އީސީއަށް އައްޔަން ކުރުމަށް އަބްދުލް ހަސީބު އިސްމާއިލްގެ ނަން މަޖިލީހަށް ފޮނުވައިފި
ފުއާދުގެ ދައުރު ހަމަވާނީ 24 ނޮވެމްބަރު 2024ގައި
އިލެކްޝަން ކޮމިޝަންގެ އެސިސްޓެންޓް ޑިރެކްޓަރުގެ މަގާމުގައި ހުންނެވި އަބްދުލް ހަސީބު އިސްމާއިލް
އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގުގެ ދައުރު ހަމަވާތީ, އަބްދުލް ހަސީބު އިސްމާއިލްގެ ނަން ރައްޔިތުންގެ މަޖިލީހަށް ފޮނުއްވައިފިއެވެ.
ހޯމަ ދުވަހު ކުރިއަށް ގެންދިޔަ މަޖިލީހުގެ ޖަލްސާގައި ރައީސް ޑރ. މުހައްމަދު މުއިއްޒު، މަޖިލީހަށް ފޮނުއްވި ސިޓީފުޅު ވަނީ އިއްވަވާފައެވެ. އެ މަނިކުފާނު މަޖިލީހަށް ރުހުން ހޯދަން ފޮނުއްވީ އަބްދުލް ހަސީބު އިސްމާއިލް، ހުޅުމާލެ ހިޔާ 11-23-05 އެވެ. އަދި އިލެކްޝަން ކޮމިޝަންގެ މެންބަރުކަމުގެ މަގާމަށް ކުރިމަތިލުމަށް އިއުލާން ކުރުމުން އެކަމަށް އިޖާބަދެއްވި އެހެން ބޭފުޅުންގެ ނަންތައް ވެސް ފޮނުއްވާފައިވެއެވެ.
ފުއާދުގެ ދައުރު ހަމަވާނީ 24 ނޮވެމްބަރު 2024 ށެވެ. އިލެކްޝަންސް ކޮމިޝަނުގެ މެންބަރުކަމުގެ ދައުރަކީ ފަސް އަހަރު ކަމަށްވާއިރު، އެ ކޮމިޝަނުގެ މެންބަރެއްގެ ގޮތުގައި ކޮންމެ ބޭފުޅަކަށް ވެސް އަދާ ކުރެއްވޭނީ ދެ ދައުރެވެ.
ރިޔާސަތުން ވަނީ މި މައްސަލަ މަޖިލީހުގެ މިނިވަން މުއައްސަސާތަކުގެ ކޮމެޓީއަށް ފޮނުވާފައެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި، އަބްދުލް ހަސީބު އިސްމާއިލް ހުންނެވީ އިސްލާމިކް މިނިސްޓްރީގެ ޕާމަނަންޓް ސެކްރެޓަރީ ކަމަށް އައްޔަންކޮށްފައެވެ. ނަމަވެސް މިނިސްޓަރީގެ ބައެއް މުވައްޒަފުންނާ މެދު ވަރަށް ހަރުކަށިކޮށް އަމަލު ކުރާ ކަމަށް ބުނެ، އަދިވެސް އިތުރު މައްސަލަތަކާ ގުޅިގެން އޭނާ މަގާމުން ސަސްޕެންޑްކުރުމަށް ފަހު މަގާމުން ދުރުކުރީއެވެ.
އަބްދުލް ހަސީބު އިސްމާއިލް މިހާރު ހުންނެވީ އިލެކްޝަން ކޮމިޝަންގެ އެސިސްޓެންޓް ޑިރެކްޓަރުގެ މަގާމުގައެވެ.
