ލަންކާގެ ކުރީގެ ބޮޑުވަޒީރު ރަނިލް ވިކްރަމަސިންހަ ދެއްކެވި ވާހަކަފުޅާއެކު އެއީ ބަޣާވާތެއްކަމަށް ބުނެ ފިޔަވަޅު އަޅަންވެސް ރައީސް ޑރ. މުހައްމަދު މުއިއްޒު މަޖިލީހަށް ސިޓީފުޅެއް ފޮނުއްވަފާނެކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފް ފްރަންޓް އޮފީސް ޖަލްސާގައި ވާހަކަ ދައްކަވަމުން، މީޑިއާތަކަށް ފިޔަވަޅު އެޅުމަށް އެދި ރައީސް އޮފީހުން ފޮނުވި ސިޓީއަށް އިޝާރާތްކުރައްވާ ރައީސް ޔާމީން ވިދާޅުވީ ރައީސް ޑރ. މުހައްމަދު މުއިއްޒު ކެމްޕޭން ކުރެއްވި އިރު ދެއްކެވީ މަތިބަރު ސަރުކާރެއްގެ ވާހަކައާއި އިގްތިސާދީ ވާހަކަތައް ކަމަށެވެ. އަދި ހުރިހާ ސިގްނަލްތައް ހުރިހާ ދިމާލަކުން ލިބި ހުރިހާ ކަމެއް ހައްލުކުރަން ލިބޭނެކަމަށް ވިދާޅުވި ކަމަށެވެ. އަދި މި ސަރުކާރަށް ކަންކަން އެނގިވަޑައިނުގަންނަވަނީ ނޫން ކަމަށާއި، ކަންކަން ކުރެވޭނެ ކަމުގެ ޔަގީންކަން ނެތީ ކަމަށެވެ.

ޔާމީން ވިދާޅުވީ މުއިއްޒު ވިދާޅުވި 1 ވާހަކައަކީ އެމަނިކުފާނުގެ ސަރުކާރެއްގައި ސިޔާސީ މީހުންގެ ޖުމްލަ އަދަދަކަށް ވާނީ 700 ކަމަށާއި، އެއަށްވުރެ ގިނަ ނުކުރާނެ ކަމަށެވެ. ނަމަވެސް މިހާރު އުޅެނީ އަދަދު ވިދާޅުވާން ނުކެރިގެން ކަމަށެވެ. އަދި 700 މީހުންނަށްވުރެ ސިޔާސީ މަގާމް އިތުރު ނޫންކަމުގައިވާނަމަ ވަކިކުރަން ނިންމި 228 މީހުންނަކީ އޭގެ ތިންބައިކުޅަ އެއްބައި ކަމަށެވެ. އެހެންކަމުގައިވާނަމަ މި ސަރުކާރުގައި ތިބީ 700 ސިޔާސީ މީހުން ނޫން ކަމަށް ޔާމީން ވިދާޅުވިއެވެ.

ޔާމީން ވިދާޅުވީ ރަނިލް ދެއްކެވި ވާހަކައާއެކު މުއިއްޒު ވިދާޅުވާނީ އޭނާ ބަޣާވާތެއް ގެނައި ކަމަށެވެ. އެއީ ސިޔާސީ ބަޣާވާތެއްކަމަށް މުއިއްޒު ސިފަކުރައްވާނެ ކަމަށާއި، ސަބަބަކީ އަގުވައްޓާލަން މަސައްކަތް ކުރުން ކަމަށް ޔާމިން ވިދާޅުވިއެވެ.

މީޑިއާތަކަށް ފިޔަވަޅުއަޅަންކަމަށް ބުނެ ރައީސް އޮފީހުން މަޖިލީހަށް ފޮނުވި ސިޓީއަށް އިޝާރާތްކުރައްވާ ޔާމީން ވިދާޅުވީ، ރައީސް މުއިއްޒުގެ އަގުވައްޓާލަން ދުނިޔޭގެ ގައުމުތަކުގެ ވަޒީރުންނާއި ބޮޑުވަޒީރުން މަސައްކަތްކޮށްފި ކަމަށާއި، އެބޭބޭފުޅުންނަށް ފިޔަވަޅު އަޅަންވެސް މުއިއްޒު އެދިވަޑައިގެންފާނެ ކަމަށެވެ.