އިހްތިރާމް އަދާކުރުމުގެ ގޮތުން ކާފިރުންގެ ގަބުރަށް ޒިޔާރަތްކޮށް މާބޮނޑި ބާއްވައި ހެދުމަކީ ހަރާމް ކަމެއް: ޝެއިހް ފަޒުލޫން
9 އޮކްޓޯބަރު 2024 | ބުދަ 13:56މިފަދަ ކަންކަމުގައި ބައިވެރިވުމުން އެނގިގެން ދަނީ އިސްލާމްދީނުގެ އަސާސްތަކާ މެދު އެ މީހަކު ޣާފިލުވެގެންވާ މިންވަރު
ރައީސްގެ ދެކަނބަލުން، މަހާތުމާ ގާންދީގެ މަޤްބަރާ، ރާޖްގަޓަށް ކުރެއްވި އިހުތިރާމް ޒިޔާރާތުގެ ތެރެއިން
އިހްތިރާމް އަދާކުރުމުގެ ގޮތުން ކާފިރުންގެ ގަބުރަށް ޒިޔާރަތްކޮށް މާބޮނޑި ބާއްވައި ހެދުމަކީ، އިސްލާމް ދީނުގައި ހަރާމް ކަމެއް ކަމަށް މަޝްހޫރު ދީނީ އިލްމުވެރިޔާ، ޝެއިހް ފަޒުލޫން ބިން މުހައްމަދު ވިދާޅުވެއްޖެއެވެ.
ޝެއިހް ފަޒުލޫން މިހެން ވިދާޅުވެފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިންޑިއާ ކުރައްވާ ރަސްމީ ދަތުރުފުޅުގައި 7 އޮކްޓޫބަރު 2024ގައި ރިޔާސީ ގަނޑުވަރު، ރާޝްތުރަޕަތީ ބަވަންގައި ބޭއްވި މަރްހަބާ ދެންނެވުމުގެ ރަސްމިއްޔާތަށްފަހު ރައީސްގެ ދެކަނބަލުން، މަހާތުމާ ގާންދީގެ މަޤްބަރާ، ރާޖްގަޓަށް ޒިޔާރަތް ކުރައްވާފައިވަނިކޮށްށެވެ.
ޝެއިހް ފަޒުލޫން ވިދާޅުވީ އިހްތިރާމް އަދާކުރުމުގެ ގޮތުން ކާފިރުންގެ ގަބުރަށް ޒިޔާރަތްކޮށް މާބޮނޑި ބާއްވައި ހެދުމަކީ، އިސްލާމް ދީން އެކަމަކައިގެން ފޮނުއްވުނު ތަޥްޙީދާ ފުށުއަރާ، ކަނޑައެޅި ބަޔާންވެގެންވާ ހަރާމް ކަމެއް ކަމަށެވެ. މިފަދަ ކަންކަމުގައި ބައިވެރިވުމުން އެނގިގެން ދަނީ އިސްލާމްދީނުގެ އަސާސްތަކާ މެދު އެ މީހަކު ޣާފިލުވެގެންވާ މިންވަރު ކަމަށް ޝެއިހް ފަޒުލޫން ވިދާޅުވިއެވެ. އަދި ވިދާޅުވީ ކޮންމެ ޒަމާނެއްގައި ކޮންމެ ތަނެއްގައި ކޮންމެ މީހަކު ކުރި ކަމުގައިވިޔަސް އެކަމުގެ ހުކުމަށް ބަދަލެއް ނާންނާނެ ކަމަށެވެ.
ރައީސްގެ ދެކަނބަލުން، މަހާތުމާ ގާންދީގެ މަޤްބަރާ، ރާޖްގަޓަށް ޒިޔާރަތްކުރައްވާފައިވާއިރު، މިކަމާއި ގުޅިގެން ފާޑު ކިޔާ ފަރާތްތަކަށް ސަރުކާރުގެ ބައެއް ބޭފުޅުން ދަނީ ދިފާއު ވެސް ކުރައްވަމުންނެވެ. އެގޮތުން ރާއްޖޭގެ ކުރީގެ ރައީސުން މަހާތުމާ ގާންދީގެ މަޤްބަރާ، ރާޖްގަޓަށް ޒިޔާރަތްކުރައްވާފައިވާ ފޮޓޯތައް ހިއްސާކޮށް ރައްދުދީފައިވެއެވެ.
މީގެ އިތުރުން ރައީސް މުއިއްޒުގެ އިންޑިއާ ދަތުރުފުޅާ ގުޅިގެން ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފައެވެ. އެއީ ރައީސް މުއިއްޒު ވެރިކަމަށް ވަޑައިގެންނެވުމުގެ ކުރިން ވެސް އަދި ވެރިކަމަށް ވަޑައިގަންނަވާ ވެސް އިންޑިއާއި ދެކޮޅަށް ބަހުގެ ހޫނު ހަމަލާތައް އަމާޒު ކުރެއްވާފައިވާތީއެވެ. އަދި އެމަނިކުފާނު ވަނީ "އިންޑިއާ އައުޓް" ނަމުގައި ހިންގި ކެންޕޭންގެ ހަރަކާތްތަކުގައި އިސްކޮށް އުޅުއްވާފައެވެ.
