ހުކުރު ދުވަހުން ފެށިގެން ހުއްޓުމެއްނެތި ލުބުނާނަށް އިޒްރޭލް ސިފައިން ބޮން އަޅަމުން ދިޔުމުގެ އިތުރުން ލުބުނާނަށް އިޒްރޭލް ސިފައިން އަރަން ތައްޔާރުވަމުންދާ ކަމަށް ރިޕޯޓްތައް ބުނެފިއެވެ.

އާދިއްތަ ދުވަހުވެސް އިޒްރޭލުން "ހިޒްބުﷲ ގެ ޓާގެޓް" ތަކަށް ހަމަލާދީފައިވާކަން ވަނީ ހާމަ ކޮށްފައެވެ.

ހުކުރު ދުވަހު ލުބުނާގެ ދެކުނު ސަރަހައްދަކަށް އިޒްރޭލުން ދިން ވަރުގަދަ ހަމަލާގައި، ތިރީސް އަހަރަށް ވުރެ ދިގު މުއްދަތަކަށް ހިޒްބުﷲ ގެ ވެރިޔާގެ ގޮތުގައި ހުންނެވި ގިނަ ބައެއްގެ ތާއީދު ލިބިފައިވާ ހަސަން ނަސްރުﷲ ވަނީ އަވަހާރަކޮށްލާފައެވެ. މި ހާދިސާގައި ހިޒްބުﷲ ގެ އިސް އެތައް ކޮމާންޑަރުންގެ ފުރާނަ ގެއްލި އެ ޖަމާއަތައް ބޮޑެތި ގެއްލުންތަކެއް ލިބިފައިވާކަމަށް ވަނީ ބެލެވިފައެވެ.  

ނަސްރުﷲ އަވަހާރަކޮށްލިއިރު ހިޒްބުﷲ އާއި އިޒްރޭލާ ދެމެދު ބޯޑަރ ސަރަހައްދުގައި ހަމަލާތައް ބަދަލު ކުރެވޭތާ އަހަރެއްހާ ދުވަސް ވަނީ ވެފައެވެ. ހިޒްބުﷲ ގެ ލީޑަރު އަވަހާރަކޮށްލުމާއެކު ހަނގުރާމައިގެ ހާލަތު އިތުރަށް ގޯސްވެދާނެ ކަމަށް މަސްރަހް ދިރާސާކުރާ ފަރާތްތަކުން އަންނަނީ ބުނަމުންނެވެ.

އާދިއްތަ ދުވަހު އިޒްރޭލުން ދިން ހަމަލާތަކާ ބެހޭ ގޮތުން އިޒްރޭލުގެ އަސްކަރިއްޔާއިން ބުނެފައިވަނީ "މި ހަމަލާތައް އަމާޒު ކުރެވުނީ އެ ޖަމާއަތުގެ ހަތިޔާރާއި އަސްކަރީ އާލާތްތައް ރައްކައުކޮށްފައިވާ ތަންތަނަނަށް،" ކަމަށެވެ.

އިޒްރޭލު ސިފައިންގެ ފަރާތުން ބުނެފައިވަނީ ހޮނިހިރު ދުވަހުން ފެށިގެން ލުބުނާންގެ އެކި ސަރަޙައްދުތަކުގައި ހުރި ހިޒްބުﷲ ގެ ސަތޭކަ އަމާޒުތަކަކަށް ހަމަލާދީފައިވާ ކަމަށެވެ.

އިޒްރޭލުން ބުނަމުން އަންނަނީ ހިޒްބުﷲ ގެ ބާރު މުޅިން ކަނޑުވާލެވެންދެން ހަމަލާތައް ކުރިއަށް ގެންދާނެ ކަމަށެވެ.

ބައިނަލްއަގްވާމީ ގާނޫނުތަކަށް ގޮންޖަހަމުންދާ އިޒްރޭލުން ހިޒްބުﷲ އާ ދެކޮޅަށް އެއްގަމު އަސްކަރީ އޮޕަރޭޝަންތައް ފަށަން އުޅޭ ކަމުގެ އިޝާރާތް ކުރުމާއެކު ބައިނަލްއަޤްވާމީ މުޖުތަމަޢުން ވަރަށް ބޮޑަށް ކަންބޮޑުވުން ފާޅުކޮށްފައިވެއެވެ.

އީރާނުގެ ފުރަތަމަ ނައިބު ރައީސް މުޙައްމަދު ރިޟާ ޢާރިފް ވަނީ އިޒްރޭލުގެ "އަނިޔާވެރި ލޭއޮހޮރުވުން" ކުށްވެރިކޮށް، ނަސްރުﷲ އަވަހާރަކޮށްލުމުގެ ނަތީޖާ އަކަށް ވެގެންދާނީ އިޒްރޭލުގެ "ހަލާކުވުން" އައުން ކަމަށް ވަނީ ވިދާޅުވެފައެވެ. އޭގެ އިތުރުން އީރާނުން ވަނީ ނަސްރުﷲ އަވަހާރަކޮށްލުމާ ގުޅިގެން އދ. ގެ ސަލާމަތީ މަޖިލީހުގެ ކުއްލި ބައްދަލުވުމަކަށް ގޮވާލާފައެވެ.

