ހިޒްބުﷲ އިން އިޒްރޭލަށް ޑްރޯން ހަމަލާ ދީފި، 3 މީހުން މަރުވެ، ގިނަ އަދަދެއްގެ ބަޔަކު ޒަޚަމްވެއްޖެ

ހިޒްބުﷲ އިން އިޒްރޭލަށް ދިން ޑްރޯން ހަމަލާއެއްގައި އިޒްރޭލުން 3 މީހުން މަރުވެ، ގިނަ އަދަދެއްގެ ބަޔަކު ޒަޚަމްވެއްޖެއެވެ.

އާދީއްތަ ދުވަހުގެ ރޭ ދެ ޑްރޯން ހަމަލާ ދިން ކަމަށް ހިޒްބުﷲ އިން ވަނީ  ބުނެފައެވެ. ހަމަލާދިނީ ފަލަސްތީނު ރައްޔިތުންނާ އެއްބައިވަންތަ ކަން ހާމަކުރުމުގެ ގޮތުންނާއި ލުބުނާނާއި ލުބުނާނުގެ ރައްޔިތުންގެ ދިފާއުގައި ކަމަށް ބުނެފައިވެއެވެ.

ހަމަލާދީފައިވަނީ އިޒްރޭލުގެ ބިންޔާމީނާ ސިޓީ ގެ ގޯލާނީ ބްރިގޭޑް ކޭމްޕަށް ކަމަށްވެސް ހިޒްބުﷲ އިން ވަނީ ބުނެފައެވެ. 

ގޯލާނީ ބްރިގޭޑަކީ އިޒްރޭލުގެ އަސްކަރިއްޔާގައި ހިމެނޭ ފަސް އިންފެންޓްރީ ބްރިގޭޑުގެ ތެރެއިން އެއް ބްރިގޭޑެވެ. 

މިއީ ވަރަށް ފުރިހަމަ އަށް ތަމްރީންތައް ހަދާ ހަނގުރާމައިގެ މައިދާނަށް ފޮނުވުމަށް ތައްޔާރަށް ތިބޭ ބްރިގޭޑެއް ކަމަށާއި އެމީހުންނަކީ އިޒްރޭލު ސިފައިންގެ އެންމެ މޮޅު ޔުނިޓްތަކުގެ ތެރެއިން އެއް ޔުނިޓްގެ ގޮތުގައި ބެލެވޭ ބައެއް ކަމަށް ރިޕޯޓްތައް ބުނެއެވެ.                   

އެހެން ބަޔާނެއްގައި، އެ ޖަމާޢަތުން ބުނެފައިވަނީ އިޒްރޭލުން ހިފާފައިވާ ގޯލާންގެ އުސްބިމުގައިވާ އިޒްރޭލުގެ ސްނޯބަރ ލޮޖިސްޓިކްސް ބޭސްއަކަށް ވެސް މިސައިލް ހަމަލާދީފައިވާ ކަމަށެވެ. 

އިޒްރޭލުގެ އާމީ ރޭޑިއޯއިން ބުނެފައިވާ ގޮތުގައި އާދިއްތަ ދުވަހުގެ ރޭގެ ހަމަލާގައި އިޒްރޭލުގެ 3 ސިފައިންގެ މީހުން މަރުވެފައިވާ ކަން ވަނީ ކަށަވަރުވެފައެވެ. އިޒްރޭލުގެ އެމްބިއުލަންސް ސަރވިސްއިން ބުނެފައިވަނީ އަނިޔާވެފައިވާ މީހުންގެ އަދަދު 67ށް އަރާފައިވާ ކަމަށެވެ.

އިޒްރޭލުގެ ޒަމާނީ ވައިގެ ދިފާއީ ނިޒާމުތަކުގެ ސަބަބުން، ޑްރޯން ނުވަތަ މިސައިލުތަކުން މިހާ ގިނަ މީހުންނަށް ގެއްލުން ލިބުމަކީ ނާދިރު ކަމެއް ކަމަށް ރިޕޯޓްތައް ބުނެއެވެ. އިޒްރޭލުގެ މީޑިއާތަކުން ރިޕޯޓުކުރި ގޮތުގައި ލުބުނާނުން ފޮނުވާލި ދެ ޑްރޯންގެ ތެރެއިން އެއް ޑްރޯން ވައިގެ ދިފާއީ ނިޒާމުން ވަނީ ހުރަސް އަޅާފައެވެ. 

ހަމަލާގައި ޒަޚަމްވީ ސިފައިން ކަމެއް ނުވަތަ އާންމު ރައްޔިތުންނަށް ކަމެއް ހާމަކޮށްފައެއް ނުވެއެވެ.

މިއީ ދެ ދުވަހުގެ ތެރޭގައި އިޒްރޭލަށް ޑްރޯން ބޭނުންކޮށްގެން ހިޒްބުﷲ އިން ހަމަލާދިން ދެވަނަ ފަހަރެވެ.