މި ސަރުކާރަށް އެއްވެސް ގޮތެއް ނެތް، ފައިސާ ޗާޕު ކުރާނެ: އަމީރު

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މި ސަރުކާރަށް އެއްވެސް ގޮތެއް ނެތި ފައިސާ ޗާޕު ކުރާނެ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

ފަލަސުރުހީ ޕްރޮގްރާމްގައި އަމީރު ވިދާޅުވީ ރާއްޖޭގެ އިގްތިސާދީ އަދި މާލީ ހާލަތާއި ގުޅޭގޮތުން އައިއެމްއެފް އަދި ވޯލްޑް ބޭންކް ފަދަ ތަންތަނުން ސަރުކާރުން އާޖެންޓް ރީފޯމްތަކެއް ގެންނަންޖެހޭ ކަމަށް ތަކުރާރުކޮށް އަންގަމުންދާ ކަމަށާއި، އެ ރީފޯމްތައް ގެނައުމުގެ ގާބިލްކަން މި ސަރުކާރުގެ ނެތް ކަމަށެވެ. އަދި ވިދާޅުވީ މިސަރުކާރަށް 11 މަސް ވެގެންދިޔައިރު، ހަރުދަނާ ފިޔަވަޅެއް އަޅާފައިނުވާ ކަމަށާއި، އިގްތިސާދީ ހާލަތު ރަނގަޅު ކުރުމަށް އެއްވެސް މަސައްކަތެއް ކޮށްފައިނުވާ ކަމަށެވެ.

Advertisement

އަމީރު ވިދާޅުވީ އައިއެމްއެފްގެ ޕްރޮގްރާމަކަށް ނުދާނެކަމަށް ރައީސް ޑރ.މުހައްމަދު މުއިއްޒު ވިދާޅުވެފައިވާއިރު، ބަޖެޓް ސަޕޯޓަށް ހިލޭ އެހީގެ ގޮތުގައި ބޭރުގެ އެއްވެސް ގައުމަކުން ފައިސާ ނުލިބޭ ކަމަށެވެ. އަދި ފައިސާ ޕްރިންޓް ކުރުން ނޫން ގޮތެއް ނެތް ކަމަށާއި، އެމަސައްކަތް މި ސަރުކާރުން ގާނޫނަށް ބަދަލު ގެނެސްގެން ވެސް ކުރާނެ ކަމަށް އޭނާ ވިދާޅުވިއެވެ.

މިސަރުކާރުގެ ނާގާބިލްކަމުން ކުރިއަށް އޮތްތަނުގައި އިގްތިސާދީ ހާލަތު ދަށްވެ، ސަރުކާރުގެ މުވައްޒަފުންނަށް މުސާރަ ދިނުމަށް ވެސް ބޮޑެތި ގޮންޖެހުންތައް ކުރިމަތިވެދާނެ ފަދަ ހާލަތެއް ކުރިމަތިވެދާނެކަން ފާހަގަކުރައްވައި އަމީރު ވިދާޅުވީ ފައިސާ ހޯދުމަށް ހިމަނާފައިވާ އެއްވެސް އަދަދަކަށް މިސަރުކާރަށް ބޭރުން ފައިސާ ހޯދިފައިނުވާ ކަމަށެވެ. އަދި ދަރަނި ނޫން ގޮތަށް ބަޖެޓް ސަޕޯޓަށް ހިލޭ އެހީގެ ގޮތުގައި ފައިސާ ހޯދަންޖެހޭ ކަމަށް އޭނާ ވިދާޅުވިއެވެ. ނަމަވެސް މިހާތަނަށް އައިރު ފައިސާ ހޯދާފައިވަނީ ބޭންކް އޮފް މޯލްޑިވްސް، ސަރުކާރުގެ ހިއްސާ އޮންނަ އެކިއެކި ކުންފުނިތަކުން ކަމަށް އަމީރު ވިދާޅުވިއެވެ. އަދި ވިދާޅުވީ މިގޮތަށް މިކަން އަބަދު ނުކުރެވޭނެ ކަމަށެވެ.

މީގެ އިތުރުން އަމީރު ވިދާޅުވީ މިސަރުކާރުގެ ސިޔާސަތުގެ ސަބަބުން ރާއްޖޭގެ މާލީ ނިޒާމު މެނޭޖް ނުކުރެވޭ ކަމަށާއި، އިގްތިސާދީ ހަރަކާތްތަކަށް ވަރަށް ބޮޑަށް ނޭދެވޭ އަސަރު ކުރާ ކަމަށެވެ. އެގޮތުން މަސްވެރިންނަށް ދޭންޖެހޭ ފައިސާ ނުދޭކަން އޭނާ ފާހަގަކުރެއްވިއެވެ.

އަމީރު ވިދާޅުވީ މިސަރުކާރަކީ ނާގާބިލް ސަރުކާރެއް ކަމަށާއި، އެކަންކަން ގައުމުގެ ހުރިހާ ދިމާލަކުން ފެންނަ ކަމަށެވެ. އަދި ސަރުކާރު ހިންގުމަށް ކުރިއަށް އޮތްތާގައި ވަރަށް ބޮޑެތި ދަތިތައް ކުރިމަތިވާނެ ކަމަށް އަމީރު ވިދާޅުވިއެވެ.