ފަހަތުން އަރައި މޮޅުވެ ޑޯޓްމަންޑު ދެ ވަނައިގައި

ޖަރުމަނު ލީގުގައި ބޮކުމްއާ ދެކޮޅަށް ކުޅުނު މެޗުން މޮޅުވެ، ބޮރޫޝިއާ ޑޯޓްމަންޑުން ލީގު ތާވަލްގެ ދެ ވަނަ އަށް ޖެހިލައިފި އެވެ.

ޑޯޓްމަންޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 4-2 އިންނެވެ. އެއީ މެޗުގައި ބޮކުމް އިން ދެ ލަނޑު ޖަހާފައި ވަނިކޮށް، ފަހަތުން އަރައި ހަތަރު ލަނޑު ޖަހައިގެންނެވެ.

މެޗު ފަށައިގެން 16 ވަނަ މިނެޓުގައި ބޮކުމް އަށް ލީޑު ނަގައިދިނީ މަތުސް ބެރޯ އެވެ. އޭގެ ފަސް މިނެޓު ފަހުން ޑެނީ ޑީ ވިޓް ވަނީ ބޮކުމްގެ ދެ ވަނަ ލަނޑު ޖަހައި، އެ ޓީމުގެ ލީޑު ފުޅާ ކޮށްފަ އެވެ. ނަމަވެސް، ފުރަތަމަ ހާފު ނިމުމުގެ ކުރިން ޑޯޓްމަންޑުން ވަނީ ލަނޑެއް ޖަހައި ފަރަގު ކުޑަ ކޮށްފަ އެވެ. ފުރަތަމަ ހާފުގެ 44 ވަނަ މިނެޓުގައި ޑޯޓްމަންޑަށް އެ ލަނޑު ޖަހައިދިނީ ސާހޯ ގުރާސީ އެވެ.

ދެ ވަނަ ހާފުގައި ޑޯޓްމަންޑުން މެޗުގެ ނަތީޖާ ހަމަހަމަ ކުރީ އެ ޓީމަށް ލިބުނު ޕެނަލްޓީ އަކުންނެވެ. މެޗުގެ 62 ވަނަ މިނެޓުގައި ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ އެމްރީ ކެން އެވެ. އޭގެ ފަހުން މެޗުގެ 75 ވަނަ މިނެޓުގައި ޑޯޓްމަންޑަށް ލީޑު ނަގައިދިނީ ގުރާސީ އެވެ. އަދި މެޗުގައި ޑޯޓްމަންޑުގެ ހަތަރު ވަނަ ލަނޑު، 81 ވަނަ މިނެޓުގައި ޖެހީ ފެލިކްސް މެކާ އެވެ.

މޮޅާއެކު ޑޯޓްމަންޑު ދެ ވަނައިގައި އޮތީ މިހާތަނަށް ކުޅުނު ފަސް މެޗުން 10 ޕޮއިންޓު ހޯދައިގެންނެވެ. ތިން މެޗުން އެ ޓީމު މޮޅުވެފައިވާއިރު، އެއް މެޗުން ބަލިވެ، އެއް މެޗުން ވަނީ އެއްވަރުވެފަ އެވެ.