ޔުއެފާ ޗެމްޕިއަންސް ލީގުގެ ކޮލިފައިން ރައުންޑްގެ ފުރަތަމަ ލެގުގައި ލިވަޕޫލް ކުޅުނު މެޗު އެ ޓީމުން ކާމިޔާބުކޮށްފިއެވެ.

ޖަރުމަނުގެ ހޮފެންހައިމްއާ ވާދަކޮށް ލިވަޕޫލްއިން މެޗު ކާމިޔާބުކޮށްފައިވަނީ 1-2 އިންނެވެ.

މެޗު ފެށިގެން ރަނގަޅަށް ކުޅެމުން އައީ ހޮފެންހައިމްއެވެ. އެ ޓީމަށް ވަނީ މެޗުގެ ލީޑު ނެގުމަށް ރަނގަޅު ފުރުސަތެއް ލިބި ބޭކާރުވެފައެވެ. އެގޮތުން މެޗުގެ 12 ވަނަ މިނިޓުގައި ހޮފެންހައިމްއަށް ލިބުނު ޕެނަލްޓީ އެ ޓީމުގެ ފޯވާޑް އަންދަރޭ ކްރަމަރިޗް ވަނީ ބޭކާރުކޮށްލާފައެވެ.

މެޗުގެ 35 ވަނަ މިނިޓުގައި ލިވަޕޫލްގެ ޒުވާން މިޑްފީލްޑާ އެލެކްސޭންޑާ އާނޯލްޑް ވަނީ ހިލޭ ޖެހުމަކުން ލިވަޕޫލްއަށް ލީޑު ނަގައިދީފައެވެ. މި ލަނޑާ އެކު ލިވަޕޫލްއިން ވަނީ މެޗުގެ ކޮންޓްރޯލް ނަގާ ރަނގަޅު ކުޅުމެއް ދައްކާފައެވެ. ފުރަތަމަ ހާފް ނިމިގެން ދިޔައީ 0-1 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.

ދެވަނަ ހާފުގެ 74 ވަނަ މިނިޓުގައި ލިވަޕޫލްގެ ލީޑު ފުޅާވެގެން ދިޔައީ ޖޭމްސް މިލްނާ ކާމިޔާބުކޮށްދިން ގޯލުންނެވެ. ހޮފެންހައިމްއަށް ނަތީޖާގެ ފަރަގު ކުޑަކޮށްދިނީ 87 ވަނަ މިނިޓުގައި އެޓީމުގެ ފޯވާޑް މާކްއެވެ.

މި މެޗުގައި ލިވަޕޫލް ކުޅެފައި ވަނީ އެ ޓީމަށް ކުޅެމުން އަންނަ ބްރެޒިލްގެ މިޑްފީލްޑާ ފިލިޕޭ ކޫޓީނިއޯ ނުލައެވެ. އޭނާ ސްކޮޑުން ބާކީ ކޮށްފައިވަނީ އޭނާ ބާސެލޯނާއަށް ބަދަލުވެގެން ބޭނުންވާ ކަމަށް ލިވަޕޫލްގެ މެނޭޖްމަންޓުގައި އެދުމުންނެވެ.

މި ނަތީޖާއެކު ލިވަޕޫލްއިން ދެވަނަ ލެގަށް ނުކުންނާނީ ދެ އަވޭ ގޯލާ އެކުއެވެ. މި މެޗުގެ ދެވަނަ ލެގު ކުޅެވޭނީ އޮގަސްޓު މަހުގެ 23 ވަނަ ދުވަހުއެވެ.