ފަހު މެޗުން ވެސް ރާއްޖެ ބަލިވެއްޖެ

ވިހި އަހަރުން ދަށުގެ އޭޝިއަން ކަޕް ކޮލިފައިންގެ ގުރޫޕް ސްޓޭޖުގައި ރާއްޖެ އިން ކުޅުނު ފަހު މެޗުގައި ޓިމޯ ލެސްޓޭ އަތުން ވެސް ބަލިވެއްޖެ އެވެ.

އިންޑޮނޭޝިއާ ގައި މިހާރު ކުރިއަށްދާ ކޮލިފައިންގައި ރާއްޖެ އޮތީ ގުރޫޕް އެފްގަ އެވެ. މި ގުރޫޕުގައި ރާއްޖޭގެ އިތުރުން ދެން އޮތީ އިންޑޮނޭޝިއާ، ޔަމަން އަދި ޓިމޯ ލެސްޓޭ އެވެ. ގުރޫޕް ސްޓޭޖުގެ ފަހު މެޗުގައި ޓިމޯ ލެސްޓޭއާ ދެކޮޅަށް ނިކުތްއިރު، ރާއްޖެ ވަނީ ކުޅުނު ފުރަތަމަ ދެ މެޗުން ވެސް ބަލިވެފަ އެވެ. ޓިމޯ ލެސްޓޭ ވެސް ވަނީ ކުޅުނު ދެ މެޗުން ބަލިވެފަ އެވެ. ފަހު މެޗުގައި ޓިމޯ ލެސްޓޭ އިން ވަނީ 4-1ން ރާއްޖޭގެ މައްޗަށް ކުރި ހޯދައިފަ އެވެ.

ރާއްޖޭގެ މައްޗަށް ޓިމޯ ލެސްޓޭ އިން ކުރި ހޯދީ 4-1 ންނެވެ. މެޗުގެ ފުރަތަމަ ހާފުގައި ރާއްޖޭގެ ޢަބްދުﷲ ފިޒާން އަބްދުލް ޣަފޫރު އަށް ވަނީ ރަތް ކާޑު ދައްކައިފަ އެވެ. މެޗުގައި ޓިމޯ ލެސްޓޭ އިން އެ ޓީމުގެ ލަނޑުތައް ޖެހީ ވެސް އޭގެ ފަހުންނެވެ. މެޗުގައި އެ ޓީމުގެ ލަނޑުތައް ޖެހީ އަލެކްސަންޑްރޯ ބަކީޓޯ ލެމޯސް، ވަބިއޯ ކަނަވާރޯ ޕިރޭޒް އަދި ލުއިސް ފީގޯ ރިބޭރޯ އެވެ. އެ ޓީމުގެ އަނެއް ލަނޑަކީ ރާއްޖޭގެ މުޙައްމަދު އައިމަން އަލީ އަތުން ބައި ކޮޅަށް ވަތް ލަނޑެވެ. މެޗުގައި ރާއްޖޭގެ ހަމައެކަނި ލަނޑު ޖެހީ މުޒުދާން ޙަސަން އެވެ.

މި ނަތީޖާ އާއެކު ރާއްޖެ އިން ކޮލިފައިން ނިންމާލަން ޖެހުނީ ޕޮއިންޓެއް ނުލިބި ގުރޫޕްގެ ހަތަރު ވަނައިގަ އެވެ. ރާއްޖޭގެ މައްޗަށް ކުރި ހޯދި ޓިމޯ ލެސްޓޭ އަށް ލިބުނީ ގުރޫޕްގެ ތިން ވަނަ އެވެ.