ފުރަތަމަ މެޗުގައި އަރްކަޑަގް އަތުން މާޒިޔާ ބަލިވެއްޖެ

އޭއެފްސީ ޗެލެންޖު ލީގުގައި ރާއްޖޭގެ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އިން ކުޅުނު ފުރަތަމަ މެޗުގައި ތުރުކެމިނިސްތާންގެ އަރްކަޑަގް އަތުން ބަލިވެއްޖެ އެވެ.

ހޮނިހިރު ދުވަހުގެ ރޭ އަރްކަޑަގްއާ ދެކޮޅަށް ކުޅުނު މެޗުން މާޒިޔާ ބަލިވެފައި ވަނީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް މާޒިޔާ އިންނެވެ. ނަމަވެސް އަރްކަޑަގް އިން ވަނީ ފަހަތުން އަރައި ދެ ލަނޑު ޖަހައިގެން މާޒިޔާގެ މައްޗަށް ކުރި ހޯދައިފަ އެވެ.

ފުރަތަމަ ހާފުގެ ނިމެން ކުޑަ ވަގުތު ކޮޅަަކަށް ވެފައި ވަނިކޮށް، މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެއީ އޭއެފްސީ ޗެލެންޖު ލީގާ ދިމާކޮށް މާޒިޔާ އަށް ގެނައި ފަލަސްޠީނުގެ މިޑްފީލްޑަރު ޖޮނަތަން ކަންޓިއާނާ ޖެހި ލަނޑުންނެވެ. އެ ލަނޑު އޭނާ ޖެހީ އަލީ ފާޞިރު (ސެންޓޭ) ނެގި ހުރަހެއްގައި ލިބުނު ބޯޅައެއް ބޭނުންކޮށްގެންނެވެ.

މެޗުގެ 66 ވަނަ މިނެޓުގައި އަރްކަޑަގް ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މާޒިޔާގެ އޭރިޔާ ތެރެއިން ލިބުނު ބޯޅައެއް ގޯލަށް ވައްދާލައިގެން އެ ޓީމަށް ނަތީޖާ ހަމަހަމަ ކޮށްދިނީ ޑުރްޑިއޭވް އެވެ. އޭގެ ފަހުން މެޗުގެ 77 ވަނަ މިނެޓުގައި އަރްކަޑަގް ވަނީ އެ ޓީމުގެ ދެ ވަނަ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަނަދު އަދިއޭވު އެވެ.

އޭއެފްސީ ޗެލެންޖު ލީގުގައި މާޒިޔާ ހިމެނިފައި އޮތީ ގުރޫޕު ބީގަ އެވެ. މި ގުރޫޕުގައި މާޒިޔާ އާއި އަރްކަޑަގްގެ އިތުރުން ދެން ހިމެނެނީ، ކުވޭތުގެ އަލް އަރަބީ އަދި ކަޒަކިސްތާނުގެ އެފްސީ އަބްޑީޝް އެވެ. މި ގުރޫޕުގައި އަބްޑީޝް އިން ވަނީ އަލް އަރަބީއާ ދެކޮޅަށް ކުޅުނު މެޗުން މޮޅޫވެފަ އެވެ. ޗެލެންޖު ލީގުގައި މާޒިޔާގެ ދެ ވަނަ މެޗުގައި އަލް އަރަބީއާ ދެކޮޅަށް ނިކުންނާނީ އަންގާރަ ދުވަހު އެވެ.