ގޭންގް ކުށްތަކާ ގުޅޭ 8 މައްސަލައެއްގައި މިއަހަރު ދައުވާ ކޮށްދިނުމަށް އެދި ޕީޖީއަށް ފޮނުވާފައިވޭ
ހުއްޓުވާ ސުވާލު ކުރެވުނު މީހުންގެ އަދަދު 12،253ށް އަރާ
ފުލުހުން ހިންގި އޮޕަރޭޝަނެއްގެ ތެރެއިން
ގޭންގް ކުށްތައް މަނާ ކުރުމުގެ މަސައްކަތުގެ ދަށުން މިހާތަނަށް އެފަދަ 8 މައްސަލައެއްގައި ދައުވާ ކޮށްދިނުމަށް އެދި ޕްރޮސެކިއުޓަރ ޖެނެރަލް އޮފީހަށް ފޮނުވާފައިވާނެކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ދިވެހި ފުލުހުންގެ ޚިދުމަތުން ވަނީ މިއަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން އޯގަސްޓު މަހުގެ 31 ވަނަ ދުވަހުގެ ނިޔަލަށް ގޭންގް ކްރައިމް އެންފޯސްމަންޓުން ކޮށްފައިވާ މަސައްކަތްތަކުގެ ތަފާސްހިސާބު ހިއްސާ ކޮށްފައެވެ. އެގޮތުން ތަފާސްހިސާބުތައް ދައްކާ ގޮތުން އެ މުއްދަތުގެ ތެރޭގައި 67 މީހަކު ހައްޔަރު ކޮށްފައިވާއިރު، އޭގެ ތެރެއިން 22 މީހުން މިހާރުވެސް ތިބީ ފުލުހުންގެ ހައްޔަރުގައެވެ.
އަދި 15 މީހަކު ރިމާންޑު ޖަލަށް ބަދަލު ކޮށްފައިވާއިރު، 30 މީހަކު ވަނީ ބަންދުން ދޫކޮށްލާފައެވެ.
ފުލުހުން މައުލޫމާތު ދޭ ގޮތުގައި އެ މުއްދަތުގެ ތެރޭގައި ހުއްޓުވާ ސުވާލު ކުރެވުނު މީހުންގެ އަދަދު 12،253ށް އަރާއިރު، އޭގެ ތެރޭގައި 18 އަހަރުން ދަށުގެ 331 ކުދިން ހިމެނެއެވެ.
މި މުއްދަތުގެ ތެރޭގައި 8 މައްސަލައެއްގައި ދައުވާކޮށްދިނުން އެދި ޕީޖީ އޮފީހަށްވެސް ފޮނުވާފައިވެއެވެ.
ފުލުހުން މައުލޫމާތު ދޭ ގޮތުގައި މިހާރު ފަށާފައިވާ މަސައްކަތްތަކުގެ ތެރެއިން މާލެ އާއި ހުޅުމާލޭގައި ގޭންގްތައް ހަރަކާތްތެރިވާ ސަރަހައްދުތަކުގައި ސްޓެޓިކްކޮށް ފުލުހުން ތިބެގެން ބަލަހައްޓަމުން ގެންދާނެއެވެ.
