ޕޮލެންޑުން ކްރޮއޭޝިއާއާ އެއްވަރު ކޮށްފި

ޔުއެފާ ނޭޝަންސް ލީގު އޭގެ ގުރޫޕު އެކެއްގައި ކްރޮއޭޝިއާއާ ދެކޮޅަށް ކުޅުނު މެޗުން ޕޮލެންޑު އެއްވަރު ކޮށްފި އެވެ.

އަންގާރަ ދުވަހުގެ ރޭ ކުޅުނު މެޗު ނިމުނީ ދެ ޓީމު 3-3 އިން އެއްވަރުވެގެންނެވެ. މެޗުގައި ޕޮލެންޑުން ލީޑު ނަގާފައި ވަނިކޮށް، ކްރޮއޭޝިއާ އިން ތިން ލަނޑު ޖަހައިގެން ލީޑު ވެސް ނެގި އެވެ. ނަމަވެސް ޕޮލެންޑުން ވަނީ ފަހުން ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ފަސް ވަނަ މިނެޓުގައި ޕޮލެންޑަށް ލީޑު ނަގައިދިނީ ޕިއޮޓް ޒިއެލިންސްކީ އެވެ. ނަމަވެސް މެޗުގެ 19 ވަނަ މިނެޓުގައި ބޯނާ ސޮސާ ވަނީ ކްރޮއޭޝިއާ އަށް ނަތީޖާ ހަމަހަމަ ކޮށްދީފަ އެވެ. އޭގެ ފަހުން މެޗުގެ 24 ވަނަ މިނެޓުގައި އެ ޓީމަށް ލީޑު ނަގައިދިނީ ޕެޓާ ސުސިކް އެވެ. ފުރަތަމަ ހާފުގައި ކްރޮއޭޝިއާގެ ތިން ވަނަ ލަނޑު ޖެހީ މާޓިން ބަޓުރިނާ އެވެ.

ފުރަތަމަ ހާފުގެ ފުރިހަމަ ވަގުތު ހަމަވެފައި ވަނިކޮށް، ޕޮލެންޑުގެ ދެ ވަނަ ލަނޑު ޖެހީ ނިކޮލާ ޒަލެވްސްކީ އެވެ. ދެ ވަނަ ހާފު ފަށައިގެން ކުރީ ކޮޅު ޕޮލެންޑުން ވަނީ ތިން ވަނަ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. ރޮބާޓް ލެވަންޑޯސްކީ ތަނަވަސްކޮށްދިން ފުރުސަތެއްގައި އެ ލަނޑު ޖެހީ ސެބާސްޓިއަން ޒިމަންސްކީ އެވެ.

ނަތީޖާ އާއެކު ކްރޮއޭޝިއާ އޮތީ މި ގުރޫޕުގެ ދެ ވަނައިގަ އެވެ. އެއީ މިހާތަނަށް ކުޅުނު ހަތަރު މެޗުން ހަތް ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ތިން ވަަނައިގައި ޕޮލެންޑަށް ލިބެނީ ހަތަރު ޕޮއިންޓެވެ.