އަމާން މަގުތަކެއް ގާއިމްކުރުމަށް މާލެސިޓީއަށް ވެހިކަލް އެތެރެކުރުން ކޮންޓްރޯލް ކުރަންޖެހޭ: ފުލުހުން
28 ސެޕްޓެމްބަރު 2024 | ހޮނިހިރު 08:31ކަމާގުޅުންހުރި މުއައްސަސާތައް ގުޅިގެން މި މައްސަލައަށް އަވަސް ހައްލެއް ގެންނަންޖެހޭ
ޓްރެފިކް ޕޮލިހެއް މަގުމަތީގައި ހަރަކާތްތެރިވަނީ
އަމާން މަގުމަތަކެއް ގާއިމްކުރުމަށް މާލެސިޓީއަށް ވެހިކަލް އެތެރެކުރުން ކޮންޓްރޯލް ކުރަންޖެހޭ ކަމަށް ފުލުހުން ބުނެފިއެވެ.
ރާއްޖެޓީވީގެ ފަސްކާފު ޕްރޮގްރާމްގައި ސަބް އިންސްޕެކްޓަރ އޮފް ޕޮލިސް ހުސެއިން އަސްލަހް ވިދާޅުވީ ކޮންޓްރޯލެއް ނެތި މާލެސިޓީއަށް ވެހިކަލް އިތުރުވެގެން ދިއުމަކީ ވަރަށް ބޮޑު ގޮންޖެހުމެއް ކަމަށެވެ. އަސްލަހް ވިދާޅުވީ އެކެއްގެ ނަމުގައި ދެތިން ހަތަރު ވެހިކަލް ރަޖިސްޓްރީކޮށްފައިވާ ކަމަށާއި، މިހާރު ވެސް ވެހިކަލްތަކާއި ހެދި މާލޭސިޓީގެ މަގުތަކުގައި ހިނގާބިނގާވެ އުޅުމަށް ދަތިވެފައިވާ ކަމަށެވެ.
މާލެސިޓީއަށް ވެހިކަލް އެތެރެކުރުމާއި، ރަޖިސްޓްރީ ކުރުން ކޮންޓްރޯލް ކުރުމަކީ ކަމާގުޅުންހުރި މުއައްސަސާތަކުން ކުރަންޖެހޭ މަސައްކަތެއްކަން ފާހަގަކުރައްވައި އަސްލަހް ވިދާޅުވީ ޓްރާސްޕޯޓް މިނިސްޓްރީން އަބަދުވެސް ވެހިކަލް އެތެރެކުރުން ކޮންޓްރޯލް ކުރުމުގެ މަޝްވަރާތައް ކުރި ނަމަވެސް އަމަލީ ސިފައެއް ނާންނަ ކަމަށެވެ. އަދި ވިދާޅުވީ ކަމާގުޅުންހުރި މުއައްސަސާތައް ގުޅިގެން މި މައްސަލައަށް އަވަސް ހައްލެއް ގެންނަންޖެހޭ ކަމަށެވެ.
ޕަބްލިކް ޓްރާންސްޕޯޓަށް އިޝާރާތް ކުރައްވައި އަސްލަހް ވިދާޅުވީ އާއްމު ރައްޔިތުން ޕަބްލިކް ޓްރާންސްޕޯޓަށް ބޮޑަށް ބަރޯސާވާންޖެހޭ ކަމަށެވެ. ނަމަވެސް މިހާރުގެ ހާލަތަށް ބަލާއިރު، މަގުތަކުގައި ވެހިކަލްތައް ގިނަވުމާއި، ޕާކުކޮށްފައި ހުންނަ ގޮތުން ޕަބްލިކް ޓްރާސްޕޯޓުގެ ޚިދުމަތް ވެސް ރަނގަޅަށް ނުދެވޭ ކަމަށް އޭނާ ވިދާޅުވިއެވެ.
ފުލުހުން ބުނީ އަމާން މަގުތަކެއް ގާއިމް ކުރުމަށް އެންމެން ގުޅިގެން މަސައްކަތް ކުރަންޖެހޭ ކަމަށެވެ. އަދި މަގުތަކުގައި ވެހިކަލްތައް ބޭނުންކުރާ މިންވަރު މަދުވުމަކީ ވެސް އަމާން މަގުތަކެއް ފެނިގެންދާނެ ކަމެއްކަން ފުލުހުން ފާހަގަކުރެއެވެ.
