުރެ ގިނަ މީހުން ގާޒާގެ އުތުރުގައި ކާނާއާއި ފެން ނުލިބި ބަނޑުހައި ހޫނުކަމުގައި ބަންދުވެފައި ތިބިއިރު، އެތައް ބަޔަކު ސުންނާފަތިވެފައިވާ އިމާރާތްތަކުގެ ދަށުވެފައި އެބަތިއްބެވެ. އިޒްރޭލުގެ ހަމަލާތަކުގެ ސަބަބުން މީހުން ސަލާމަތްކުރާ ޓީމަށް އެމީހުންނާ ހަމައަށް ނުދެވޭކަން ވެސް ދިފާއީ ވުޒާރާއިން ފާހަގަކޮށްފައިވެއެވެ.
