އިންޑިއާގެ ފަތުރުވެރިންގެ އަގު ވަރަށް ފުންކޮށް ވަޒަންކުރަން، އިންޑިއާގެ ފަތުރުވެރިންގެ ބޭނުންތައް ފުއްދާދޭން މިތިބީ ތައްޔާރަށް - ރައީސް
2028ގެ ނިޔަލަށް ހަކަތައިގެ 33 އިންސައްތަ އަކީ އިޔާދަކުރަނިވި ވަޞީލަތްތަކުން އުފައްދާ ހަކަތައަށް ހެދުމަށް މަސައްކަތްކުރަމުންދާ ކަމަށް ރައީސް ވިދާޅުވި
ރައީސް ޑރ.މުހައްމަދު މުއިއްޒު "އިންޑިއާ- މޯލްޑިވްސް ބިޒްނަސް ފޯރަމް" ގައި ތަޤުރީރުކުރައްވަނީ
އިންޑިއާގެ ފަތުރުވެރިންގެ އަގު ވަރަށް ފުންކޮށް ވަޒަންކުރަން، އިންޑިއާގެ ފަތުރުވެރިންގެ ބޭނުންތައް ފުއްދާދޭން ރާއްޖެއިން އޮތީ ތައްޔާރަށް ކަމަށް ރައީސް ޑރ،މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި، އެ ޤައުމުގެ ވެރިރަށް ނިއުދިއްލީގައި ބޭއްވި "އިންޑިއާ- މޯލްޑިވްސް ބިޒްނަސް ފޯރަމް" ގައި ތަޤުރީރުކުރައްވަމުންނެވެ.
ރާއްޖޭގެ ފަތުރުވެރިކަމުގެ ދާއިރާގެ ފުރިހަމަކަން ތަޖުރިބާކުރުމަށް ރައީސް ވަނީ އެ ފޯރަމްގެ ބައިވެރިންނަށް ދައުވަތު އަރުވާފައެވެ. ރައީސް އިތުރަށް ވިދާޅުވީ އިންޑިއާ އިން އިތުރު ފަތުރުވެރިން ރާއްޖެ ގެނައުމަށް އުއްމީދުކުރައްވާ ކަމަށެވެ. މީގެ އިތުރުން މި ތަޤުރީރުގައި ރައީސުލްޖުމްހޫރިއްޔާ ވަނީ، އިޤްތިޞާދީ އިސްލާޙީ ގޮތުން ރާއްޖެ އަށް ބަދަލުތަކެއް ގެނައުމަށް މަސައްކަތްކުރައްވާ ކަމަށް ފާހަގަކުރައްވާފައެވެ.
އޭގެ ތެރޭގައި އައު ފޮރިން އިންވެސްޓްމަންޓް ޤާނޫނާއި، 2025 ވަނަ އަހަރު އިފްތިތާޙުކުރުމަށް ހަމަޖެހިފައިވާ މޯލްޑިވްސް އިންޓަރނޭޝަނަލް ފައިނޭންޝަލް ސެންޓަރުގެ މަސައްކަތް ހިމެނެއެވެ. ރައީސް ވަނީ ރާއްޖޭގެ ފުރަތަމަ ޑިވެލޮޕްމަންޓް ބޭންކްގެ މަސައްކަތްވެސް ވަރަށް އަވަހަށް ފެށޭނެކަން އެމަނިކުފާނު އިޢުލާންކުރެއްވިއެވެ. އިންވެސްޓަރުންނަށް ރާއްޖޭގައި ހުރި ފުރުސަތުތަކަށް ރައީސް ވަނީ އަލިއަޅުވާލައްވާފައެވެ. ދިވެހިރާއްޖޭގެ އިޤްތިޞާދީ ތަރައްޤީގައި އިންޑިއާ އިން ވަރަށް މުހިންމު ދައުރެއް އަދާކުރާ ކަމަށާއި އަމިއްލަ ވިޔަފާރީގެ ދާއިރާތަކުގައި އިންވެސްޓް ކުރުން މުހިންމު ކަމަށް ވިދާޅުވެފައެވެ.
އިތުރަށް ވާހަކަދައްކަވަމުން ރައީސް ވަނީ ދެ ޤައުމުގެ ދެމެދުގައިވާ ގުޅުން ބަދަހިކުރުމަށް ހުރި ފުރުޞަތުތަކުގެ މައްޗަށް އަލިއަޅުއްވާލައްވާފައިވެއެވެ. މި ތަޤުރީރުގައި ރައީސުލްޖުމްހޫރިއްޔާ ވަނީ، އިޤްތިޞާދީ އިސްލާޙަށް އެމަނިކުފާނުގެ ސަރުކާރުން ކަނޑައަޅުއްވާފައިވާ އެޖެންޑާވެސް ހާމަކުރައްވާފައެވެ. އެ އެޖެންޑާގެ އަމާޒުތަކަކީ، ފަތުރުވެރިކަމުގެ އިތުރުން، މާލީ ޚިދުމަތްތަކާއި، މެރިޓައިމް ސިނާޢަތާއި، ޑިޖިޓަލް އިޤްތިޞާދު ފަދަ ދާއިރާތައް ހިމެނޭ ގޮތަށް އިޤްތިޞާދު ސިންދަފާތުކުރުމެވެ. ރާއްޖޭގެ މަދަނިއްޔަތަށް އެދެވޭ ބަދަލެއް ގެނައުމުގެ މަޤްޞަދުގައި ތަރައްޤީކުރާ އިކޯ ސިޓީ، ރަސްމާލެއަކީވެސް މި އެޖެންޑާގައި ހިމަނޭ މަސައްކަތެކެވެ.
ރާއްޖެ އާއި މެދު މުހިންމު ތަސައްވުރުތަކެއް ގެންގުޅުއްވާ ކަމަށް ފާހަގަކުރައްވާ މުއިއްޒު ވިދާޅުވީ 2030 ވަނަ އަހަރު އަންނަން ވާއިރަށް، ރާއްޖޭގެ އުފެއްދުންތެރިކަމުގެ 15 އިންސައްތަ ހިއްސާކުރާނީ ޑިޖިޓަލް އިޤްތިޞާދުންކަމުގައި ހެދުމަށް، ޑިޖިޓަލް ދާއިރާ ކުރިއަރައިދިއުން މުހިންމުކަމަށެވެ. އަދި ރާއްޖޭގައި "ރުޕޭ" ކާޑު ބޭނުންކުރެވެން ފެށުމާއެކު، އިންޑިއާ އާއި ރާއްޖެއާ ދެމެދު މާލީ މުއާމަލާތްތައް ކުރުން އިތުރަށް ލުއިފަސޭހަ ވެގެންދާނޭކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، 2028 ވަނަ އަހަރު އަންނައިރު ރާއްޖޭގައި އުފައްދާ ހަކަތައިގެ 33 އިންސައްތަ އަކީ އިޔާދަކުރަނިވި ވަޞީލަތްތަކުން އުފައްދާ ހަކަތައަށް ހެދުމަށް ދިވެހިރާއްޖެ އިން މަސައްކަތްކުރަމުންދާ ކަަމަށް ވަނީ ވިދާޅުވެފައެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު މިހާރު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.
