ޔަމަނަށް އިޒްރޭލުން އާދިއްތަ ދުވަހު ބޮން އަޅައިފިއެވެ.
އިޒްރޭލުގެ ސިފައިންގެ ބަޔާނެއްގައި ބުނެފައިވަނީ އެ ޤައުމުގެ ހަނގުރާމަ މަތީ މަތިންދާބޯޓުތަކުން ޔަމަނުގައި ހުރި ހޫޫތީންގެ އަމާޒުތަކަކަށް ވައިގެ ހަމަލާތަކެއް ދީފައިވާ ކަމަށެވެ.
އާދީއްތަ ދުވަހު ނެރުނު ބަޔާނެއްގައި އިޒްރޭލު ސިފައިން ބުނެފައިވަނީ ރަސް އީސާ އާއި ހުދެއިދާއަށް އަމާޒުކޮށް ހަމަލާ ދީފައިވާ ކަމަށެވެ.
ހޫތީން ކޮންޓްރޯލްކުރާ އަލް މަސީރާ ސްޓޭޝަނުން ވެސް ބުނެފައިވަނީ، ޙަމަލާތައް އަމާޒުކޮށްފައިވަނީ "ހުދައިދާ އަދި ރަސް އީސާގެ ބަނދަރުތަކަށް" އަދި ދެ އިންޖީނުގެއަށް ކަމަށެވެ.
މި ހަމަލާ ދީފައިވަނީ ހޫތީން ތެލް އަވީވް ކައިރީގައިވާ ބެން ގުރިއޯން އިންޓަނޭޝަނަލް އެއަރޕޯޓަށް ބެލިސްޓިކް މިސައިލް ހަމަލާއެއް ހޮނިހިރު ދުވަހު ދީފައިވަނިކޮށްނެވެ.
ޔަމަނުގެ އުތުރުގެ ބޮޑު ބައެއް ކޮންޓްރޯލް ކުރާ މި ގްރޫޕުން ވަނީ ނޮވެމްބަރު މަހުން ފެށިގެން އިޒްރޭލަށާއި ރަތް ކަނޑާއި އަދަން ކަނޑާއި ބާބުލް މަންދަބު ހަނިކަނޑުގައި ދަތުރުކުރާ އިޒްރޭލާ ގުޅުން ހުރި އުޅަނދުތަކަށް ތަކުރާރުކޮށް ހަމަލާ ދީފައެވެ.
މިއީ ޣައްޒާގައި އިޒްރޭލުން ހިންގާ ހަނގުރާމައާ ދެކޮޅު ހެދުމުގެ ގޮތުންނާއި އަދި ފަލަސްތީނުގެ ރައްޔިތުންނާ އެއްބައިވަންތަކަން ދެއްކުމުގެ ގޮތުން ދޭ ހަމާލާތައް ކަމަށް އެ ގްރޫޕުން ބުނެއެވެ.
