އިންޑިއާގެ ނިއު ދިއްލީއަކީ ރާއްޖޭގެ ވިޔަފާރީގެ ހަބަކަށް ހައްދަވަން މަސައްކަތް ކުރައްވާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެއެވެ.

ރައީސް މުއިއްޒު މިހެން ވިދާޅުވީ އިންޑިއާގެ ވެރިރަށް ނިއު ދިއްލީގައި ދިރިއުޅޭ ދިވެހި ރައްޔިތުންނާ ބައްދަލުކުރައްވާ އާދިއްތަ ދުވަހުގެރޭ އިރާކޮޅު ވާހަކަފުޅު ދައްކަވަމުންނެވެ.

"ކުރިއަށް އޮތްތާގައި ރާއްޖޭގެ ވިޔަފާރިވެރިންނަށް، އިންޑިއާގެ ވިޔަފާރިވެރިންނަށް، ދެގައުމު ދޭތެރޭގައި މި އެކްސްޗޭންޖް އިތުރަށް ފުރިހަމަ ކުރުމަށްޓަކައި، ގިނަ ކުރުމަށްޓަކައި ވިޔަފާރީގެ ގޮތުންނާ އެކި ގޮތްގޮތުން، މިތަނަކީ މުހިންމު ހަބެއްގެ ގޮތުގައި ހެދުމަށް މަސްކަތްކުރުން،" ޑރ. މުއިއްޒު ވިދާޅުވިއެވެ.

މުއިއްޒު ވިދާޅުވީ، އެމަނިކުފާނު ވިސްނުންފުޅަކީ ޓޫރިޒަމްގެ ދާއިރާއިންނާއި، ދަތުރުފަތުރު ކުރުމުގެ ދާއިރާއިންނާއި ހުރިހާ ގޮތަކުން ނިއު ދިއްލީ އަކީ އެކި ދާއިރާތަކުން، ދެ ގައުމު ދޭތެރޭ ގުޅުން ބަދަހި ކުރުމުގެ މުހިންމު ތަނަކަށް ހެދުން ކަމުގައެވެ.

މުއިއްޒުގެ ވާހަކަފުޅު ފައްޓަވަމުން އިންޑިއާ އާއި ރާއްޖެއާ ދެމެދު އޮންނަނީ ޒަމާންވީ ގާތް ރަހްމަތްތެރި ކަމުގެ ގުޅުމެއް ކަމަށް ވިދާޅުވިއެވެ.

"ރާއްޖެއާ އިންޑިއާ އާ ދޭތެރޭ އޮންނަނީ ވަރަށް ގާތް ގުޅުމެއް، ޒަމާންވީ ގާތް ރަހްމަތްތެރި ގުޅުމެއް،" "އިންޑިއާ އައުޓް" ކެމްޕޭންގައި ކުރިން އިސް ސަފުގައި މަސައްކަތް ކުރެއްވި ޑރ. މުއިއްޒު ވިދާޅުވިއެވެ.

މުއިއްޒު ވިދާޅުވީ މި ދަތުރުގެ ސަބަބުން އިތުރަށް ވަރުގަދަ ވެގެންދާނެ ކަމަށެވެ.

އިންޑިއާގެ ރައީސްގެ ދައުވަތަކަށް ޑރ. މުއިއްޒު އިންޑިއާ އަށް އާދިއްތަ ދުވަހު ފެއްޓެވި ދަތުރުފުޅަކީ 5 ދުވަހުގެ މުއްދަތައް ކުރައްވާ ދަތުރުފުޅެކެވެ.