ބެއިރޫތުގެ ދެކުނު ސަރަހައްދަކަށް އިޒްރޭލުން ދިން ވަރުގަދަ ވައިގެ ހަމަލާގައި އަވަހާރަވި ހިޒްބުﷲ ގެ ލީޑަރު ސައްޔިދު ހަސަން ނަސްރުﷲގެ ހަށިގަނޑު ބޮންއެޅި ސަރަހައްދުން ފެނިފައިވާކަމަށާއި، އަދި އޭނާގެ ހަށިގަނޑަށް ގެއްލުންތަކެއް ލިބިފައިނުވާ ކަމަށް ލުބުނާނުގެ ސިއްހީ ދާއިރާގެ މަސްދަރަކާއި ސެކިއުރިޓީ މަސްދަރަކާ ހަވާލާދީ އާދިއްތަ ދުވަހު ރޮއިޓަރޒް އިން ބުނެފިއެވެ.
އިޒްރޭލުގެ ހަމަލާގައި ނަސްރުﷲ އަވަހާރަވިކަން ހިޒްބުﷲ އިން ހޮނިހިރު ދުވަހު ނެރުނު ބަޔާނެއްގައި ކަށަވަރުކޮށްދީފައި ވިޔަސް އެ ބަޔާނުގައި އޭނާ އަވަހާރަވީ ކިހިނެއްކަމެއް ނުވަތަ އޭނާގެ ޖަނާޒާ އާ ބެހޭ އެއްވެސް ވާހަކައެއް ބުނެފައި ނުވާއިރު، މި ދެ މަސްދަރުން ބުނި ގޮތުގައި އޭނާގެ ހަށިގަނޑަށް ޒަޚަމްތަކެއް ލިބިފައެއް ނެތެވެ. އަދި ނަސްރުﷲ އަވަހާރަވެފައިވަނީ ބާރުގަދަ ގޮވުމުގެ ސަބަބުން ލިބުނު ނުސީދާ ގެއްލުމަކުން ކަމަށް ބެލެވެއެވެ.
މަސްތަކެއް ވަންދެން ރޭވުމަށްފަހު އަދި ގިނަ އިންޓެލިޖެންސް މަޢުލޫމާތުތަކެއްގެ އެހީގައި، ހިޒްބުﷲ ގެ ވެރިޔާގެ ގޮތުގައި 30 އަހަރަށް ވުރެ ދިގު މުއްދަތަކަށް ހުންނެވި ނަސްރުﷲ އިޒްރޭލުން އަވަހާރަކޮށްލީ އޭނާ އާއި އެ ޖަމާއަތުގެ އެހެން ލީޑަރުންތަކެއް ބައްދަލުވުމެއް ބާއްވަމުންދިޔަ ބިމުގެ އަޑީގައި ހުރި ބަންކަރަކަށް ބާރުގަދަ ބޮމުގެ ޙަމަލާއެއް ދީގެންނެވެ.
މި ބަންކަރު ހުރީ ބެއިރޫތުގެ ދެކުނުގައިވާ މީހުން ގިނަ ސަރަހައްދެއްގެ 60 ފޫޓު ބިމު އަޑީގައި ކަމަށް ރިޕޯޓްތައް ބުނެއެވެ.
މި ހަމަލާގައި 6 މީހުން މަރުވެ، 91 މީހުން ޒަޚަމްވި ކަމަށް ލުބުނާނުގެ ސިއްހަތާބެހޭ ވުޒާރާއިން ވަނީ ބުނެފައެވެ. ހަމަލާގައި އެތައް އިމާރާތްތަކެއް ވަނީ ބިމާ ހަމަވެފައެވެ.
