ގާނޫނުތަކުގެ ބާރު ކެނޑޭގޮތަށް ސަރުކާރުން އަމަލުކުރަމުންދަނީ ރައްޔިތުންނަށް ހަދަމުންދާ ދޮގުތަކާއި، އޮޅުވާލުންތައް އިތުރު ކުރުމަށް
ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ރައްްޔިތުންނަށް ފައިދާހުރި އެއްވެސް މަސައްކަތެއް ނުކުރާ ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ހޯމަ ދުވަހު ލާމަރުކަޒީ ނިޒާމުގެ ބާރު ކެނޑޭގޮތަށް މިސަރުކާރުން އަމަލުކުރަމުންދާތީ ލޯކަލް ގަވަރމަންޓް މިނިސްޓަރު އާދަމް ޝަރީފްއާ ބައްދަލުކުރުމަށް އެމްޑީޕީގެ މެންބަރުން އެ މިނިސްޓްރީއަށް ދިޔަ ނަމަވެސް މިނިސްޓަރު ވަނީ ބައްދަލު ކުރުމަށް ދެކޮޅު ހައްދަވާފައެވެ. އެކަމުގެ ކަންބޮޑުވުންތައް ހިއްސާކޮށް މެންބަރު ސަމީރު ވިދާޅުވީ އާބަން ޑިވެލޮޕްމަންޓް ގާނޫނާއެކު ލާމަރުކަޒީ ގާނޫނުގެ ބާރު ކެނޑިގެންދާ ކަމަށާއި، މިއީ ކަންބޮޑުވާ މައްސަލައެއް ކަމަށެވެ.
މެންބަރު ސަމީރު ވިދާޅުވީ ގާނޫނުތަކުގެ ބާރު ކެނޑޭގޮތަށް ސަރުކާރުން އަމަލުކުރަމުންދަނީ ރައްޔިތުންނަށް ހަދަމުންދާ ދޮގުތަކާއި، އޮޅުވާލުންތައް އިތުރު ކުރުމަށް ކަމަށެވެ. އަދި މިގޮތަށް އަމަލު ކުރުމުން ގާނޫނުގެ ތެރެއިން މިކަންކަން ސިއްރުކަން ބޮޑު ގޮތެއްގައި ކުރުމުގެ ފުރުސަތު ފަހިވާ ކަމަށް މެންބަރު ސަމީރު ވިދާޅުވިއެވެ.
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން ސަރުކާރުން ހުށަހަޅާފައިވާތީ އެކަމަށް ވެސް މެންބަރު ސަމީރު ވަނީ ފާޑު ވިދާޅުވެފައެވެ. އަދި ވިދާޅުވީ މިކަންކަމާއި ދެކޮޅަށް ރައްޔިތުން ނުކުންނަން ޖެހޭ ކަމަށެވެ.
މެންބަރު ސަމީރު ވިދާޅުވީ މިސަރުކާރުގެ ސަޕްލިމެންޓްރީ ބަޖެޓާއެކު ވެސް މިސަރުކާރުން ރައްޔިތުންނަށް ފައިދާހުރި އެއްވެސް މަސައްކަތެއް ނުކުރާނެކަން ހާމަވާ ކަމަށެވެ. ތަރައްގީގެ އެއްވެސް މަޝްރޫއެއް ކުރިއަށް ނުގެންދާއިރު، އިގްތިސާދަށް އެއްވެސް ކަހަލަ ކަމެއް ކުރިއެރުމެއް އަންނަ މަންޒަރު ނުފެންނަ ކަމަށް މެންބަރު ސަމީރު ވިދާޅުވިއެވެ.