ހިޒްބުﷲ ގެ އެކުވެރި ފަލަސްތީނުގެ ހަމާސްއިން ނަސްރުﷲ އަވަހާރަކޮށްލުން ކުށްވެރިކޮށް ނެރުނު ބަޔާނުގައި ބުނެފައިވަނީ އެއީ"ފިނޑި ޓެރަރިސްޓް ޢަމަލެއް" ކަމުގައެވެ. އަދި އޭނާ އަވާހަރާ ކޮށްލުމުން ޖިހާދުގެ ރޫހު އިތުރަށް ވަރުގަދަވެގެންދާނެ ކަމަށްވެސް ހަމާސް އިން ބުނެފައިވެއެވެ.

ލުބަނާން، އިރާޤު، އީރާން އަދި ސީރިއާގައި ރަސްމީކޮށް ހިތާމަފާޅުކުރުން އިޢުލާނުކޮށްފައިވާއިރު، ޔަމަނުގެ ހޫތީންގެ ފަރާތުން ބުނެފައިވަނީ ނަތަންޔާހޫ ނިއުޔޯކުން އެނބުރި ވަޑައިގެންނެވި ވަގުތާ ދިމާކޮށް ހޮނިހިރު ދުވަހު އިޒްރޭލުގެ ބެން ގުރިއޯން ވައިގެ ބަނދަރަށް މިސައިލް ހަމަލާއެއް ދީފައިވާކަމަށެވެ.

އިޒްރޭލަށް އެންމެ ގިނައިން ހަތިޔާރު ދޭ އެމެރިކާގެ ރައީސް ޖޯ ބައިޑެން ވަނީ ނަސްރުﷲ އަވާހަރާކޮށްލުމުން އެކަމަށް މަރުހަބާ ވިދާޅުވެ ބަޔާނެއް ނެރުއްވާފައެވެ އެ ބަޔާނުގައި މިއީ "އިންސާފު މިނޭނެ މިންގަނޑެއް" ކަމަށެވެ. އަދި ބައިޑެންގެ ބަދަލުގައި ވައިޓް ހައުސްއަށް ކުރިމަތިލާ ކަމަލާ ހެރިސް ވިދާޅުވެފައިވަނީ ނަސްރުﷲ އަކީ "އެމެރިކާ ރައްޔިތުންގެ ލޭ އަތުގައި ހޭކިފައި ހުރި ޓެރަރިސްޓެއް" ކަމަށެވެ.

މި މަހުގެ ކުރީކޮޅުން ފެށިގެން ލުބުނާނަށް އިޒްރޭލުން ދޭން ފެށި ބޮމުގެ ހަމަލާތަކާ ގުޅިގެން 700ށް ވުރެ ގިނަ މީހުން މަރުވެފައިވާ ކަމަށް އެ ގައުމުގެ ޞިއްޙީ ވުޒާރާގެ ތަފާސް ހިސާބުތަކުން ދައްކައެވެ. ހޮނިހިރު ދުވަހުގެ ހަމަލާތަކުގައި 33 މީހުން މަރުވެ، 195 މީހުން ޒަޚަމްވެފައިވާ ކަމަށް އެ ވުޒާރާއިން ބުނެފައިވެއެވެ.

އިޒްރޭލުގެ ހަމަލާތަކުގައި މިހާތަނަށް ލުބަނާނުގައި އެންމެ ގިނަ މީހުން މަރުވެފައިވަނީ ހުސްވި ހަފްތާގެ ހޯމަ ދުވަހުއެވެ. މިއީ އެ ޤައުމުގެ 1975-1990 ގެ އަހަރުތަކުގެ އެތެރޭގައި ހިނގި ހަނގުރާމައިގެ ފަހުން އެއްދުވަހަކަށް އެންމެ ގިނަ ފުރާނަ ގެއްލިގެއް ދިޔަ ދުވަހެވެ.

އދ. ގެ ރެފިއުޖީންނާ ބެހޭ ވެރިޔާ ފިލިޕޯ ގްރާންޑީ ވިދާޅުވެފައިވަނީ އިޒްރޭލުގެ ހަމަލާތަކުގެ ސަބަބުން ދެކުނު ލުބުނާނުން ގެދޮރު ދޫކޮށް އެހެން ސަރަހައްދުތަކަށް ދިޔަ މީހުންގެ އަދަދު 200,000 އަށްވުރެ މައްޗަށް ގޮސްފައިވާ ކަމަށާއި 50,000 އަށްވުރެ ގިނަ މީހުން އަވައްޓެރި ސީރިއާއަށް ހިޖުރަކޮށްފައިވާ ކަމަށެވެ.