ޚާއްސަ ރެކޯޑާ އެކު ޕާމާ އަށް ބޮޑު އުފަލެއް!

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން ޗެލްސީ މޮޅުވީއިރު، އެ މެޗުގައި ހަތަރު ލަނޑު ޖަހައިގެން ޚާއްސަ ރެކޯޑެއް ލިބުމުން އުފާވާ ކަމަށް ކޯލް ޕާމާ ބުނެފި އެވެ.

ބްރައިޓަންއާ ދެކޮޅަށް ކުޅުނު މެޗުން ޗެލްސީ މޮޅުވީ އިންގްލެންޑުގެ ޕާމާ ޖެހި ހަތަރު ލަނޑާ އެކު އެވެ. މެޗުގައި ޕާމާ އޭނާގެ ހަތަރު ލަނޑު ވެސް ޖެހީ ފުރަތަމަ ހާފުގަ އެވެ. އެއާއެކު ޕާމާ ވެގެން ގޮސްފައި ވަނީ އިނގިރޭސި ޕްރިމިއާ ލީގުގެ މެޗެއްގެ ފުރަތަމަ ހާފުގައި ހަތަރު ލަނޑު ޖެހި ފުރަތަމަ ކުޅުންތެރިޔާ އަށެވެ.

އެކަމާ ގުޅޭ ގޮތުން ވާހަކަ ދައްކަމުން ޕާމާ ބުނީ، އެ މެޗުގައި އޭނާ އަށް ފަސް ލަނޑު ނުވަތަ ހަ ލަނޑު ވެސް ޖެހުނީސް ކަމަށެވެ. އެ އަދަދަށް ލަނޑު ޖަހާނެ ފުރުސަތު އޭނާ އަށް އެ މެޗުގައި ލިބުނު ކަމަަށް ވެސް ޕާމާ ވަނީ ބުނެފަ އެވެ. ޕާމާ ބުނީ މެޗުގައި އޭނާ އަށް ލިބުނު ފުރަތަމަ ފުރުސަތު ކާމިޔާބު ނުވުމުން، ދެރަވި ކަމަށެވެ.

އެހެން ނަމަވެސް، މެޗުގައި ޗެލްސީގެ އެހެން ކުޅުންތެރިން ވެސް ދެއްކި ކުޅުމާއި، ކުރި މަސައްކަތުން އިތުރު ލަނޑުތަކެއް ޖެހުނު ކަމަށް އޭނާ ބުންޏެވެ. އަދި ކޮންމެ ލަނޑަކަށް ފަހު ވެސް، އޭނާ އަށް އިތުރު ހިތްވަރެއް ލިބިގެން ދިޔައިރު، އައު އުންމީދުތަކެއް ލިބެމުން ދިޔަ ކަމަށް ވެސް ޕާމާ ބުންޏެވެ. އެހެންކަމުން މެޗުގެ ފުރަތަމަ ހާފުގައި ހަތަރު ލަނޑު ޖެހުމަކީ ވަރަށް ޚާއްސަ އުފަލެއް ކަމަށް އޭނާ ދެކެ އެވެ.

މީގެ އިތުރުން ޕާމާ ބުނީ ޗެލްސީގައި އޭނާ ކުޅެމުން އަންނަނީ ވަރަށް ހަމަޖެހިގެން ކަމަށާއި، އެ ޓީމުގެ ކޯޗާއި، އެހެނިހެން އޮފިޝަލުން އަދި ކުޅުންތެރިންގެ ފަރާތުންް އޭނާ އަށް ފުރިހަމަ އެއްބާރުލުން ލިބޭ ކަމަށެވެ. ޚާއްސަކޮށް ކުލަބުގެ ވެރިން އޭނާ އަށް ފުރިހަމަ އިތުބާރެއް ކުރާއިރު، އޭނާ ބޭނުން ވަނީ ޗެލްސީ އާއެކު އެންމެ ކުރިއަށް ދިޔުމަށް ކަމަށް ވެސް ޕާމާ ބުންޏެވެ.

މެންޗެސްޓަރ ސިޓީ ދޫކޮށްލުމަށްފަހު މިދިޔަ އަހަރު ޗެލްސީ އަށް ބަދަލުވި ޕާމާ އަންނަނީ އެ ކުލަބުގައި ވެސް މޮޅު ކުޅުމެއް ދައްކަމުންނެވެ. ޗެލްސީ އަށް ބަދަލުވި ފުރަތަމަ ސީޒަންގައި އޭނާ ވަނީ އެ ކުލަބަށް ކުޅެދިން 45 މެޗުގައި 25 ލަނޑު ޖަހައިފަ އެވެ. އަދި މިހާރު ކުރިއަށްދާ ސީޒަންގެ މިހާތަނަށް އަށް މެޗު ކުޅުނުއިރު، އޭނާ ވަނީ ހަ ލަނޑު ޖަހައިފަ އެވެ.